കൊച്ചിയില്‍ പുതിയലോകം തുറക്കാന്‍ ഗിഫ്റ്റ് സിറ്റി

കൊച്ചി – ബെംഗളൂരു വ്യവസായ ഇടനാഴിയുടെ ഭാഗമായി രാജ്യാന്തര വിമാനത്താവളത്തിനു സമീപം 1,600 കോടി രൂപ നിക്ഷേപത്തിൽ കൊച്ചി ഗ്ലോബൽ ഇൻഡസ്ട്രിയൽ ഫിനാൻസ് ആൻഡ് ട്രേഡ് (ഗിഫ്റ്റ്) സിറ്റി നിർമിക്കുന്നു. 220 ഹെക്ടറിൽ നിർമിക്കുന്ന ഗിഫ്റ്റ് സിറ്റിയിൽ 10 വർഷത്തിനകം 18,000 കോടി രൂപയുടെ വരെ നിക്ഷേപവും 1.20 ലക്ഷം പേർക്കു നേരിട്ടു തൊഴിലും ലഭിക്കും. സിംഗപ്പൂർ, ഹോങ്കോങ്, ടോക്കിയോ നഗരങ്ങളുടെ മാതൃകയിൽ രാജ്യാന്തര പ്രശസ്തമായ ബിസിനസ്, ഇൻഷുറൻസ്, നിയമ, ഓഹരി സ്ഥാപനങ്ങളുടെ മേഖലാ ആസ്ഥാനമായി കൊച്ചിയെ മാറ്റുകയാണു ലക്ഷ്യമെന്ന് കേരള സ്പെഷൽ പ്രോജക്ട്സ് നോഡൽ ഓഫിസറും വ്യവസായ ഇടനാഴി പ്രോജക്ട് ഓഫിസറും കൂടിയായ അഡീഷനൽ ചീഫ് സെക്രട്ടറി അൽകേഷ്കുമാർ ശർമ പറഞ്ഞു. വൻകിട ഹോട്ടലുകളും സെന്റർ ഓഫ് എക്സലൻസ് നിലവാരത്തിലുള്ള വിദ്യാഭ്യാസ സ്ഥാപനങ്ങളും ഉണ്ടാകും. കേന്ദ്ര, സംസ്ഥാന സർക്കാരുകളുടെ പങ്കാളിത്തത്തോടെ സ്വകാര്യ നിക്ഷേപത്തിലാകും പദ്ധതി. പരോക്ഷമായി 3.6 ലക്ഷം പേർക്കു തൊഴിൽ ലഭിക്കും. സ്ഥലം ഏറ്റെടുക്കാൻ സംസ്ഥാന സർക്കാർ 540 കോടി രൂപ അനുവദിച്ചു. പദ്ധതിക്കു ഭരണാനുമതി നൽകി. സംസ്ഥാന സർക്കാരിന്റെ ഓഹരി പങ്കാളിത്തം ഇതാണ്. റോഡ്, വൈദ്യുതി, കണക്ടിവിറ്റി ഉൾപ്പെടെ എല്ലാ അടിസ്ഥാന സൗകര്യങ്ങളും ഒരുക്കേണ്ടതു കേന്ദ്ര സർക്കാരിന്റെ ചുമതലയാണ്. ഇതിനും അപ്പുറമുള്ള നിർമാണത്തിലാകും സ്വകാര്യ പങ്കാളിത്തം. ഓഫിസ് തുടങ്ങാൻ ആഗ്രഹിക്കുന്ന സ്ഥാപനങ്ങൾക്കു ഒരു മാസം പോലും കാത്തിരിക്കാതെ പ്രവർത്തനം തുടങ്ങാൻ കഴിയും വിധം ‘ വോക് ടു വർക് ’ രീതിയാകും ഗിഫ്റ്റ് സിറ്റിയിൽ എന്ന് അൽകേഷ്കുമാർ ശർമ പറഞ്ഞു.