സ്വര്‍ണകടത്തില്‍ അറ്റാഷെയില്ലെന്ന് കേന്ദ്രമന്ത്രി

സ്വര്‍ണക്കടത്തില്‍ യുഎഇ അറ്റാഷെ സംശയമുനയിലില്ലെന്ന് വി.മുരളീധരന്‍. അറ്റാഷെയുടെ പങ്കിനെപ്പറ്റി എന്‍.ഐ.എ ഇതുവരെ ഒന്നും പറഞ്ഞിട്ടില്ലന്ന്് കേന്ദ്രമന്ത്രി വി.മുരളീധരന്‍ പറഞ്ഞു. എന്നാല്‍ അദ്ദേഹത്തില്‍ നിന്ന് വിവരങ്ങള്‍ തേടമെന്ന അന്വേഷണ ഏജിസികള്‍ ആവശ്യപ്പെട്ടോ എന്ന കാര്യത്തെക്കുറിച്ച് മന്ത്രി വ്യക്തമാക്കിയിട്ടില്ല. കേസില്‍ രാജ്യന്തര കണ്ണികള്‍ ഉണ്ടെന്ന് എന്‍ ഐ എ പറയുമ്പോഴാണ് മന്ത്രിയുടെ ഈ നിലപാട്. അറ്റാഷെ രാജ്യം വിട്ടത് അദേഹത്തിന്റെ പേരില്‍ കേസില്ലാത്തതിനാലെന്ന് മനോരമ ന്യൂസ് കൗണ്ടര്‍പോയിന്റിലാണ് കേന്ദ്രമന്ത്രി വി.മുരളീധരന്‍ പറഞ്ഞത്. യു.എ.ഇ അറ്റാഷെ തിരിച്ചുവരില്ലെന്ന് ആരാണ് പറഞ്ഞതെന്നും കേന്ദ്രമന്ത്രി ചോദിച്ചു. സ്വര്‍ണക്കടത്ത് നയതന്ത്രബാഗേജിലല്ലെന്ന് അദ്ദേഹം ആവര്‍ത്തിച്ചു. നയതന്ത്രബാഗേജ് എന്ന വ്യാജേനയാണ് സ്വര്‍ണക്കടത്ത് നടന്നതെന്നാണ് അദ്ദേഹത്തിന്റെ വിശദീകരികരണം. സ്വര്‍ണക്കടത്ത് കേസില്‍ മുഖ്യകണ്ണിയായ ഫൈസല്‍ ഫരീദിനെ ഇന്ത്യയിലേക്ക് വിട്ടുകിട്ടാന്‍ വിദേശമന്ത്രാലയത്തിന് ദേശീയ അന്വേഷണ ഏജന്‍സി (എന്‍ഐഎ) ഇതുവരെ അപേക്ഷ നല്‍കിയിട്ടില്ലെന്ന് വിദേശ സഹമന്ത്രി വി മുരളീധരന്‍. പാസ്പോര്‍ട്ട് റദ്ദാക്കിയതിനാല്‍, മറ്റേതെങ്കിലും രാജ്യത്തേക്ക് പോവുകയാണെങ്കില്‍ ഇയാളെ പിടിക്കാന്‍ മറ്റ് നയതന്ത്രമാര്‍ഗങ്ങളിലൂടെ നടപടി സ്വീകരിക്കാം. അതല്ലാതെ വിവാദകേസിലെ മുഖ്യപ്രതിയെ വിട്ടുകിട്ടാന്‍ ഒരു നടപടിയും കേന്ദ്ര ഏജന്‍സി സ്വീകരിച്ചിട്ടില്ലെന്ന് കേന്ദ്രമന്ത്രി സമ്മതിച്ചു. നിലവില്‍ വിദേശത്തുള്ള ഫൈസല്‍ മറ്റ് രാജ്യങ്ങളിലേക്ക് പോയാല്‍ നിയമാനുസൃത മാര്‍ഗങ്ങളിലൂടെ ഇന്ത്യക്ക് വിട്ടുകിട്ടാന്‍ വഴിയുണ്ടാക്കാം. അതിന് ഇനിയും കാത്തിരിക്കേണ്ടിവരുമെന്നാണ് കേന്ദ്രമന്ത്രിയുടെ പ്രതികരണം വ്യക്തമാക്കുന്നത്. വിദേശത്തുള്ള പ്രതിയെ വിട്ടുകിട്ടാന്‍ എന്‍ഐഎയ്ക്ക് നേരിട്ട് ഇടപെടാനാകില്ല. വിദേശമന്ത്രാലയത്തിന് അപേക്ഷ നല്‍കി അതിനുള്ള വഴിയൊരുക്കുകയാണ് രീതി. ഇതിനായി ഒരു നീക്കവും നടന്നിട്ടില്ലെന്നാണ് വിദേശ സഹമന്ത്രിതന്നെ സമ്മതിച്ചത്. ഈ കേസ് ഒതുക്കാനുള്ള നീക്കങ്ങള്‍ ഡല്‍ഹി കേന്ദ്രീകരിച്ച് തുടങ്ങിയെന്ന് ഇന്നലെ ഹെഡ് ലൈന്‍ കേരള റിപ്പോര്‍ട്ട് ചെയ്തിരുന്നു. അത് ശരിവയ്ക്കുന്ന വിവരങ്ങളാണ് ഒരോദിവസവും പുറത്തുവരുന്നത്. കേസിലെ വിദേശ കണ്ണികളെ പിടിയില്‍ കിട്ടാതെ എന്‍ ഐ എ ക്ക് ഒന്നും ചെയ്യാന്‍ സാധിക്കില്ല എന്നതാണ് നിലവിലെ സ്ഥിതി.