നേതാവില്ലാതെ കോണ്‍ഗ്രസ് എന്തു ചെയ്യണമെന്ന് അറിയാതെ എം പി മാര്‍

കര്‍ഷക ദ്രോഹ ബില്ലുകളില്‍ പ്രതിഷേധം പുകയുമ്പോള്‍ പാര്‍ലമെന്റിനകത്ത് എന്തു ചെയ്യണം എന്നറിയാതെ വലയുന്നു കോണ്‍ഗ്രസ്. എല്ലാ എം പി മാരെയും ഒന്നിച്ചു നിര്‍ത്തി സംസാരിക്കാന്‍ പോലും ആരും പാര്‍ട്ടിക്കില്ല എന്നതാണ് നിലവിലെ സ്ഥിതി. കോണ്‍ഗ്രസ് അംഗങ്ങള്‍ കാര്‍ഷികബില്ലുകള്‍ക്കെതിരെ കാര്യമായ ശബ്ദമുയര്‍ത്തിയില്ല. വോട്ടെടുപ്പ് വേണമെന്ന് പേരിനു ആവശ്യപ്പെട്ടുവെങ്കിലും ചെയര്‍ ശബ്ദവോട്ടോടെ ബില്ലുകള്‍ പാസാക്കിയപ്പോള്‍ പ്രതികരിച്ചില്ല. പ്രതിപക്ഷത്തെ ഏകോപിപ്പിച്ച് പ്രതിരോധിക്കുന്നതിലും വീഴ്ച വരുത്തി. സോണിയഗാന്ധിയും രാഹുല്‍ഗാന്ധിയും ചൊവ്വാഴ്ചയാണ് അമേരിക്കയില്‍ നിന്ന് മടങ്ങിയെത്തിയത്. സോണിയയുടെ വൈദ്യപരിശോധനക്കാണ് ഇത്തവണത്തെ യാത്രയെങ്കിലും പാര്‍ലമെന്റ് സമ്മേളിക്കുമ്പോഴെല്ലാം രാഹുല്‍ രാജ്യം വിടുന്നത് പതിവാണ്. കോണ്‍ഗ്രസ് ലോക്സഭ കക്ഷിനേതാവ് അധീര്‍ രഞ്ജന്‍ ചൗധരിയാകട്ടെ ഒറ്റയാനെപ്പോലെയാണ് പ്രവര്‍ത്തിക്കുക. ഇതേച്ചൊല്ലി മനീഷ് തിവാരിയും കേരളത്തില്‍നിന്നുള്ള ചില അംഗങ്ങളും പരിഭവത്തിലാണ്. അധീര്‍ രഞ്ജനെ ഈയിടെ ബംഗാള്‍ പിസിസി അധ്യക്ഷനായും നിയമിച്ചു. കക്ഷിനേതാവ് സ്ഥാനം മറ്റാര്‍ക്കെങ്കിലും നല്‍കുമെന്ന് ധാരണ ഉണ്ടായെങ്കിലും തീരുമാനം എടുക്കാനായിട്ടില്ല. അധീര്‍ രഞ്ജന്റെ പരാമര്‍ശങ്ങള്‍ പലതവണ സഭയില്‍ കോണ്‍ഗ്രസിനെ വെട്ടിലാക്കിയിട്ടുണ്ട്. സഭയില്‍ സ്വീകരിക്കേണ്ട നിലപാടുകളുടെ കാര്യത്തില്‍ പ്രതിപക്ഷകക്ഷികളുമായി കൂടിയാലോചന നടത്താനും കോണ്‍ഗ്രസ് മടിക്കുന്നു. കേരളത്തില്‍നിന്നുള്ള കോണ്‍ഗ്രസ് അംഗങ്ങളുടെ ശ്രദ്ധ സംസ്ഥാന സര്‍ക്കാരിനെതിരെ ആക്ഷേപങ്ങള്‍ ചൊരിയുന്നതിലാണ്. ശൂന്യവേളയും ചോദ്യോത്തരങ്ങളും ഇതിനായാണ് വിനിയോഗിക്കുന്നത്. ഇതിന്റെ സ്വാഭാവികപരിണാമമാണ് കാര്‍ഷികബില്ലുകളുടെ കാര്യത്തില്‍ സംഭവിച്ചത്. ചര്‍ച്ചയില്‍ പങ്കെടുത്തതല്ലാതെ ഫലപ്രദമായ പ്രതിരോധമുയര്‍ത്താന്‍ കോണ്‍ഗ്രസിനായില്ല.