ഇന്ത്യ ‐ ചൈന വിദേശമന്ത്രിമാർ ചർച്ച നടത്തി;

ഷാങ്‌ഹായ സഹകരണ സംഘടനാ(എസ്‌സിഒ) വിദേശമന്ത്രിമാരുടെ സമ്മേളനത്തിനിടെ ഇന്ത്യൻ വിദേശമന്ത്രി എസ്‌ ജയശങ്കർ ചൈനയുടെ വിദേശമന്ത്രി വാങ്‌ യീയുമായി ചർച്ച നടത്തി. കിഴക്കൻ ലഡാക്കിലെ യഥാർഥ നിയന്ത്രണരേഖയിൽ ഇരുരാജ്യങ്ങളും തമ്മിലുള്ള സംഘർഷത്തിന്റെ അന്തരീക്ഷത്തിൽ നടന്ന ചർച്ചയുടെ വിശദാംശങ്ങൾ അറിവായിട്ടില്ല. എങ്കിലും സേന പിൻമാറ്റം വേഗത്തിൽ വേണമെന്ന് ചർച്ചയിൽ ധാരണയായതായി പറയുന്നു. സ്ഥിതി സങ്കീർണ്ണമാക്കുന്ന നടപടി പരസ്പരം ഒഴിവാക്കുകയും ഒപ്പം സേനകൾ തമ്മിൽ ചർച്ച തുടരാനും ധാരണയായി. എസ്‌സിഒയ്‌ക്കിടെ റഷ്യ, ഇന്ത്യ, ചൈന(ആർഐസി) വിദേശമന്ത്രിമാർ തമ്മിലുള്ള ത്രിരാഷ്‌ട്ര ചർച്ചയ്‌ക്ക്‌ ശേഷമായിരുന്നു ജയശങ്കർ–-വാങ്‌ ചർച്ച. ആതിഥേയനായ റഷ്യൻ വിദേശമന്ത്രി സെറജി ലാവ്‌റോവ്‌, ചൈനയുടെ വിദേശമന്ത്രി വാങ്‌ യീ എന്നിവരോടൊപ്പമുള്ള ചിത്രം വിദേശമന്ത്രി എസ്‌ ജയശങ്കർ ട്വീറ്റ്‌ ചെയ്‌തു. ആർഐസി പ്രക്രിയയുടെ അധ്യക്ഷസ്ഥാനം ഇന്ത്യ ഏറ്റെടുത്തതായും ട്വീറ്റിൽ ജയശങ്കർ അറിയിച്ചു. ഇന്ത്യയും ചൈനയും തമ്മിൽ സംഘർഷത്തിന്റെ അന്തരീക്ഷത്തിലായിരുന്നു കൂടിക്കാഴ്‌ച. ആർഐസി ചട്ടക്കൂട്‌ അനുസരിച്ച്‌ മൂന്ന്‌ രാജ്യത്തിന്റെയും വിദേശമന്ത്രിമാർ തമ്മിലുള്ള കൂടിക്കാഴ്‌ച പതിവാണ്‌. ഉഭയകക്ഷി പ്രശ്‌നങ്ങളും മേഖലാ വിഷയങ്ങളും പൊതു താൽപ്പര്യമുള്ള അന്താരാഷ്‌ട്ര വിഷയങ്ങളുമാണ്‌ ചർച്ച ചെയ്യുക. ദ്വിദിന എസ്‌സിഒ യോഗം ബുധനാഴ്‌ചയാണ്‌ ആരംഭിച്ചത്‌. റഷ്യൻ പ്രസിഡന്റ്‌ വ്‌ളാദിമിർ പുടിൻ വീഡിയോ കോൺഫറൻസിലൂടെ സംസാരിച്ചു. ഉസ്‌ബെക്കിസ്ഥാൻ വിദേശമന്ത്രി അബ്ദുലസീസ്‌ കാമിലോവ്‌, കസഖ്‌സ്ഥാൻ വിദേശമന്ത്രി മുക്താർ തില്യൂബെർദി എന്നിവരുമായും ജയശങ്കർ വ്യാഴാഴ്‌ച ചർച്ച നടത്തി. ബുധനാഴ്‌ച താജിക്കിസ്ഥാൻ വിദേശമന്ത്രി സിറോജുദ്ദീൻ മുഹ്‌റിദ്ദീൻ, കിർഗിസ്ഥാൻ വിദേശമന്ത്രി ചിംഗിസ്‌ ഐദർബെക്കൊവ്‌ എന്നിവരുമായി ജയശങ്കർ ചർച്ച നടത്തിയിരുന്നു.