തലതൊട്ടപ്പൻമാരുടെ വിയോഗത്തിന് ശേഷം ഇനി എന്ത്

കേരള കോണ്‍ഗ്രസിന്റെ തലതൊട്ടപ്പന്‍മാര്‍ എന്നറിയപ്പെട്ടിരുന്ന കെ.എം.മാണിയുടെയും സി.എഫ്. തോമസിന്റെയും വിയോഗത്തോടെ കേരള കോണ്‍ഗ്രസിന്റെയും ജില്ലയുടെയും രാഷ്ട്രീയ ചരിത്രം തന്നെ മാറി മറിയും.  യുഡിഎഫിനൊപ്പം ആണ് ജില്ലയിലെ മിക്ക മണ്ഡലങ്ങളും നിന്നിരുന്നത്. ഇത് കൈവിടുന്ന അവസ്ഥയിലാണ്. ഇതിന്റെ ആദ്യപടിയായിരുന്നു മാണിക്ക് പിന്നാലെ പാലാ ഇടത്തേയ്ക്ക് ചാഞ്ഞതും. കെ.എം. മാണിക്ക് പിന്നാലെ അദ്ദേഹത്തിന്റെ വിശ്വസ്തനായിരുന്ന സി.എഫ.് തോമസിന്റെ വിയോഗം വലിയ വിടവാണ് സൃഷ്ടിക്കുന്നത്. കേരള കോണ്‍ഗ്രസുകളുടെ രൂപീകരണം മുതല്‍ കോട്ടയം ജില്ലയുടെയും മധ്യകേരളത്തിലെയും നിര്‍ണായക ശക്തിയായിരുന്ന പാര്‍ട്ടിക്ക് ഈ രാഷ്ട്രീയ അതികായന്മാര്‍ ഇല്ലാത്ത കാലത്ത് എന്ത് പ്രസക്തി എന്ന ചോദ്യം ബാക്കിയാണ്. ഇനി രാഷ്ട്രീയ വിലപേശലിന് പോലും പഴയ കരുത്തില്ല. ക്രൈസ്തവ  നായര്‍ മുന്നോക്ക രാഷ്ട്രീയത്തിന്റെ സാധ്യതയും അടയുന്നു. പാര്‍ട്ടി വളര്‍ന്നതും പിളര്‍ന്നതുമെല്ലാം കോട്ടയത്തുവച്ചാണ്. 1964ലെ കോണ്‍ഗ്രസിന്റെ പിളര്‍പ്പും കേരള കോണ്‍ഗ്രസ് രൂപീകരണവും ഏറ്റവുമധികം പ്രതിഫലിച്ചത് കോട്ടയം ജില്ലയിലും കിഴക്കന്‍ മലയോര മേഖലകളിലുമായിരുന്നു. പാര്‍ട്ടി രൂപീകരണ ഘട്ടത്തില്‍ കെ.എം ജോര്‍ജിന്റെയും ബാലകൃഷ്ണ പിള്ളയുടെയുമെല്ലാം ഏറ്റവും ശ്രദ്ധേയമായ കണ്ടെത്തലായിരുന്നു കെ.എം. മാണിയും സി.എഫ.് തോമസും പോലുള്ള യുവാക്കള്‍. മാണി പാലായില്‍ സ്ഥാനാര്‍ത്ഥിയായി ജയിച്ചുകയറി. സി.എഫ്. പാര്‍ട്ടിയുടെ ചങ്ങനാശേരി മണ്ഡലം അധ്യക്ഷനുമായി. സി.എഫ്. തോമസ് സെന്റ് ബെര്‍ക്കുമന്‍സ് സ്‌കൂളില്‍ അധ്യാപകനായിരുന്ന കാലഘട്ടമാണത്. പിന്നീട് കേരള കോണ്‍ഗ്രസ് കോട്ടയം ജില്ലാ സെക്രട്ടറി, സംസ്ഥാന ജനറല്‍ സെക്രട്ടറി പദവികളും വഹിച്ചു.1979 ലെ കേരള കോണ്‍ഗ്രസിന്റെ പിളര്‍പ്പില്‍ കെ.എം മാണിക്കൊപ്പം നിന്ന സി.എഫ് അദ്ദേഹത്തിന്റെ ഏറ്റവും വിശ്വസ്തന്‍ എന്നാണ് അറിയപ്പെട്ടത്. 1980 ല്‍ മാണി ഗ്രൂപ്പ് ഇടതുപക്ഷത്തായിരുന്ന കാലത്ത് അന്ന് പാര്‍ട്ടിയുടെ ശക്തി പരീക്ഷണം കൂടിയായിരുന്നു ആ തെരഞ്ഞെടുപ്പ്. സ്ഥാനാര്‍ത്ഥിയാക്കാന്‍ പാര്‍ട്ടിക്ക് മറ്റൊരു നേതാവിനെ തേടേണ്ടി വന്നില്ല. 80 ല്‍ ആദ്യമായി എംഎല്‍എയായ സി.എഫ്. തോമസിനെ തുടര്‍ച്ചയായി ഒമ്പത് തവണയാണ് ചങ്ങനാശേരിക്കാര്‍ നിയമസഭയിലേക്ക് അയച്ചത്. കേരള കോണ്‍ഗ്രസ് രാഷ്ട്രീയത്തിലെ സൗമ്യമുഖം വിവാദങ്ങളില്‍ കക്ഷി ചേരാത്ത ജനപ്രതിനിധി എന്നിങ്ങനെയാണ്‌കേരള രാഷ്ട്രീയത്തില്‍സിഎഫ് തോമസിന്റെ സ്ഥാനം.ഇടയ്ക്കൊരു കാലഘട്ടത്തില്‍ പാര്‍ട്ടി ചെയര്‍മാന്‍ സ്ഥാനം വഹിച്ചെങ്കിലും കേരള കോണ്‍ഗ്രസ് ലയനസമയത്ത് മാണിക്ക് വേണ്ടി പദവി ഒഴിഞ്ഞു. പദവികള്‍ ലഭിച്ചപ്പോഴും നഷ്ടപ്പെട്ടപ്പോഴും പരാതികളോ അവകാശവാദങ്ങളോ മുഴക്കിയില്ല. പിന്നീട് അവസാന കാലത്ത് ഡെപ്യൂട്ടി ചെയര്‍മാന്‍ സ്ഥാനം വഹിച്ചു. മാണിയുടെ വിശ്വസ്തനായിരുന്നെങ്കിലും കേരള കോണ്‍ഗ്രസിന്റെ ഒടുവിലത്തെ പിളര്‍പ്പില്‍ പി.ജെ ജോസഫിനൊപ്പമാണ് നിന്നത്. എന്തായാലും കേരള കോണ്‍ഗ്രസിന്റെ തല മുതിര്‍ന്ന നേതാക്കളായ കെ.എം. മാണിയും സി.എഫ.് തോമസും കെ.നാരായണക്കുറുപ്പുമെല്ലാം 21-ാം നൂറ്റാണ്ടിന്റെ നഷ്ടങ്ങളാണ്. സി.എഫ്. തോമസിനോടൊപ്പം നാല് പതിറ്റാണ്ടുകാലത്തോളം ചങ്ങനാശേരി കേരള കോണ്‍ഗ്രസിനൊപ്പം നിന്നതിന് തുടര്‍ച്ച ഉണ്ടാകുമോ എന്നതാണ് ഇനിയും കാത്തിരിക്കുന്നത്.