ഭക്ഷ്യകിറ്റ് വിതരണം കേരളം നംബര്‍ വണ്‍

സൗജന്യമായി കൊവിഡ് ചികിത്‌സ നല്‍കുന്നതിനു പിന്നാലെ കൊവിഡ് കാലത്ത് നാട്ടിലെ പട്ടിണി ഒഴിവാക്കാനും വിലകയറ്റം പിടിച്ചു നിര്‍ത്താനും സംസ്ഥാന സര്‍ക്കാര്‍ ചിലവാക്കിയത് 1000 കോടി രൂപ. ജനങ്ങള്‍ക്ക് സൗജന്യഭക്ഷണ വിതരണത്തിന് ഇത്രയും അധികം തുക കുറഞ്ഞ സമയത്ത് കൃത്യതയോടെ വിതരണം ചെയ്ത ഇന്ത്യയിലെ ഏക സംസ്ഥാനമായിരിക്കുകയാണ് കേരളം. ലോക് ഡൗണ്‍ കാലത്ത് 86 ലക്ഷംപേര്‍ക്ക് ഭക്ഷ്യധാന്യ കിറ്റ് വിതരണം ചെയ്യാനാണ് എല്‍ഡിഎഫ് സര്‍ക്കാര്‍ 1000 കോടിരൂപ ചെലവഴിച്ചത്. . കേന്ദ്രസര്‍ക്കാര്‍ പ്രത്യേകം വാഗ്ദാനം ചെയ്ത ധാന്യത്തിനു പുറമെയാണ് ഇത്. ഇതിനു പുറമെ 100 ദിന കര്‍മപരിപാടിയുടെ ഭാഗമായി നാലുമാസം മുഴുവന്‍ റേഷന്‍ കാര്‍ഡ് ഉടമകള്‍ക്കും ഭക്ഷ്യക്കിറ്റുകള്‍ സൗജന്യമായി വിതരണം ചെയ്യുന്ന പദ്ധതിയും തുടങ്ങി. 88.42 ലക്ഷം കുടുംബങ്ങള്‍ക്കാണ് ഇതിന്റെ ആശ്വാസം ലഭിക്കുക. നാലര വര്‍ഷംകൊണ്ട് പൊതുവിതരണമേഖലയെ അഴിമതിമുക്തമാക്കിക്കൊണ്ടാണ് ഈ നീക്കങ്ങള്‍. ദേശീയ ഭക്ഷ്യഭദ്രതാ നിയമം കേരളത്തില്‍ നടപ്പാക്കി. വാതില്‍പ്പടി വിതരണം ആരംഭിച്ചു. ആധാര്‍ അധിഷ്ഠിതമായി ഇ-പോസ് മെഷീന്‍വഴിയാണ് ഇപ്പോള്‍ റേഷന്‍ വിതരണം. റേഷന്‍ കടകളില്‍നിന്ന് അകന്നുപോയ ജനങ്ങള്‍ തിരിച്ചെത്തി. റേഷന്‍ വാങ്ങുന്നവരുടെ ശതമാനം ഇപ്പോള്‍ 92 ആണ്. ഉപഭോക്താക്കള്‍ക്ക് ഇഷ്ടപ്പെട്ട റേഷന്‍കടയില്‍ പോയി സാധനം വാങ്ങാനുള്ള പോര്‍ട്ടബിലിറ്റി സംവിധാനം നടപ്പാക്കി. റേഷന്‍വ്യാപാരികള്‍ക്ക് മാന്യമായ പ്രതിഫലത്തിനായി പ്രതിമാസം കുറഞ്ഞത് 18,000 രൂപ ലഭിക്കുന്ന പാക്കേജ് നടപ്പാക്കി. വിവരങ്ങള്‍ ഡിജിറ്റൈസ് ചെയ്ത് കാര്‍ഡ് വിതരണം പൂര്‍ത്തിയാക്കി. വീട്ടു നമ്പര്‍ ഇല്ലാത്തവര്‍ക്കും വീടില്ലാത്തവര്‍ക്കും കാര്‍ഡ് നല്‍കാന്‍ തീരുമാനിച്ചു. സംസ്ഥാനത്ത് 88.42 ലക്ഷം കാര്‍ഡുടമകളാണ് ഉള്ളത്. 8.22 ലക്ഷം കാര്‍ഡ് എല്‍ഡിഎഫ് സര്‍ക്കാര്‍ പുതുതായി വിതരണം ചെയ്തതാണ്. പൊതുവിപണിയില്‍ വില നിയന്ത്രിച്ചുനിര്‍ത്തുന്നതിന് ഉയര്‍ന്ന വിഹിതം സപ്ലൈകോയ്ക്ക് അനുവദിച്ചിട്ടുണ്ട്. ആദ്യത്തെ മൂന്നുവര്‍ഷം 200 കോടി രൂപവീതവും 2019---20ല്‍ 150 കോടിരൂപയുമാണ് വിപണി ഇടപെടലിന് നല്‍കിയത്. പൊതുവിപണിയേക്കാള്‍ 60 ശതമാനംവരെ വിലക്കുറവിലാണ് 14 ഇനം അവശ്യസാധനം സപ്ലൈകോ വിതരണം ചെയ്യുന്നത്. പ്രകടനപത്രികയില്‍ വാഗ്ദാനം ചെയ്തതനുസരിച്ച് ഈ സാധനങ്ങളുടെ വില വര്‍ധിപ്പിച്ചിട്ടേയില്ല. ചെറുപയറിന് കിലോഗ്രാമിന് 2016ല്‍ ഉണ്ടായിരുന്ന 74 രൂപയാണ് ഇപ്പോഴും. എല്ലാ പഞ്ചായത്തിലും സപ്ലൈകോയുടെ ഒരു യൂണിറ്റെങ്കിലും ഉണ്ടെന്ന് ഉറപ്പുവരുത്തുന്നതിനുള്ള നടപടികള്‍ അവസാന ഖട്ടത്തിലാണ്. മാവേലി ഉല്‍പ്പന്നങ്ങള്‍ റേഷന്‍കടകള്‍ വഴിയും സപ്ലൈകോ വില്‍പ്പനശാലകളില്‍നിന്ന് വീടുകളില്‍ സാധനങ്ങള്‍ ലഭ്യമാക്കുന്ന പരിപാടി ആരംഭിക്കും. ഇതിനുള്ള ഓര്‍ഡറുകള്‍ ഓണ്‍ലൈനായി സ്വീകരിക്കും. മുന്‍ഗണനാവിഭാഗത്തിനുള്ള ഗോതമ്പ് വിഹിതം ആട്ടയാക്കി വിതരണം ചെയ്യും. സപ്ലൈകോയുടെ മെഡിക്കല്‍ സ്റ്റോറുകള്‍ കൂടുതല്‍ ആരംഭിക്കും ഗൃഹോപകരണങ്ങള്‍ക്ക് പ്രത്യേക വില്‍പ്പനശാലകള്‍ തുറക്കുവാനും തീരുമാനിച്ചിട്ടുണ്ട്. ഈ ഗണത്തിലും ഇന്ത്യയില്‍ ഒന്നാം സ്ഥാനത്താണ് കേരളം .