കൊവിഡ് വില്ലനാവണ്ട, ഫയലുകള്‍ നീങ്ങട്ടെ

കേരളം കൊവിഡ് ഭീതിയിലേക്ക് മാറിയതു മുതല്‍ സെക്രട്ടറിയേറ്റിലും കളക്ട്രറ്റിലും കെട്ടിക്കിടക്കുന്ന ഫയലുകള്‍ തീര്‍പ്പാക്കാന്‍ മുഖ്യമന്ത്രിയുടെ അടിയന്തര ഇടപെടല്‍. സെക്രട്ടേറിയറ്റില്‍ കെട്ടിക്കിടക്കുന്നതില്‍ ഏറെയും തദ്ദേശ സ്വയംഭരണ- റവന്യു- വിദ്യാഭ്യാസ വകുപ്പുകളിലെ ഫയലുകളാണ്. സംസ്ഥാന സെക്രട്ടേറിയറ്റില്‍ കെട്ടിക്കിടക്കുന്ന ഫയലുകളുടെ പൂര്‍ണ വിവരം ചൊവ്വാഴ്ച മുഖ്യമന്ത്രി വിളിച്ച വകുപ്പു സെക്രട്ടറിമാരുടെ യോഗത്തില്‍ വ്യക്തമാകും. എല്ലാ സെക്ഷന്‍ ഓഫിസര്‍മാരും തിങ്കളാഴ്ച ഉച്ചയോടെ തീര്‍പ്പാകാത്ത ഫയലുകളുടെ വിവരങ്ങള്‍ കൈമാറണമെന്നു വിവിധ വകുപ്പു സെക്രട്ടറിമാര്‍ നിര്‍ദേശം നല്‍കി. കോവിഡിനു മുന്‍പു സംസ്ഥാനത്ത് ഒന്നര ലക്ഷത്തോളം ഫയലുകളാണു തീര്‍പ്പാക്കാനുണ്ടായിരുന്നത്. മാര്‍ച്ച് 24നു സമ്പൂര്‍ണ ലോക്ക്ഡൗണ്‍ പ്രഖ്യാപിച്ചതിനു ശേഷം രണ്ടു മാസത്തോളം സംസ്ഥാനത്തെ സര്‍ക്കാര്‍ ഓഫിസുകളുടെ പ്രവര്‍ത്തനം താറുമാറായിരുന്നു. നിലവില്‍ രണ്ടു ലക്ഷത്തോളം ഫയലുകള്‍ തീര്‍പ്പാക്കാനുണ്ടെന്നാണു വിലയിരുത്തല്‍. ലോക്ക്ഡൗണ്‍ ഇളവു നിലവില്‍ വന്നശേഷം സര്‍ക്കാര്‍ ഓഫിസുകളുടെ പ്രവര്‍ത്തനം ഭാഗികമായി തുടങ്ങിയെങ്കിലും തിരുവനന്തപുരം നഗരത്തില്‍ സംസ്ഥാന സര്‍ക്കാര്‍ ട്രിപ്പിള്‍ ലോക്ക്ഡൗണ്‍ വീണ്ടും സെക്രട്ടേറിയറ്റില്‍ പ്രവര്‍ത്തനം നിലച്ചു. കോവിഡ് പ്രതിരോധത്തിന്റെ ഭാഗമായി ഇപ്പോള്‍ സെക്രട്ടേറിയറ്റില്‍ സന്ദര്‍ശക വിലക്കു കൂടി ഏര്‍പ്പെടുത്തിയതോടെ ജനങ്ങള്‍ക്കു സര്‍ക്കാരില്‍ നിന്നു യാതൊരു സേവനവും ലഭിക്കാത്ത അവസ്ഥയായി. തദ്ദേശ വകുപ്പിലടക്കം 50 ശതമാനം ജീവനക്കാര്‍ ഹാജരാകണമെന്നു നിര്‍ദേശിച്ചെങ്കിലും പല ഓഫിസുകളിലും ജീവനക്കാരില്ലാത്ത അവസ്ഥവരെയുണ്ടായി. ഫയല്‍ സ്തംഭനത്തെ തുടര്‍ന്നു ജനജീവിതം ദുഷ്‌കരമായതോടെ ഇത് ഒഴിവാക്കുന്നതു ചര്‍ച്ച ചെയ്യാന്‍ മുഖ്യമന്ത്രി നാലിന് വകുപ്പു സെക്രട്ടറിമാരുടെ യോഗം വിളിച്ചത്. രാവിലെ 10.30നു വീഡിയോ കോണ്‍ഫറന്‍സ് വഴിയാണു യോഗം. സര്‍ക്കാരിന്റെ കാലാവധി കഴിയാന്‍ മാസങ്ങള്‍ മാത്രം ശേഷിച്ചിരിക്കെ അടിയന്തരമായി തീര്‍പ്പാക്കേണ്ട ഫയലുകളില്‍ പോലും നടപടിയില്ല. ജീവനക്കാര്‍ വീടുകളിലിരുന്നു ജോലി ചെയ്യുമെന്നു സര്‍ക്കാര്‍ പ്രഖ്യാപിച്ചെങ്കിലും ഇതും കാര്യമായ തോതില്‍ പ്രാവര്‍ത്തികമായില്ലെന്നാണു സര്‍ക്കാര്‍ വിലയിരുത്തല്‍. അതുകൊണ്ടാണ് മുഖ്യമന്ത്രി നേരിട്ടു യോഗം വിളിക്കുന്നത്.