ഏറ്റവും വലിയ ഫൗണ്ടെയിൻ ദുബായിൽ

ലോകത്തെ ഏറ്റവും വലിയ ഫൗണ്ടെയിൻ ദുബായിൽ ഒരുങ്ങുന്നു. ദ് പാം ഫൗണ്ടെയിൻ എന്ന പേരിലുള്ള വർണജലധാര പാം ജുമൈറ ദ് പോയിന്റിൽ ഒരുങ്ങി. ഇൗ മാസം 22ന് നടക്കുന്ന ഉദ്ഘാടന പരിപാടിയിൽ ഇത് ഗിന്നസ് വേൾഡ് റെക്കോർഡിൽ ഇടം പിടിക്കുമെന്നാണ് പ്രതീക്ഷ. 14,000 ചതുരശ്ര അടി വിസ്തീർണത്തിൽ സമുദ്രത്തിൽ വ്യാപിച്ചുകിടക്കുന്ന ഫൗണ്ടെയിനിലെ ജലധാര 105 മീറ്റർ ഉയരും. 3,000 എൽഇഡി ലൈറ്റുകളാണ് ഇതിന് ഉപയോഗിക്കുന്നത്. ദുബായിലെ ഏക മൾട്ടി കളർ ഫൗണ്ടെയിനാണിത്. ദുബായ് മാളിലെ ദുബായ് ഫൗണ്ടെയിനാണ്  ഇതിന് മുൻപ് ആളുകളെ ആകർഷിച്ചിരുന്നത്.

എല്ലാ ദിവസവും വൈകിട്ട് ഏഴിനും അർധരാത്രിക്കിടയിലുമാണ് ഫൗണ്ടെയിനിൽ ഷോകൾ. ഒാരോ അര മണിക്കൂർ കൂടുമ്പോഴുമുള്ള ഷോയ്ക്ക് മൂന്നു മിനിറ്റാണ് ദൈർഘ്യം. ഉദ്ഘാടന ദിവസം മുഴുവൻ ദ് പോയിന്റെയിൽ നടക്കുന്ന പരിപാടിയിൽ പൊതുജനങ്ങൾക്ക് സൗജന്യപ്രവേശനം നൽകും. 

വൈകിട്ട് നാലിനാണ് മൾട്ടിപ്പിൾ ഡിജെ സെറ്റ്, നൃത്തനൃത്യങ്ങൾ, മാജിക്കൽ ഫയർവർക്സ് തുടങ്ങിയവ അടങ്ങുന്ന പരിപാടികൾ ആരംഭിക്കുക. റജിസ്ട്രേഷൻ വഴിയാണ് പ്രവേശനം. ആദ്യം റജിസ്റ്റർ ചെയ്യുന്ന 5,000 പേർക്ക് എൽഇ‍ഡി റിസ്റ്റ് ബാൻഡ് സമ്മാനമായി നൽകും. നഖീൽ മാളിൽ നിന്ന് ദ് പോയിന്റിലേയ്ക്ക് ഒാരോ അരമണിക്കൂറിലും ഷട്ടിൽ ബസ് സൗകര്യം ഏർപ്പെടുത്തിയിട്ടുണ്ടെന്ന് അധികൃതർ പറഞ്ഞു.‌