ഫോണ്‍ വിളികള്‍ കണ്ടത്തി എന്‍ ഐ എ

യുഎഇ കോണ്‍സലേറ്റിലെ ഉന്നതരുടെ ഫോണ്‍ വിളികള്‍ എന്‍ഐഎ പരിശോധിച്ചു. സ്വര്‍ണക്കടത്തു നടന്നുവെന്നു കണ്ടെത്തിയ ദിവസങ്ങളിലടക്കം ജൂണ്‍16 മുതല്‍ സ്വര്‍ണക്കടത്തു പിടികൂടിയ ജൂലൈ അഞ്ചുവരെയുള്ള 20 ദിവസങ്ങളില്‍ സ്വപ് നയും അറ്റാഷയും 76 തവണ വിളിച്ചതായി കണ്ടെത്തി. ഡിപ്ലോമാറ്റിക് ബാഗേജിലുണ്ടായിരുന്ന സ്വര്‍ണം കസ്റ്റംസ് പിടികൂടിയ ജൂലൈ അഞ്ചിന് രാവിലെ 11.43ന് 291 സെക്കന്‍ഡും 11.58 ന് 95 സെക്കന്‍ഡും 12.23ന് 262 സെക്കന്‍ഡും സംസാരിച്ചിരുന്നതായി കണ്ടെത്തി. യുഎഇ കോണ്‍സലേറ്റ് ജനറലിന്റെ ചുമതലയുണ്ടായിരുന്ന അറ്റാഷെ റാഷിദ് അല്‍ സലാമിയുടെ 7999919191 എന്ന മൊബൈല്‍ ഫോണ്‍ നന്പരില്‍നിന്ന് സ്വപ്ന സുരേഷിന്റെ 9072551105 ഫോണ്‍ നമ്പരിലേക്കാണ് ഈ ദിവസങ്ങളില്‍ വിളിച്ചത്. ബാഗേജ് പൊട്ടിച്ചു സ്വര്‍ണമെന്നു കണ്ടെത്തിയ ശേഷമായിരുന്നു അറ്റാഷെയുടെ വിളികളെല്ലാം. സ്വര്‍ണക്കടത്തില്‍ തന്റെ പേരു വെളിപ്പെടുത്തരുതെന്നു പറയാനാണ് അറ്റാഷെ ഈ സമയങ്ങളില്‍ വിളിച്ചതെന്നാണു സ്വപ്ന എന്‍ഐഎക്കു നല്‍കിയ മൊഴി. ബാഗേജ് എത്തിയ ജൂണ്‍ 30 മുതല്‍ ജൂലൈ അഞ്ചുവരെയുള്ള ആറു ദിവസങ്ങളില്‍ മാത്രം 45 തവണ ഇരുവരും ഫോണില്‍ ബന്ധപ്പെട്ടതായും എന്‍ഐഎ ശേഖരിച്ച ഫോണ്‍ രേഖകളില്‍ പറയുന്നു. സ്വര്‍ണം അടങ്ങിയ ഡിപ്ലോമാറ്റിക് ബാഗേജ് തിരുവനന്തപുരം കാര്‍ഗോ കോംപ്ലക്‌സിലെത്തിയ ജൂണ്‍ 30ന് ഒന്‍പതു തവണ ഇരുവരും തമ്മില്‍ ഫോണില്‍ ബന്ധപ്പെട്ടു. ബാഗേജ് വിട്ടു കൊടുക്കില്ലെന്നു കസ്റ്റംസ് അറിയിച്ച ശേഷമായിരുന്നു ഈ ഫോണ്‍ വിളികള്‍. ജൂലൈ ഒന്നിനും ഒന്‍പതു തവണ ഇതേ ഫോണുകളില്‍ ബന്ധപ്പെട്ടു. ജൂലൈ രണ്ടിന് നാലു തവണയും മൂന്നിന് 20 തവണയും നാലിന് മൂന്നു തവണയും ഇരുവരും ബന്ധപ്പെട്ടതായും അന്വേഷണ ഏജന്‍സികള്‍ക്കു വിവരം ലഭിച്ചു. ഡിപ്ലോമാറ്റിക് ബാഗേജ് എത്തുന്നതിന് തൊട്ടു മുന്‍പ് ജൂണ്‍ 29നും അറ്റാഷെയും സ്വപ്നയും തമ്മില്‍ ഒന്‍പതു തവണ ഫോണില്‍ ബന്ധപ്പെട്ടിരുന്നു. യുഎഇ കോണ്‍സലേറ്റിലെ ജോലിയില്‍ നിന്നു പുറത്താക്കപ്പെട്ട ശേഷം സ്വപ്ന സുരേഷുമായി കോണ്‍സലേറ്റ് ഉദ്യോഗസ്ഥര്‍ എന്തിന് ഇത്രയധികം തവണ ബന്ധപ്പെട്ടുവെന്ന ചോദ്യമാണുയരുന്നത്. നേരത്തെ ബാഗേജില്‍ സ്വര്‍ണമെത്തിയെന്നു കണ്ടെത്തിയ ജൂണ്‍ 23 മുതല്‍ 25 വരെയുള്ള തീയതികളില്‍ ഇരുവരും തമ്മില്‍ ആറു തവണ വീതം ബന്ധപ്പെട്ടിരുന്നു. 27ന് ഏഴു തവണയും ഇരുവരും ഫോണില്‍ ബന്ധപ്പെട്ടിരുന്നതായും ഫോണ്‍ രേഖകള്‍ വ്യക്തമാക്കുന്നു. അതിനിടെ, യുഎഇ കോണ്‍സലേറ്റ് ജനറലിന്റെ ഔദ്യോഗിക മൊബൈല്‍ ഫോണ്‍ നന്പരിലും സ്വപ്നയുമായി നിരവധി തവണ ബന്ധപ്പെട്ടിരുന്നു. കോവിഡിനെത്തുടര്‍ന്നു കോണ്‍സലേറ്റ് ജനറല്‍ രാജ്യത്തു നിന്നു മടങ്ങിയ ശേഷം അറ്റാഷെയ്ക്കായിരുന്നു ചുമതല.