കേരളത്തില്‍ പ്രവാസി വോട്ടിന് മത്‌സരം

  കോവിഡ് -19നെ തുടര്‍ന്ന് കൂട്ടത്തോടെ നാട്ടിലെത്തിയ പ്രവാസികളെ തദ്ദേശ തെരഞ്ഞെടുപ്പിനോടനുബന്ധിച്ചുളള വോട്ടര്‍പട്ടികയില്‍ ചേര്‍ക്കാന്‍ രാഷ്ട്രീയ പാര്‍ട്ടികളുടെ മത്സരം. ഓണ്‍ ലൈന്‍ ആളെ ചേര്‍ക്കല്‍ തുടങ്ങിയതോടെയാണിത്. കഴിഞ്ഞ മേയ് ഏഴു മുതല്‍ ഇന്നലെ വരെ മൂന്നര ലക്ഷത്തിലേറെ പ്രവാസികളാണ് നാട്ടില്‍ മടങ്ങി എത്തിയത്. ഇവരില്‍ ഭൂരിഭാഗം പേര്‍ക്കും വോട്ടര്‍പട്ടികയില്‍ പേരില്ല. കോവിഡ് മൂലം തിരിച്ച് ഗള്‍ഫിലേക്ക് മടക്കം വൈകുമെന്നതിനാല്‍ വരാനിരിക്കുന്ന തദ്ദേശ തെരഞ്ഞെടുപ്പില്‍ വോട്ടുറപ്പിക്കാനാണ് രാഷ്ട്രീയ പാര്‍ട്ടികള്‍ കച്ചക്കെട്ടിയിരിക്കുന്നത്. തദ്ദേശ സ്ഥാപനങ്ങളിലേക്ക് ഒക്ടോബര്‍, നവംബര്‍ മാസങ്ങളില്‍ നടത്താനിരിക്കുന്ന തെരഞ്ഞെടുപ്പിലേക്കുളള വോട്ടര്‍പട്ടിക പുതുക്കുന്ന നടപടികളാണ് ആരംഭിച്ചത്. ഈ മാസം 26 വരെയുളള ദിവസങ്ങളിലാണ് വോട്ടര്‍പട്ടികയില്‍ പേര് ചേര്‍ക്കാനും, ആവശ്യമായ ഭേതഗതികള്‍ വരുത്താനും അനുമതി നല്‍കിയിരിക്കുന്നത്. സെപ്റ്റംബര്‍ 23ന് വിചാരണ പൂര്‍ത്തിയാക്കി സെപ്തംബര്‍ 26ന് അന്തിമ വോട്ടര്‍പട്ടിക പ്രസിദ്ധീകരിക്കും. പൂര്‍ണമായും ഓണ്‍ലൈനിലാണ് പേരു ചേര്‍ക്കല്‍ നടപടികള്‍ ആരംഭിക്കുന്നത്. തെരഞ്ഞെടുപ്പ് കമ്മീഷന്റെ വെബ്‌സൈറ്റില്‍ ഫോട്ടോ, പേര്, മേല്‍വിലാസം, വീട്ട്‌നന്പര്‍, ജനനതീയതി, മൊബൈല്‍ നന്പര്‍, അടുത്ത ബന്ധുവിന്റെ വോട്ടര്‍പട്ടികയിലെ സീരിയല്‍ നന്പര്‍, ബൂത്ത് നന്പര്‍ എന്നിവ ചേര്‍ത്ത് നല്‍കിയാല്‍ വോട്ടര്‍പട്ടികയില്‍ ഇടം പിടിക്കും. കോവിഡിനെ തുടര്‍ന്ന് നാട്ടില്‍ തിരിച്ചെത്തിയ പ്രവാസികളെ പരമാവധി വോട്ടര്‍ പട്ടികയില്‍ ഉള്‍പ്പെടുത്താനാണ് പാര്‍ട്ടികള്‍ ശ്രമിക്കുന്നത്. മടങ്ങിയെത്തിയവരുടെ വിവരങ്ങളും ശേഖരിച്ച് പ്രാദേശിക തലത്തില്‍ പാര്‍ട്ടികള്‍ മല്‍സരിക്കുകയാണ്. വര്‍ഷങ്ങളായി കുടുംബത്തോടൊപ്പം കഴിയുന്നവരാണ് മടങ്ങിയെത്തിയവരില്‍ പലരും. തദ്ദേശ തെരഞ്ഞെടുപ്പില്‍ സ്ഥാനാര്‍ഥികളുടെ വിജയ-പരാജയങ്ങള്‍ നിര്‍ണയിക്കുന്നത് ചെറിയ വോട്ടുകളുടെ വ്യത്യാസത്തിലാണ്. ആയതിനാല്‍ തന്നെ വോട്ടര്‍ പട്ടികയില്‍ ഒരാളെ അധികം ചേര്‍ക്കാനാണ് പാര്‍ട്ടികള്‍ മല്‍സരിക്കുന്നത്.