ചരക്ക്‌ സേവന നികുതി നഷ്ടപരിഹാര പ്രശ്‌നത്തിൽ ജിഎസ്‌ടി കൗൺസിലിൽ സമാവായമായില്ല. കേന്ദ്ര സർക്കാർ രണ്ട്‌ നിർദേശം സംസ്ഥാനങ്ങൾക്കു മുമ്പിൽ വച്ചതായി യോഗശേഷം മന്ത്രി ടി എം തോമസ്‌ ഐസക്‌ വാർത്താ സമ്മേളനത്തിൽ അറിയിച്ചു. ഇവ സംബന്ധിച്ച്‌ ഏഴു ദിവസത്തിനകം അഭിപ്രായം അറിയിക്കണമെന്ന കേന്ദ്ര ധനമന്ത്രിയുടെ നിർദേശത്തിന്റെ അടിസ്ഥാനത്തിൽ യോഗം അവസാനിപ്പിച്ചു. ജിഎസ്ടി നഷ്ടപരിഹാരം പൂർണമായി അനുവദിക്കണമെന്ന് ഏതാണ്ട് എല്ലാ സംസ്ഥാനങ്ങളും ആവശ്യപ്പെട്ടു. ജിഎസ്ടി വരുമാന നഷ്ടത്തെ രണ്ടായി കാണണമെന്നായിരുന്നു‌ കേന്ദ്ര റവന്യു സെക്രട്ടറിയുടെ നിർദേശം. സാധാരണഗതിയിൽ കാര്യങ്ങൾ നടന്നിരുന്നെങ്കിൽ ഉണ്ടാകാവുന്ന നഷ്ടം, കോവിഡുമൂലമുണ്ടായ നഷ്ടം എന്നിങ്ങനെ വേർതിരിക്കണം. ഈ വേർതിരിവിനെ കേരളം എതിർത്തു. അറ്റോർണി ജനറൽ നൽകിയ നിയമോപദേശത്തിൽ ഈ വേർതിരിവില്ല. ചർച്ചകളുടെ അവസാനം രണ്ട് നിർദേശമാണ്‌ കേന്ദ്രം മുന്നോട്ടുവച്ചത്‌. കോവിഡുമൂലമുണ്ടായ വരുമാന നഷ്ടവും ജിഎസ്ടി നടപ്പായതുമൂലമുള്ള വരുമാന നഷ്ടവും രണ്ടായിക്കണ്ട്, ഇതിൽ ജിഎസ്ടി നടപ്പാക്കിയതുകൊണ്ടുള്ള വരുമാന നഷ്ടം നികത്താൻ കേന്ദ്രം കടമെടുക്കും. കോവിഡുമൂലമുണ്ടായ വരുമാന നഷ്ടം നികത്താൻ സംസ്ഥാനങ്ങൾ കടമെടുക്കണം. ഇതിന്‌ കടമെടുപ്പ്‌ പരിധി അരശതമാനം ഉയർത്തും. ഈ വർഷത്തെ നഷ്ടപരിഹാര സെസ് വരുമാനം കിഴിച്ച്, സംസ്ഥാനങ്ങൾക്ക്‌ നൽകേണ്ട ബാക്കി നഷ്ടപരിഹാരത്തുക ഏകദേശം 2.30 ലക്ഷം കോടി രൂപയോളം വരും. ഇതിൽ പകുതിയോളം സംസ്ഥാനങ്ങൾ കടമെടുക്കേണ്ടിവരും. ഈ വർഷത്തെ നഷ്ടപരിഹാരത്തിനുള്ള തുക പൂർണമായും സംസ്ഥാനങ്ങൾ കടമെടുക്കുന്നതിന് റിസർവ്‌ ബാങ്കുമായി കേന്ദ്രം നേരിട്ട് ഇടപെട്ട് സഹായം നൽകുമെന്നതായിരുന്നു രണ്ടാമത്തെ നിർദേശം. ഇത്‌ സംസ്ഥാനങ്ങളുടെ കടമെടുപ്പ് പരിധിയെ എങ്ങനെ ബാധിക്കുമെന്ന്‌ കേന്ദ്രം വ്യക്തമാക്കിയിട്ടില്ല. രണ്ട് നിർദേശത്തിലും തിരിച്ചടവ് സെസ് നിധിയിൽനിന്നായിരിക്കും. ഇതിനായി സെസ് പിരിവ് കാലാവധി ഏതാനും വർഷംകൂടി ഉയർത്തും. ഇവയിലെ തീരുമാനം കേന്ദ്രം സംസ്ഥാനങ്ങളെ അറിയിക്കും.കേന്ദ്രം വച്ചിട്ടുള്ള നിർദേശങ്ങൾ സംസ്ഥാനം ചർച്ച ചെയ്‌ത്‌ അഭിപ്രായം അറിയിക്കും. ഇക്കാര്യങ്ങളിൽ അഭിപ്രായ ഐക്യ രൂപീകരണത്തിനായി കോൺഗ്രസ്‌ ഭരണത്തിലുള്ള സംസ്ഥാനങ്ങളുടെയടക്കം കൂട്ടായ്‌മയ്‌ക്ക്‌ ശ്രമിക്കുമെന്നും ധനമന്ത്രി പറഞ്ഞു.