സിബിഐ യില്‍ തട്ടി അപഹാസ്യനായി ചെന്നിത്തല

പ്രതിപക്ഷ നേതാവും സംഘവും കൊണ്ടുവന്ന പുതിയ ആരോപണം മണിക്കൂറുകള്‍ക്കുള്ളില്‍ തകര്‍ന്നടിഞ്ഞു. സംസ്ഥാനത്ത് സിബിഐയുടെ പ്രവര്‍ത്തനം നിയന്ത്രിക്കാന്‍ ഓര്‍ഡിനന്‍സിന് സര്‍ക്കാര്‍ നീക്കമെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചിരുന്നു. സിബിഐയുടെ അന്വേഷണം തടയാനാണ് ഓര്‍ഡിനന്‍സ്. സര്‍ക്കാര്‍ നടപടി നിയമവിരുദ്ധമാണ്. പ്രതിപക്ഷം ഇതു ചെറുക്കും. ഒപ്പിടരുതെന്ന് ഗവര്‍ണറോട് ആവശ്യപ്പെടുമെന്നും വേണ്ടിവന്നാല്‍ കോടതിയെ സമീപിക്കും. ലൈഫ് അഴിമതിയില്‍ കുടുങ്ങുമെന്ന് കണ്ടാണ് സര്‍ക്കാര്‍ നീക്കം. ഫയല്‍ നിയമസെക്രട്ടറിയുടെ കയ്യിലെന്നും രമേശ് ചെന്നിത്തല അവകാശപ്പെട്ടിരുന്നു. ചെന്നിത്തലയുടെ പത്രസമ്മേളനം കഴിഞ്ഞതുമുതല്‍ ചാനലുകളും ഓണ്‍ലൈന്‍ മാധ്യമങ്ങളും ഇത് ആഘോഷമാക്കി. ലൈഫില്‍ മുഖ്യമന്ത്രി കുടുങ്ങും എന്നുവരെയായി പലരുടെയും പ്രഖ്യാപനം. പക്ഷെ കോവിഡ് സംബന്ധിച്ച സര്‍വകക്ഷി യോഗം കഴിഞ്ഞ് മുഖ്യമന്ത്രി വാര്‍ത്താ സമ്മേളനം നടത്തിയതോടെ സംഗതി മാറി മറിഞ്ഞു. സിബിഐയെ തടയാന്‍ ചില സംസ്ഥാനങ്ങളില്‍ കോണ്‍ഗ്രസ് സര്‍ക്കാരുകള്‍ നടപടി എടുത്തിട്ടുണ്ടെന്നും അത്തരം ഒരു കാര്യവും എല്‍ഡിഎഫ് സര്‍ക്കാര്‍ ആലോചിച്ചിട്ടില്ലെന്നും മുഖ്യമന്ത്രി പിണറായി വിജയന്‍ വ്്യക്തമാക്കി. സിബിഐയെ തടയാന്‍ സംസ്ഥാന സര്‍ക്കാര്‍ ഓര്‍ഡിനന്‍സ് ഇറക്കുമെന്ന പ്രതിപക്ഷനേതാവിന്റെ ആരോപണത്തോട് അത് തങ്ങളുടെ ശീലമല്ലന്നും സി ബി ഐ അവരുടെ പണി ചെയ്യേട്ടെയെന്നു ആര്‍ത്തിച്ചുള്ള ചോദ്യത്തിന് മുഖ്യമന്ത്രി മറുപടി നല്‍കി. കോണ്‍ഗ്രസ് സര്‍ക്കാരുകള്‍ ചിലത് ഇത്തരം നിലപാട് എടുത്തിട്ടുണ്ടെന്നത് ശരിയാണ്. കോണ്‍ഗ്രസ് നേതൃത്വം കൊടുത്തുകൊണ്ടുതന്നെ എടുത്തിട്ടുണ്ട്. ഞങ്ങള്‍ ഇതുവരെ അത്തരമൊരു കാര്യവും ആലോചിച്ചിട്ടില്ല. കേന്ദ്ര ഏജന്‍സികളുടെ അന്വേഷണം സംബന്ധിച്ച് രാഷ്ട്രീയ പാര്‍ടികള്‍ക്കും മുന്നണികള്‍ക്കും അവരുടേതായ അഭിപ്രായം രേഖപ്പെടുത്താം. സര്‍ക്കാരിന് നിയമപരമായ പരിശോധനകള്‍ക്കുശേഷമേ നിലപാട് പറയാനാകൂവെന്നും മുഖ്യമന്ത്രി വ്യക്തമാക്കി.