കച്ചവടക്കാരുടെ 20000 കോടി കെട്ടിക്കിടക്കുന്നു

കേന്ദ്രസര്‍ക്കാര്‍ ചൈന വിരുദ്ധനടപടികള്‍ കര്‍ശനമാക്കിയപ്പോള്‍ വ്യാപാരികള്‍ക്ക് നഷ്ടമായിരിക്കുന്നത് കോടികള്‍. പ്രശ്നങ്ങള്‍ രൂക്ഷമാവും മുന്‍പ് പണമടച്ച് ബുക്ക് ചെയ്ത ഉത്പന്നങ്ങളാണ് തുറമുഖങ്ങളില്‍ എത്തിപുറത്തിറക്കാന്‍ സാധിക്കാതെ കെട്ടിക്കിടക്കുന്നത്. ദേശീയ മാധ്യമങ്ങള്‍ പുറത്തുവിട്ട കണക്കനുസരിച്ച് തുറമുഖങ്ങളില്‍ ക്ലിയറന്‍സ് കാത്ത് കെട്ടിക്കിടക്കുന്നത് 20,000 കോടി രൂപയുടെ ചൈനീസ് ഉത്പന്നങ്ങളാണ്. ഇലക്ട്രോണിക്സ്, ഇലക്ട്രിക്കല്‍ ഉപകരണങ്ങള്‍, കളിപ്പാട്ടങ്ങള്‍, ഗിഫ്റ്റുകള്‍, പാദരക്ഷകള്‍, ഗൃഹോപകരണങ്ങള്‍ തുടങ്ങിവയാണ് ഇതിലധികവും.

കഴിഞ്ഞവര്‍ഷം നവംബര്‍ മുതല്‍ ഡിസംബര്‍ വരെ ഓര്‍ഡര്‍ നല്‍കിയ ഉത്പന്നങ്ങളാണ് ഇപ്പോള്‍ തുറമുഖങ്ങളിലെത്തി കാത്തുകിടക്കുന്നത്. ജനുവരി മുതല്‍ ഫെബ്രുവരി വരെ ചൈനീസ് അതിര്‍ത്തികള്‍ അടച്ചിരുന്നു. അതിനുശേഷം ഇന്ത്യയില്‍ ലോക്ഡൗണ്‍ തുടങ്ങി. ഇതോടെ ഇറക്കുമതി ചെയ്യാന്‍ കഴിയാതെ വന്നു. ഈ ഉത്പന്നങ്ങളാണ് ഇപ്പോള്‍ എത്തിക്കൊണ്ടിരിക്കുന്നത്. വരുന്ന രണ്ടു മൂന്നു മാസങ്ങളില്‍ ഉത്പന്നങ്ങളുടെ വരവ് കൂടുതലായിരിക്കും പക്ഷെ ക്ലിയറിന്‍സിന്റെ കാര്യത്തില്‍ വ്യാപാരികള്‍ ഒന്നും പറയുന്നില്ല. മാര്‍ച്ചിനു ശേഷം വ്യാപാരികള്‍ പുതിയ ഓര്‍ഡര്‍ നല്‍കുന്നത് കുറച്ചിട്ടുണ്ട്.

ചൈനയില്‍ നിന്ന് ഇറക്കുമതി കുറച്ചുകൊണ്ടുവരാന്‍ ഇന്ത്യ ശ്രമിക്കുന്നുണ്ട്. പകരം വിയറ്റ്നാം, തായ്വാന്‍, ദക്ഷിണ കൊറിയ തുടങ്ങിയ രാജ്യങ്ങളുമായി ഇത്തരം ഉത്പന്നങ്ങളുടെ ഇറക്കുമതിക്ക് കരാറുണ്ടാക്കാന്‍ ചര്‍ച്ചകള്‍ നടന്നുവരുന്നു. പക്ഷെ പണമടച്ച് ഓര്‍ഡര്‍ ചെയ്ത് ഇറക്കുമതി ചെയ്ത സാധനങ്ങള്‍ക്ക് അനുമതി നല്‍കിയില്ലെങ്കില്‍ വന്‍ നഷ്ടമാവും പല കമ്പനികള്‍ക്കും ഉണ്ടാവുക.