ജോസ് കെ മാണിക്ക് പ്രിയം ഇടതുമുന്നണി

സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പിന്നാലെ കേരള കോണ്‍ഗ്രസ് എമ്മിനെ പരസ്യമായി പിന്തുണച്ച് മുഖ്യമന്ത്രി പിണറായി വിജയനും എത്തിയതോടെ ഇന്ന് ചേരുന്ന കേരള കോണ്‍ഗ്രസ്എം സ്റ്റിയറിംഗ് കമ്മറ്റി യോഗം രാഷ്ട്രീയ നിലപാട് സംബന്ധിച്ച വ്യക്തമായ തീരുമാനത്തിലേക്ക് നീങ്ങും. കഴിഞ്ഞ മൂന്നു ദിവസമായി ഡല്‍ഹിയിലുളള ജോസ് കെ മാണി എംപി നാട്ടിലേക്ക് തിരിച്ചു. കുട്ടനാട് തെരഞ്ഞെടുപ്പില്‍ സ്ഥാനാര്‍ഥിയെ നിര്‍ത്തുന്ന കാര്യം ചര്‍ച്ച ചെയ്യാനാണ് സ്റ്റിയറിംഗ് കമ്മിറ്റി യോഗം ചേരുന്നതെങ്കിലും മുന്നണി പ്രവേശം തന്നെയാണ് പ്രധാന വിഷയം. ഒപ്പം രാജ്യസഭാ തിരഞ്ഞെടുപ്പില്‍ വിപ്പ് ലംഘനം നടത്തിയ പി ജെ ജോസഫ് അടക്കമുള്ള നേതാക്കള്‍ക്കെതിരെ അയോഗ്യത നീക്കം നടത്താനും യോഗം തീരുമാനിക്കും. ഇന്ന് കോട്ടയത്തെ പാര്‍ട്ടി സംസ്ഥാന കമ്മിറ്റി ഓഫീസില്‍ നടക്കുന്ന യോഗത്തില്‍ കഴിയുന്നത്ര സ്റ്റിയറിംഗ് കമ്മറ്റി അംഗങ്ങള്‍ നേരിട്ട് തന്നെ പങ്കെടുക്കണമെന്ന് ജോസ് കെ മാണി ആവശ്യപ്പെട്ടിട്ടുണ്ട്. കുറച്ചു പ്രതിനിധികളെ ഓണ്‍ലൈനായി പങ്കെടുപ്പിക്കാനായിരുന്നു ആദ്യ തീരുമാനം. ഇത് യോഗം നിര്‍ണായകമാണെന്ന സൂചന നല്‍കുന്നുണ്ട്. പാര്‍ട്ടി ചെയര്‍മാനും ജനറല്‍ സെക്രട്ടറിയും ഉള്‍പ്പടെ 69 പേരാണ് സമിതിയിലുളളത്. യോഗം തീരുമാനം എടുക്കുകയോ അതില്‍ അന്തിമ തീരുമാനത്തിനും ചര്‍ച്ചകള്‍ക്കുമായി നേതാക്കളെ ചുമതലപ്പെടുത്തുകയോ ചെയ്യാം. നിലവില്‍ പി.ജെ ജോസഫ് വിഭാഗത്തിലുള്ള സിഎഫ് തോമസ് അടക്കമുളള നേതാക്കളും യോഗത്തിനെത്താനുളള സാധ്യതയും തള്ളിക്കളയാനാവില്ല. പിണറായിയും കോടിയേരിയും നിലപാട് വ്യക്തമാക്കിയതോടെ നിലവില്‍ ഇടതുമുന്നണിയിലേക്കുളള ചവിട്ടുപടികള്‍ കയറാന്‍ കേരള കോണ്‍ഗ്രസ് എമ്മിന് ദൃഢതയുള്ള കൈവരി ലഭിച്ചിട്ടുണ്ട്. കുട്ടനാട്, ചവറ ഉപതെരഞ്ഞെടുപ്പുകളും തദ്ദേശ സ്വയംഭരണ തെരഞ്ഞെടുപ്പും സമീപിക്കുന്ന സാഹചര്യത്തില്‍ യുഡിഎഫിനെ ദുര്‍ബലമാക്കാനുളള ഒരവസരവും ഇടതുമുന്നണി പാഴാക്കില്ല. മുന്നണിയുടെ ആരംഭം മുതലുളള കക്ഷിയെ തെരഞ്ഞെടുപ്പ് വര്‍ഷത്തില്‍ എല്‍ഡിഎഫിലെത്തിച്ചാല്‍ അത് യുഡിഎഫിന് പ്രഹരമാകുമെന്ന് തന്നെയാണ് ഇടതു കണക്കുകൂട്ടല്‍.