കണ്ടെയിന്‍മെന്റ് സോണുകള്‍ കൂടുന്നു

  ബേപ്പൂര്‍ നിയോജക മണ്ഡലത്തിലെ തദ്ദേശ സ്ഥാപനങ്ങള്‍ക്കുകീഴില്‍ 12 കണ്ടെയിന്‍മെന്റ് സോണുകളായി. രാമനാട്ടുകര നഗരസഭ, കടലുണ്ടി പഞ്ചായത്ത് എന്നിവ സമ്പൂര്‍ണമായും കണ്ടെയിന്‍മെന്റ് സോണാണ്. കോര്‍പറേഷന്‍ ചെറുവണ്ണൂര്‍ വെസ്റ്റ് ഡിവിഷന്‍, ഫറോക്ക് നഗരസഭയിലെ പുറ്റെക്കാട്, വടക്കെ ബസാര്‍ പതിനാറാം ഡിവിഷന്‍, രാമനാട്ടുകര ചെറക്കാംകുന്ന് ഒമ്പതാം ഡിവിഷന്‍ എന്നിവയാണ് പുതിയ കണ്ടെയിന്‍മെന്റ് സോണുകള്‍. ഇവിടെപ്രധാന സഞ്ചാരമാര്‍ഗങ്ങളെല്ലാം അടച്ചു. തദ്ദേശ സ്ഥാപനങ്ങള്‍, ആരോഗ്യവിഭാഗം, പൊലീസ്, റവന്യൂ എന്നീ വിഭാഗങ്ങള്‍ പ്രതിരോധം ഊര്‍ജിതമാക്കി.തിങ്കളാഴ്ച മധുരബസാര്‍ - കുണ്ടായിത്തോട് മേജര്‍ സന്ദീപ് ഉണ്ണികൃഷ്ണന്‍ റോഡ് അടച്ചു. ഇതോടെബേപ്പൂര്‍ നടുവട്ടത്തെയും ചെറുവണ്ണൂരിനെയും ബന്ധിപ്പിക്കുന്ന തോണിച്ചിറ റോഡില്‍ ബസ്സോട്ടമുള്‍പ്പെടെ നിലച്ചു. നേരത്തെ ബിസി റോഡ് ചീര്‍പ്പ് പാലത്തില്‍ അടച്ചതിനാല്‍ ഈ റൂട്ടിലും ഗതാഗതം മുടങ്ങിയിരുന്നു.ചെറുവണ്ണൂരില്‍നിന്ന് ബേപ്പൂരിലെത്താന്‍വലിയ വാഹനങ്ങള്‍ മീഞ്ചന്ത വഴി പോകണം. രാമനാട്ടുകര ചെറക്കാംകുന്നിലും ഫറോക്ക് പുറ്റെക്കാട് ഡിവിഷനിലും വഴികളെല്ലാം അടച്ചു. ചെറക്കാംകുന്നില്‍ ജില്ലാ അതിര്‍ത്തിയിലെ പാതയും തടഞ്ഞു. ഫറോക്കില്‍ നഗരസഭയും ആരോഗ്യം, റവന്യു വിഭാഗവും സ്‌ക്വാഡ് പ്രവര്‍ത്തനങ്ങള്‍ വ്യാപിപ്പിച്ചു.