വാക് സീൻ ജൂലൈയോടെ

അടുത്ത വർഷം ജൂലൈയോടെ രാജ്യത്തെ 20– 25 കോടി ജനങ്ങൾക്കു കോവിഡ് വാക്സീൻ നൽകാനുളള പദ്ധതിരേഖ സർക്കാർ തയാറാക്കുകയാണെന്നു കേന്ദ്ര ആരോഗ്യമന്ത്രി ഡോ. ഹർഷ് വർധൻ അറിയിച്ചു. ഇത്രയും പേർക്കായി 40– 50 കോടി ഡോസ് വാക്സീൻ വിതരണം ചെയ്യും. എന്നാൽ വാക്സീൻ എപ്പോൾ തയാറാകുമെന്നു വ്യക്തമാക്കിയില്ല.

മുൻഗണനാപ്പട്ടിക ഈ മാസം അവസാനത്തോടെ തയാറാക്കാൻ സംസ്ഥാനങ്ങൾക്കു നിർദേശം നൽകിയിട്ടുണ്ടെന്നും സമൂഹ മാധ്യമങ്ങളിലൂടെയുള്ള ‘ഞായർ സംവാദ’ത്തിൽ അദ്ദേഹം പറഞ്ഞു. സ്വകാര്യമേഖലയിലുൾപ്പെടെയുള്ള ആരോഗ്യ പ്രവർത്തകർക്കു മുൻഗണന നൽകും. ബ്ലോക്ക് തലം വരെ ശീതീകരണ സംവിധാനങ്ങൾ ഉറപ്പാക്കാനും നിർദേശിച്ചിട്ടുണ്ട്.

വാക്സീൻ വിതരണവുമായി ബന്ധപ്പെട്ട മനുഷ്യശേഷി, പരിശീലനം, മേൽനോട്ടം എന്നിവയ്ക്കായി നിതി ആയോഗ് അംഗം വി.കെ. പോളിന്റെ നേതൃത്വത്തിലുള്ള ഉന്നതതല സമിതി വിപുല പദ്ധതി തയാറാക്കുന്നുണ്ട്. കേന്ദ്രസർക്കാർ തന്നെ വാക്സീൻ സംഭരിക്കുകയും ഏറ്റവും അർഹരായവർക്കു ലഭിക്കുന്നുവെന്ന് ഉറപ്പു വരുത്തുകയും ചെയ്യും.