ജനങ്ങളെ ദ്രോഹിച്ചാല്‍ കര്‍ശന നടപടി മാതൃകയായി സര്‍ക്കാര്‍

ജില്ലാ കളക്ടറുടെ ദുരിതാശ്വാസ ഫണ്ട് കൊള്ളയടിച്ച തലസ്ഥാനത്തെ ട്രഷറി തട്ടിപ്പ് കേസിലും വനപാലകരുടെ ക്രൂരപീഡനം ആരോപിക്കപ്പെടുന്ന പത്തനംതിട്ട ചിറ്റാറിലെ കസ്റ്റഡിമരണ കേസിലും ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിച്ച് സര്‍ക്കാര്‍. ഇതിന് മുന്‍പ് കെവിന്‍ കേസിലും സര്‍ക്കാര്‍ കര്‍ശനമായ നടപടികള്‍ സ്വീകരിച്ചിരുന്നു. ഖജനാവിലെ പണം അപഹരിച്ച വഞ്ചിയൂര്‍ സബ് ട്രഷറിയിലെ അക്കൗണ്ട്‌സ് ഓഫീസറായിരുന്ന എം.ആര്‍. ബിജുലാലിനെ കാരണം കാണിക്കല്‍ നോട്ടീസ് പോലും നല്‍കാതെ ഉടന്‍ പ്രാബല്യത്തില്‍ വരുന്ന വിധം പിരിച്ചുവിട്ടു. അതേസമയം, റാന്നി ചിറ്റാറില്‍ ജൂലായ് 28 ന് വനപാലകര്‍ പിടിച്ചു കൊണ്ടുപോയതിനു ശേഷം കിണറ്റില്‍ മരിച്ച നിലയില്‍ കണ്ടെത്തിയ മത്തായിയുടെ മൃതദേഹം സംസ്‌കരിക്കാന്‍ തയ്യാറാകാതെ ഭാര്യ ഷീബയും കുടുംബാംഗങ്ങളും പ്രതിഷേധം തുടരവേ, ചിറ്റാര്‍ ഡെപ്യൂട്ടി റേഞ്ച് ഓഫീസര്‍ ആര്‍. രാജേഷ് കുമാര്‍, സെക്ഷന്‍ ഫോറസ്റ്റ് ഓഫീസര്‍ എ.കെ. പ്രദീപ് കുമാര്‍ എന്നിവരെ വനംവകുപ്പ് സസ്‌പെന്‍ഡ് ചെയ്തു. റാന്നി ഡി.എഫ്.ഒ ഉള്‍പ്പെടെ എട്ടുപേരെ സ്ഥലംമാറ്റിയതിനു പിന്നാലെയാണ് സസ്‌പെന്‍ഷന്‍. വഞ്ചിയൂര്‍ സബ് ട്രഷറിയില്‍ നിന്ന് രണ്ടു കോടി രൂപ തട്ടിയെടുത്ത കേസിലെ പ്രതിയായ സീനിയര്‍ അക്കൗണ്ടന്റ് ബിജുലാലിനെ ആനുകൂല്യങ്ങളൊന്നും നല്‍കാതെ പിരിച്ചുവിട്ടുകൊണ്ടുള്ള ഉത്തരവ് ഉടനിറങ്ങും. തട്ടിപ്പ് കണ്ടുപിടിച്ച വഞ്ചിയൂര്‍ സബ് ട്രഷറി ഓഫീസര്‍ ബാബു പ്രസാദ് ഒഴികെയുള്ള മുഴുവന്‍ ജീവനക്കാരെയുമാണ് സ്ഥലം മാറ്റുന്നത്. ധനവകുപ്പ് സെക്രട്ടറി രാജേഷ്‌കുമാര്‍ സിംഗിന്റെ അന്വേഷണത്തെ തുടര്‍ന്നാണ് ഉടനടി പിരിച്ചുവിടാന്‍ മന്ത്രിയും വകുപ്പു സെക്രട്ടറിയും പങ്കെടുത്ത യോഗം തീരുമാനിച്ചത്. തിരിമറി അന്വേഷിക്കാന്‍ ധനവകുപ്പിലെ മൂന്നു പേരും സര്‍ക്കാരിനുവേണ്ടി സോഫ്റ്റ് വെയറുകള്‍ വികസിപ്പിക്കുന്ന നാഷണല്‍ ഇന്‍ഫോമാറ്റിക് സെന്ററിലെ ഉദ്യോഗസ്ഥനും അടങ്ങിയ സംഘത്തെ നിയോഗിച്ചു. അഞ്ചു ദിവസത്തിനകം റിപ്പോര്‍ട്ട് നല്‍കണം. തലപ്പത്തുള്ളവര്‍ക്ക് വീഴ്ച സംഭവിച്ചെന്നു കണ്ടെത്തിയാല്‍ നടപടിയെടുക്കും. കഴിഞ്ഞ വ്യാഴാഴ്ചയാണ് കളക്ടറുടെ ഫണ്ടില്‍ നിന്ന് രണ്ട് കോടി രൂപ തന്റെ ട്രഷറി അക്കൗണ്ടിലേക്കും അവിടെ നിന്ന് തന്റെയും ഭാര്യയുടെയും മറ്റും അക്കൗണ്ടുകളിലേക്കും ബിജുലാല്‍ മാറ്റിയത്.