മലബാറില്‍ രോഗം കൂടുന്നു

സംസ്ഥാനത്ത് ഇന്നു മൂന്നു കോവിഡ് മരണം കൂടി. 70 വയസു കഴിഞ്ഞവരാണ് മരിച്ച മൂന്നുപേരും. തൃശൂര്‍ മെഡിക്കല്‍ കോളജില്‍ ചികില്‍സയിലായിരുന്ന ഇരിങ്ങാലക്കുട സ്വദേശി വര്‍ഗീസ്, മഞ്ചേരി മെഡിക്കല്‍ കോളജില്‍ ചികിത്സയിലായിരുന്ന മലപ്പുറം തിരൂരങ്ങാടി സ്വദേശി അബ്ദുല്‍ ഖാദര്‍, കാസര്‍കോട് സ്വദേശി അബ്ദുല്‍ റഹ്മാന്‍ എന്നിവരാണ് മരിച്ചത്. ആന്റിജന്‍ പരിശോധനയിലാണ് അബ്ദുല്‍ റഹ്മാന് രോഗം സ്ഥിരീകരിച്ചത്. സംസ്ഥാനത്ത് ശനിയാഴ്ച 5 കോവിഡ് മരണങ്ങളാണ് റിപ്പോര്‍ട്ട് ചെയ്തത്. രണ്ടെണ്ണം സര്‍ക്കാര്‍ ഔദ്യോഗിക കണക്കുകളില്‍ ഉള്‍പ്പെടുത്തി. ഇന്നത്തെ മരണങ്ങള്‍ കൂടി ഉള്‍പ്പെടുത്തി അനൗദ്യോഗിക മരണസംഖ്യ 69 ആണ്. ബൈക്കപകടത്തില്‍ ഗുരുതരമായി പരിക്കേറ്റ് ചികിത്സയിലിരിക്കെ മരിച്ച കണ്ണൂര്‍ സ്വദേശിയായ വിദ്യാര്‍ത്ഥിക്ക് കൊവിഡ് ഇല്ലെന്ന് സ്ഥിരീകരണം. ഇന്നലെ പരിയാരം മെഡിക്കല്‍ കോളേജില്‍ ചികിത്സയിലിരിക്കെ മരിച്ച അമല്‍ ജോ അജിയുടെ ആലപ്പുഴ വൈറോളജി ഇന്‍സ്റ്റിറ്റ്യൂട്ടില്‍ നിന്നുള്ള പരിശോധന ഫലമാണ് നെഗറ്റീവായത്. പരിയാരത്തെ വൈറോളജി ലാബില്‍ നടത്തിയ പ്രാഥമിക പരിശോധനയില്‍ ഫലം കൊവിഡ് പോസിറ്റീവ് എന്നായിരുന്നു. തുടര്‍ന്നാണ് ആലപ്പുഴയിലേക്ക് സ്രവം അയച്ചത്. അമലിന്റെ അച്ഛന്റെ പരിശോധനാ ഫലവും നെഗറ്റീവാണ്. ഇദ്ദേഹം പരിയാരത്തെ നഴ്‌സിംഗ് അസിസ്റ്റന്റാണ്. പരിയാരം മെഡിക്കല്‍ കോളേജില്‍ സ്ഥിതി അതീവ ഗുരുതരാണ്. 22 ആരോഗ്യപ്രവര്‍ത്തകര്‍ക്ക് കൊവിഡ് സ്ഥിരീകരിച്ചതോടെ പരിയാരം മെഡിക്കല്‍ കോളേജ് ആശുപത്രിയിലെ പ്രവര്‍ത്തനം ഭാഗികമാക്കി. അത്യാഹിത രോഗികള്‍ക്ക് മാത്രമാണ് ചികിത്സ. വിവിധ ചികിത്സ വിഭാഗത്തിലെ ഒപികളുടെ പ്രവര്‍ത്തനവും ഭാഗികമായാണ് നടത്തുന്നത്. ന്യൂറോ പോസ്റ്റ് ഓപ്പറേറ്റീവ് ഐസിയുവും , ഗ്യാസ്‌ട്രോ എന്ററോളജി, കമ്യൂണിറ്റി മെഡിസിന്‍ , സിടി, എംആര്‍ഐ സ്‌കാന്‍ യൂണിറ്റുകളും താല്‍ക്കാലികമായി അടച്ചു. ശസ്ത്രക്രിയ വിഭാഗത്തിലെ അനസ്തീഷ്യോളജിസ്റ്റുകള്‍ മുഴുവന്‍ ക്വാറന്റീനില്‍ പോയതോടെ ശസ്ത്രക്രിയാ വിഭാഗങ്ങളും മുടങ്ങി. അടിയന്തിര ശസ്ത്രക്രിയകള്‍ മാത്രമാണ് നടത്തുന്നത്. 90ലേറെ ജീവനക്കാര്‍ ക്വാറന്റീനില്‍ പോയതോടെ ആശുപത്രിയുടെ പ്രവര്‍ത്തനത്തെ പ്രതികൂലമായി ബാധിച്ചു. ആശുപത്രിയും പരിസരവും പൂര്‍ണമായി അണുനശീകരണം നടത്തണമെന്ന ആവശ്യവും ഉയരുന്നുണ്ട്.