നന്മമനസ്സുകളിലൂടെ ബിജുലാലിന്റെ സ്വപ്നത്തിന് ചിറക് മുളയ്ക്കുന്നു

  സ്വപ്നം കണ്ട വീട് ഗാന്ധിജയന്തി ദിനത്തില്‍ യാഥാര്‍ഥ്യമാകാന്‍ പോകുന്നതിന്റെ സന്തോഷത്തിലാണ് ഒല്ലൂര്‍ പെരുവാംകുളങ്ങര ആറ്റുവെപ്പില്‍ ബിജുലാലും ഭാര്യ ബിന്ദുവും. ജന്മനാ വികലാംഗരായ ബിജുലാലിനും ഭാര്യയ്ക്കും ജില്ലാ കലക്ടര്‍ എസ് ഷാനവാസ് സുമനസ്സുകളുടെ സഹായത്തോടെ വാങ്ങി നല്‍കിയ മൂന്ന് സെന്റ് സ്ഥലത്ത് ഒക്ടോബര്‍ രണ്ടിന് വീടിന് തറക്കല്ലിടും. ഇരുകാലുകളും വലതുകൈയും ഇല്ലാതെയാണ് ബിജുലാല്‍ ജനിച്ചത്. ആകെയുള്ളത് ഇടതുകൈയില്‍ മൂന്ന് വിരല്‍ മാത്രം. ഭാര്യ ബിന്ദുവിനും ഇടതു കൈയില്ല. തുണിക്കടയിലെ ജീവനക്കാരിയായ ബിന്ദുവാണ് കുടുംബത്തിന്റെ ഉപജീവനമാര്‍ഗം. പത്താംക്ലാസുകാരിയായ മകള്‍ക്കൊപ്പം താമസിക്കുന്നത് വാടകവീട്ടിലും. സ്വന്തമായി ഒരു വീടെന്ന സ്വപ്നത്തിനായി, സര്‍ക്കാരിന്റെ ലൈഫ് പദ്ധതിയില്‍ ഉള്‍പ്പെടാന്‍ അപേക്ഷ നല്‍കുന്നതിനിടയിലാണ് ബിജുലാലും കുടുംബവും കലക്ടറുടെ ശ്രദ്ധയില്‍പ്പെടുന്നത്. ലൈഫ് പദ്ധതിയില്‍ ഉള്‍പ്പെടുത്താന്‍ സാങ്കേതിക തടസ്സങ്ങളുണ്ടായിരുന്നതിനാല്‍ കലക്ടര്‍ സന്നദ്ധസംഘടനകളുടെ സഹായം തേടി. ഇതിനായി ഒരു സമിതി രൂപീകരിച്ച് ഒരു ടീമിനെ സ്ഥലം വാങ്ങാനും മറ്റൊരു ടീമിനെ വീട് നിര്‍മ്മിക്കാനും നിയോഗിച്ചു. ഇതനുസരിച്ചാണ് വെങ്ങിണിശ്ശേരി വില്ലേജിലെ അമ്മാടത്ത് മൂന്ന് സെന്റ് സ്ഥലത്ത് ബിജുലാലിനും ബിന്ദുവും വീടൊരുങ്ങുന്നത്.