ഇന്ത്യയുടെ ജനസംഖ്യ 2036 ൽ 152.2 കോടി പിന്നിടുമെന്ന് അനുമാനം. 2011 ലെ സെൻസസ് പ്രകാരം 121.1 കോടി. (ഇപ്പോൾ ജനസംഖ്യ 138 കോടിയെന്നാണു കണക്കാക്കപ്പെടുന്നത്.) കേന്ദ്ര ആരോഗ്യമന്ത്രാലയത്തിന്റെ കീഴിലുള്ള ജനസംഖ്യാ കമ്മിഷൻ രൂപീകരിച്ച ജനസംഖ്യ വർധന സംബന്ധിച്ച സാങ്കേതിക സമിതിയുടേതാണ് വിലയിരുത്തൽ. രാജ്യത്തെ ജനസാന്ദ്രത ചതുരശ്ര കിലോമീറ്ററിൽ 463 ആയി വർധിക്കും. 2011 ലെ കണക്കു പ്രകാരം ഇത് 368 ആണ്. ജനങ്ങളുടെ പ്രായഘടനയിലും മാറ്റമുണ്ടാകുമെന്നു സമിതി റിപ്പോർട്ടിൽ പറയുന്നു. ജോലി ചെയ്യാവുന്ന പ്രായപരിധിയിൽ ഉൾപ്പെടുന്നവരുടെ എണ്ണം വർധിക്കും. മുതിർന്നവരുടെ എണ്ണത്തിലും ആനുപാതിക വർധനയുണ്ടാകും. അതുകൊണ്ടുതന്നെ മരണനിരക്കു കൂടും. കുട്ടികളുടെ എണ്ണം കുറയും.2011 ൽ ജനസംഖ്യയുടെ 50.2 % പേരും 24 വയസ്സിനു താഴെയുള്ള ചെറുപ്പക്കാരായിരുന്നുവെങ്കിൽ 2036 ൽ ഇത് 35.3 % ആയി കുറയും. 2036 ലെ പ്രായഘടന ഇങ്ങനെ: ∙ 15 വയസ്സിൽ താഴെയുള്ളവർ: ജനസംഖ്യയുടെ 20 % (2011 ൽ 30.9 %) ∙ 15 – 59 വയസ്സ്: 64.9% (2011 ൽ 60.7%) ∙ 60 വയസ്സിനു മുകളിൽ: 14.9 %. (2011ൽ 8.4%) സംസ്ഥാനങ്ങളിൽ ഡൽഹിയിലാകും ഏറ്റവും കൂടുതൽ വർധന നിരക്ക്. ഹിമാചൽപ്രദേശിൽ ഏറ്റവും കുറവും. 2011– 36 കാലത്തുണ്ടാകുന്ന 31.1 കോടിയുടെ വർധനയിൽ 17 കോടിയും ബിഹാർ, ഉത്തർപ്രദേശ്, മഹാരാഷ്ട്ര, ബംഗാൾ, മധ്യപ്രദേശ് എന്നീ 5 സംസ്ഥാനങ്ങളിലാകും. ഇതിൽ തന്നെ 19% ഉത്തർപ്രദേശിൽ മാത്രമാണ്. കേരളത്തിലെ ജനസംഖ്യ 2036 ൽ 3.69 കോടിയിലെത്തുമെന്നാണ് കമ്മിഷന്റെ നിഗമനം.