മത നിരപേക്ഷ ഇന്ത്യയുടെ മരണ മണിയാണെന്ന് ഡിവൈഎഫ്‌ഐ, ശക്തമായ പ്രതിഷേധമായി മുസ്‌ളീം ലീഗ്

  ചരിത്രത്തിലെ ഏറ്റവും വലിയ നീതി നിഷേധമാണ് ബാബറി മസ്ജിദ് തകര്‍ത്ത കേസെന്നും ഇത് അട്ടിമറിച്ചതില്‍ ഒന്നാം പ്രതി കോണ്‍ഗ്രസ് ആണെന്നും ഡിവൈഎഫ്‌ഐ പറഞ്ഞു. പള്ളി പൊളിക്കാനും കേസിലെ പ്രതികളെ രക്ഷിക്കാനും കൂട്ടു നിന്നത് കോണ്‍ഗ്രസാണ്, ഇതില്‍ ബിജെപിക്കും കോണ്‍ഗ്രസിനും മാപ്പില്ലെന്നും ഡിവൈഎഫ്‌ഐ പറഞ്ഞു. ബാബറി മസ്ജിദ് തകര്‍ത്ത കേസില്‍ പ്രതികളായ എല്ലാവരെയും വെറുതെ വിട്ട വിധി മത നിരപേക്ഷ ഇന്ത്യയുടെ മരണ മണിയാണെന്ന് ഡിവൈഎഫ്‌ഐ പ്രതികരിച്ചു. ബാബറി മസ്ജിദ് തകര്‍ത്തിട്ടുതന്നെയില്ലെന്നും പള്ളി ഇപ്പോഴും നിലനില്‍ക്കുന്നു എന്ന് പറയുംപോലെയാണ് വിധിയെന്നും പി.കെ. കുഞ്ഞാലിക്കുട്ടി അഭിപ്രായപ്പെട്ടു. പള്ളി തകര്‍ക്കുമ്പോള്‍ പ്രതികളെല്ലാം അവിടെയുണ്ടായിരുന്നു. അത് ലോകം കണ്ടതാണെന്നും കുഞ്ഞാലിക്കുട്ടി കൂട്ടിച്ചേര്‍ത്തു. അന്വേഷണ ഏജന്‍സിതന്നെ അപ്പീല്‍ പോകണമെന്നും എല്ലാവരും സമാധാനവും മതസൗഹാര്‍ദവും കാത്തുസൂക്ഷിക്കണമെന്നും മുസ്‌ലിംലീഗ് സംസ്ഥാന അധ്യക്ഷന്‍ ഹൈദരലി ശിഹാബ് തങ്ങള്‍ പ്രതികരിച്ചു.