ഡല്‍ഹിയില്‍ വിലയില്ല നാട്ടിലേക്ക് മടങ്ങാന്‍ കോണ്‍ഗ്രസ് എം പി മാര്‍

ഡല്‍ഹി രാഷ്ട്രീയത്തില്‍ നിറഞ്ഞാടാന്‍ വിമാനം കയറിയ കോണ്‍ഗ്രസ് എംപി മാര്‍ തിരികെ സംസ്ഥാന രാഷ്്ട്രീയത്തില്‍ മടങ്ങിയെത്താന്‍ കോപ്പു കൂട്ടുന്നു. എ ഐ സിസിയില്‍ ഒരു പരിഗണനയും കിട്ടാത്തതാണ് മടക്കത്തിന് പ്രധാനകാരണം ഇപ്പോള്‍ തിരിച്ചെത്തിയില്ലങ്കില്‍ യുവജനങ്ങള്‍തങ്ങളുടെ സ്ഥാനം കയ്യടക്കും എന്ന ഭീതിയും ഇതിനു പിന്നിലുണ്ട്. മൂന്ന് നേതാക്കളാണ് ഈ നീക്കം നടത്തുന്നത്. നിയമസഭാ തെരഞ്ഞെടുപ്പു ലക്ഷ്യം വെച്ച് കേരളത്തിലേക്ക് മടങ്ങാന്‍ തയ്യാറെടുക്കുന്നത് കെ സുധാകരന്‍, അടൂര്‍ പ്രകാശ്, കെ. മുരളീധരന്‍ തുടങ്ങിയ നേതാക്കളാണ്. സംസ്ഥാന രാഷ്ട്രീയത്തിലേക്ക് മടങ്ങുന്നത് സംബന്ധിച്ച് കെ. സുധാകരന്‍ കോണ്‍ഗ്രസ് നേതൃത്വത്തോട് താത്പര്യം പ്രകടിപ്പിച്ചതായാണ് അറിയുന്നത്. കെ. മുരളീധരനും അടൂര്‍ പ്രകാശും ഇതേ കാര്യം ചൂണ്ടിക്കാട്ടി കേന്ദ്ര നേതൃത്വത്തെ സമീപിച്ചു . കോന്നി മണ്ഡലം തിരിച്ചു പിടിക്കാന്‍ തന്റെ സാന്നിധ്യം അനിവാര്യമാണെന്നാണ് അടൂര്‍ പ്രകാശ് പറയുന്നത്. സമാനമായ കാര്യമാണ് വട്ടിയൂര്‍ക്കാവിന്റെ കാര്യത്തില്‍ കെ മുരളീധരന്‍ ചൂണ്ടിക്കാട്ടുന്നത്. ഇതിന് പിന്നണിയില്‍ പ്രവര്‍ത്തിക്കുന്നത് കെവി തോമസാണ്. കേരളത്തില്‍ കൂടുതല്‍ സീറ്റുകള്‍ നേടണമെങ്കില്‍ മുതിര്‍ന്ന നേതാക്കള്‍ കേരളത്തിലേക്ക് മടങ്ങിയെത്തണമെന്ന് കെ.വി തോമസ് കേന്ദ്ര നേതൃത്വത്തെ അറിയിക്കുകകയും ചെയ്തിട്ടുണ്ട്. കെ. മുരളീധരന്‍ വട്ടിയൂര്‍കാവിലും അടൂര്‍ പ്രകാശ് കോന്നിയിലും ശ്രദ്ധ കേന്ദ്രീകരിച്ചുകൊണ്ടുള്ള പ്രവര്‍ത്തനങ്ങള്‍ ആരംഭിച്ചിട്ടുണ്ട്. സുധാകരന്‍ സംസ്ഥാന കോണ്‍ഗ്രസിലേക്ക് മടങ്ങാനുള്ള അവസരം തരണമെന്ന് അദ്ദേഹം ആവശ്യപ്പെട്ടാല്‍ ഹൈക്കമാന്‍ഡ് അത് നിരാകരിക്കില്ലെന്നാണ് സൂചന. എംപിമാര്‍ ഒഴിയുന്ന മണ്ഡലങ്ങളില്‍ ഉപതെരഞ്ഞെടുപ്പ് നടന്നാലും അവിടെ വിജയിക്കാനുള്ള സാധ്യതയുണ്ടെന്നും കോണ്‍ഗ്രസിന് തന്നെ സീറ്റുകളില്‍ തിരികെയത്താനുള്ള സാഹചര്യം ഉണ്ടാകുമെന്നും കേന്ദ്രനേതൃത്വത്തെ നേതാക്കള്‍ അറിയിച്ചിട്ടുണ്ടെന്ന തരത്തിലും റിപ്പോര്‍ട്ടുകള്‍ പുറത്തുവരുന്നുണ്ട്. തദ്ദേശ സ്വയംഭരണ തെരഞ്ഞെടുപ്പ് കഴിയുമ്പോള്‍ മുതല്‍ നിയമസഭാ തെരഞ്ഞെടുപ്പിന് യുഡിഎഫ് തയ്യാറെടുക്കും. അപ്പോഴേ ആരൊക്കെ മത്സര രംഗത്ത് ഉണ്ടാവണം എന്ന കാര്യത്തില്‍ തീരുമാനം എടുക്കൂ. ബീഹാറില്‍ ശക്തമായ സാന്നിധ്യമായി മാറുക, ബംഗാളില്‍ ഇടതിനൊപ്പം ചേര്‍ന്ന് കൂടുതല്‍ സീറ്റ് നേടുക. കേരളത്തിലും അസമിലും ഭരണം തിരിച്ചുപിടിക്കുക, തമിഴ്നാടില്‍ മികച്ച പോരാട്ടം കാഴ്ചവെക്കുക എന്നിങ്ങനെയുള്ള തന്ത്രങ്ങളാണ് കോണ്‍ഗ്രസ് ദേശീയ തലത്തില്‍ ആവിഷ്‌ക്കരിക്കുന്നത്. സംസ്ഥാനങ്ങളില്‍ കൂടുതല്‍ ആധിപത്യം ഉണ്ടായാല്‍ നേട്ടങ്ങള്‍ ഉണ്ടാകുമെന്ന കണക്കുകൂട്ടലിലാണ് കേന്ദ്രനേതൃത്വം അതുകൊണ്ട് തന്നെ ഈ ഘട്ടത്തില്‍ എംപിമാര്‍ ഉയര്‍ത്തുന്ന ആവശ്യം കേന്ദ്രനേതൃത്വം തള്ളില്ലെന്നാണ് നേതാക്കളുടെ കണക്കുകൂട്ടല്‍.