എം എല്‍ എ പിരിച്ച പണം സ്വര്‍ണകടത്തിനോ

ഫാഷന്‍ ഗോള്‍ഡ് കമ്പനി തകര്‍ന്നിട്ടും നിക്ഷേപം സ്വീകരിച്ചെത് സ്വര്‍ണ കടത്തിനോ എന്ന സംശയം ഉയരുന്നു. വടക്കന്‍ കേരളത്തില്‍ നിന്ന് വിവിധ ജുവല്ലറി കമ്പനികളുടെ പേരില്‍ സ്വര്‍ണകടത്തിനായി പണം പിരിച്ചിരുന്നു എന്ന വിവരം തിരുവനന്തപുരം സ്വര്‍ണ കടത്ത് അന്വേഷിക്കുന്ന സംഘത്തിന് സൂചന ലഭിച്ചിരുന്നു. അത്തരത്തിലുള്ള നീക്കങ്ങള്‍ ഇതില്‍ പരിശോധിക്കുകയാണ് പൊലീസ് . കാരണം കമ്പനി തകര്‍ന്നതിനുശേഷം കോടിക്കണക്കിന് രൂപ ഇവര്‍ പിരിച്ചിരുന്നു ഈ പണം എവിടെ നിക്ഷേപിച്ചു എന്ന് വ്യക്തമാക്കിയിട്ടില്ല. സ്വര്‍ണകടത്തുണ്ടോ എന്ന് അന്വേഷണിക്കണമെന്ന് പരാതിക്കാര്‍ പൊലിസീനോട് ആവശ്യപ്പെട്ടിട്ടുണ്ട്. എംഎല്‍എയും മുസ്ലിം ലീഗ് നേതാവുമായ എം.സി.കമറുദ്ദീനും പൂക്കോയ തങ്ങളും നിക്ഷേപ സമാഹരണത്തിനു നേതൃത്വം നല്‍കിയത് വിശ്വാസ്യത നല്‍കിയതായും നിക്ഷേപകര്‍ പറയുന്നു. ഫാഷന്‍ ഗോള്‍ഡ് നിക്ഷേപ തട്ടിപ്പ് കേസ് ക്രൈംബ്രാഞ്ച് ഏറ്റെടുത്തതോടെയാണ് കൂടുതല്‍ പരാതികളുമായി നിക്ഷേപകര്‍ രംഗത്തെത്തിയത്. 2017 മുതല്‍ കമ്പനി തകര്‍ന്നിട്ടും പല തവണകളായി തന്റെ കൈയില്‍നിന്ന് പത്ത് ലക്ഷം നിക്ഷേപം വാങ്ങിയെന്നും കമറുദ്ദീനും തങ്ങളുമാണ് നേതൃത്വം നല്‍കിയതെന്നും നിക്ഷേപിച്ച അഞ്ചു ലക്ഷം രൂപയ്ക്കായി ഒരു വര്‍ഷമായി നടക്കുന്നുവെന്നും ചെറുവത്തൂരിലെ വീട്ടമ്മ പറയുന്നു. അതേസമയം, തളര്‍ന്നു പോയ ബിസിനസ് തിരിച്ചുപിടിക്കാനാണ് കൂടുതല്‍ നിക്ഷേപം സ്വീകരിച്ചതെന്ന് ഫാഷന്‍ ഗോള്‍ഡ് ഉടമകള്‍ പറയുന്നത് പക്ഷെ ഇത് വിശ്വസിപ്പിക്കുന്നതിനുള്ള തെളിവുകള്‍ നല്‍കാന്‍ ഇവര്‍ക്ക് സാധിച്ചിട്ടില്ല.