ഇതല്ലായിരുന്നു സംഭവിക്കേണ്ടിയിരുന്നത്. ’–ജീത്തു

ദൃശ്യത്തിലെ എല്ലാ രംഗങ്ങളിലെയും കഥാപാത്രങ്ങളുടെ പ്രതികരണങ്ങള്‍ എന്തൊക്കെയെന്ന് തനിക്കറിയാമായിരുന്നെങ്കിലും ഒരേയൊരു രംഗത്തിലേത് മാത്രം ഇന്നത് വേണമെന്ന് തനിക്കറിയില്ലായിരുന്നുവെന്ന് പറയുകയാണ് സംവിധായകന്‍. കോളജ് വിദ്യാര്‍ഥികള്‍ക്കായി കേരള സര്‍ക്കാര്‍ നടപ്പാക്കുന്ന നൈപുണ്യ വികസന പരിപാടിയുടെ ഭാഗമായി ഒരുക്കിയ അഭിമുഖസംഭാഷണത്തിലാണ് ജീത്തു ഇക്കാര്യം വെളിപ്പെടുത്തിയത്. ‘ജോര്‍ജ്ജൂട്ടിയെ കാണാന്‍ വീട്ടില്‍ പൊലീസുകാര്‍ വന്ന് സംസാരിച്ചുകൊണ്ടിരിക്കുന്നതിനിടെയാണ് ആ ഷോട്ട്. ദൃശ്യത്തിലെ എല്ലാ റിയാക്‌ഷന്‍സിനെക്കുറിച്ചും എനിക്ക് വ്യക്തമായ ധാരണയുണ്ട്. പക്ഷേ ഒരു റിയാക്‌ഷനെക്കുറിച്ചു മാത്രം എനിക്ക് അറിയുമായിരുന്നില്ല, അവിടെ എന്താണ് വേണ്ടതെന്ന്.. എനിക്ക് ലാലേട്ടനോട് പറഞ്ഞുകൊടുക്കാനും അറിയില്ല.’ ‘സംഭവം ഇതാണ്, പൊലീസുകാരുടെ ചോദ്യങ്ങള്‍ക്കിടെ റാണി ഇടയ്ക്കുകയറി പറയുന്നുണ്ട്, അതിന് ഓഗസ്റ്റ് രണ്ടിന് ഞങ്ങള്‍ ഇവിടെ ഇല്ലായിരുന്നല്ലോ എന്ന്. അതുകേട്ട് ജോര്‍ജൂട്ടി കസേരയിലേക്ക് ചായുകയാണ്. പുള്ളിക്ക് മനസിലായി ഭാര്യ മണ്ടത്തരമാണ് പറഞ്ഞതെന്നും സംഗതി കൈയില്‍ നിന്ന് പോയെന്നും. എന്നാല്‍ ജോര്‍ജൂട്ടിയുടെ മുഖത്ത് ഞെട്ടല്‍ വരാന്‍ പാടില്ല. ശരിക്കും കഥാപാത്രത്തിന്‍റെ ഉള്ളില്‍ ഒരു പിടച്ചിലാണ്. അത് പുറമെ കാണിക്കാനും പറ്റില്ല. സംസാരിച്ചുകൊണ്ടിരുന്നയാള്‍ പിന്നിലേക്ക് ചാഞ്ഞിട്ട് ഒരു വശത്തേക്ക് നോക്കും കഥാപാത്രം. ആ ഷോട്ട് ഞാന്‍ നേരത്തെ പ്ലാന്‍ ചെയ്തിരുന്നു.’ ‘സംഭാഷണം പറയുന്ന റാണി ഫോക്കസ് ഔട്ടില്‍ ആണ്. ഫോക്കസ് ലാലേട്ടലിനാണ് വച്ചത്. കാരണം എനിക്ക് ആ റിയാക്‌ഷന്‍ ആയിരുന്നു പ്രധാനം. ആക്‌ഷന്‍ പറഞ്ഞപ്പൊ ലാലേട്ടന്‍ എന്തോ ചെയ്തു. അതാണ് അവിടെ വേണ്ടിയിരുന്ന യഥാര്‍ഥ റിയാക്‌ഷന്‍.’– ജീത്തു പറയുന്നു. ‘ദൃശ്യം എല്ലാവരും ഒരു ഫാമിലി ത്രില്ലറാണെന്നാണ് പറയുന്നത്. പക്ഷേ ഞാൻ ഇപ്പോഴും പറയുന്നു. ഇതൊരു ഫാമിലി ഡ്രാമയാണ്. രണ്ട് കുടുംബങ്ങൾ തമ്മിലുള്ള മത്സരം. സ്വന്തം മകളെ സംരക്ഷിക്കാൻ ശ്രമിക്കുന്ന കുടുംബം. സ്വന്തം മകനെ കണ്ടെത്താൻ ശ്രമിക്കുന്ന മറ്റൊരു കുടുംബം. ഇവർ തമ്മിലുള്ള പോരാട്ടമാണ് ഈ സിനിമ. സത്യം പറഞ്ഞാൽ ഈ ഒരു വാക്കുകളിൽ നിന്നാണ് ദൃശ്യത്തിലേയ്ക്ക് ഞാനെത്തുന്നത്. സത്യത്തിൽ ഞാൻ മനസ്സിൽ ഉദ്ദേശിച്ച ആ ഇംപാക്ട് അല്ല തിയറ്ററുകളിലെത്തിയപ്പോൾ എനിക്ക് കിട്ടിയത്. രണ്ട് കുടുംബങ്ങളിൽ ആർക്കൊപ്പം നിൽക്കണമെന്ന ആശങ്ക പ്രേക്ഷകർക്ക് ഉണ്ടായില്ല. അവർ എല്ലാവരും ജോര്‍ജ്ജൂട്ടിയുടെ കൂടെ നിന്നു. നിയമങ്ങൾക്കെല്ലാം അതീതമായി പ്രകൃതിയുടെ ന്യായമുണ്ട്. അതാണ് അവിെട നടന്നത്. പക്ഷേ എന്റെ മനസ്സിൽ ഇതല്ലായിരുന്നു സംഭവിക്കേണ്ടിയിരുന്നത്. ’–ജീത്തു പറഞ്ഞു.