സ്വര്‍ണ കടത്ത് അന്വേഷണം മുറുകുന്നു

സ്വർണക്കടത്തു കേസുമായി ബന്ധപ്പെട്ട് കെ.ടി.റമീസ് ഉൾപ്പെടെ 4 പ്രതികളുടെ വീടുകളിൽ എൻഐഎ സംഘം തെളിവെടുപ്പിനെത്തിയത് പുലർച്ചെ.  പുലർച്ചെ 5.30നാണ് രണ്ടു വാഹനങ്ങളിലായി സംഘം റമീസിന്റെ വീട്ടിലെത്തിയത്. തെളിവെടുപ്പിന് ശേഷം ഒൻപതു മണിയോടെയാണ് ഇവിടെ നിന്ന് മടങ്ങിയത്. പുലർച്ചെ 5.45ന് ഐക്കരപ്പടിയിലെ മുഹമ്മദ് ഷാഫിയുടെ വീട്ടിലെത്തിയ സംഘം മടങ്ങിയത് 7 മണിക്കൂറിനു ശേഷം. വീട്ടിലെ രേഖകളും മറ്റും അന്വേഷണ സംഘം പരിശോധിച്ചു. സിസിടിവി ക്യാമറയിലെ ദൃശ്യങ്ങളും സംഘം പരിശോധിച്ചതായാണു വിവരം. ഷാഫിയുടെ വീട്ടുകാരുമായും സംഘം സംസാരിച്ചു. രാവിലെ പതിനൊന്നരയോടെയാണ് എൻഐഎയുടെ മറ്റൊരു സംഘം റമീസുമായി ഷാഫിയുടെ വീട്ടിലെത്തിയത്. ഷാഫിയും റമീസും തമ്മിലുള്ള ബന്ധം സ്ഥിരീകരിക്കുന്നതിന്റെ ഭാഗമായിട്ടാണ് തെളിവെടുപ്പെന്നാണ് വിവരം. ഉച്ചയ്ക്ക് ഒന്നിനാണു സംഘം മടങ്ങിയത്. കൊണ്ടോട്ടി പൊലീസും സ്ഥലത്തെത്തിയിരുന്നു. രാവിലെ 5നാണ് വേങ്ങര പറമ്പിൽപ്പടി എടക്കണ്ടൻ സൈതലവിയുടെ വീട്ടിലെത്തിയ സംഘം വൈകിട്ട് 4 മണിവരെ പരിശോധന തുടർന്നു. കോഴിച്ചെന പാട്ടത്തൊടി അബ്ദുവിന്റെ വീട്ടിൽ രാവിലെ 6 മണിയോടെയാണ് സംഘം എത്തിയത്. 3 മണിക്കൂറോളം ഇവിടെ പരിശോധന നടത്തി. തെളിവുകൾ ലഭിച്ചതായാണ് വിവരം. മൂന്നംഗ എൻഐഎ സംഘത്തിന് സഹായവുമായി കോട്ടയ്ക്കൽ പൊലീസും സ്ഥലത്തെത്തിയിരുന്നു. കൊച്ചിയിൽ നിന്നുള്ള എൻഐഎ ഉദ്യോഗസ്ഥർ വിവിധ സംഘങ്ങളായാണ് ഏകദേശം ഒരേ സമയം നാലിടത്തും പരിശോധന നടത്തിയത്.