കേരളത്തിലേക്ക് കോണ്‍സിലേറ്റ് വഴി എത്തിയത് 58 കോടി

ജീവകാരുണ്യ പ്രവര്‍ത്തനങ്ങള്‍ക്കായി യുഎഇ കോണ്‍സുലേറ്റിന്റേതായി തുടങ്ങിയ അക്കൗണ്ടിലൂടെ എത്തിച്ച 58 കോടി രൂപയെക്കുറിച്ച് എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) അന്വേഷണം വിപുലമാക്കി.
ഇതിലെ വിദേശസഹായ നിയന്ത്രണനിയമ (എഫ്‌സിആര്‍എ) ലംഘനം സിബിഐ അന്വേഷിച്ചേക്കും. ഈ പണം ആര്‍ക്കൊക്കെ ലഭിച്ചെന്നാണ് ഇഡി അന്വേഷിക്കുന്നത്. ഈ അക്കൗണ്ടിലേക്കാണു ലൈഫ് മിഷന്‍ പദ്ധതിക്കുള്ള റെഡ് ക്രസന്റിന്റെ 20 കോടിയുടെ സഹായമെത്തിയത്.

കോണ്‍സുലേറ്റിന്റെ 6 അക്കൗണ്ടുകളാണു കരമനയിലെ ഒരു ബാങ്കിലുള്ളത്. അതില്‍ ഒരെണ്ണം കോണ്‍സുലേറ്റിലെ ചെലവുകള്‍ക്കു യുഇഎയില്‍ നിന്നു പണമെത്തുന്നതാണ്. രണ്ടാമത്തെ അക്കൗണ്ടാണു ജീവകാരുണ്യ പ്രവര്‍ത്തനങ്ങള്‍ക്കായി തുറന്നത്.
ബാക്കി 4 അക്കൗണ്ടുകളാണു കോണ്‍സുലേറ്റിന്റെ ഇവിടെയുള്ള ക്രയവിക്രയങ്ങള്‍ക്ക് ഉപയോഗിക്കുന്നത്. വിദേശത്തുനിന്നു വരുന്ന പണം ഈ അക്കൗണ്ടുകളിലേക്കു മാറ്റി അതില്‍ നിന്നാണു മറ്റാവശ്യങ്ങള്‍ക്കു നല്‍കിയിരുന്നത്. റെഡ്ക്രസന്റിന്റെ പണം ലൈഫ് മിഷനു വേണ്ടി യൂണിടാക്കിനു നല്‍കിയത് അങ്ങനെയാണ്.

20 കോടിയില്‍ 14.5 കോടി യൂണിടാക്കിനും ബാക്കി പല സംഘടനകള്‍ക്കുമായി കൈമാറി. ഇതിന്റെ രേഖകള്‍ ഇഡി ശേഖരിച്ചു.