ബാറില്‍ ഇരുന്ന് അടിക്കാമോ നാളെ അറിയാം

ബാറുകള്‍ തുറക്കുന്നത് സംബന്ധിച്ച് നാളെ തീരുമാനം ആയേക്കും . ഇക്കാര്യത്തില്‍ തീരുമാനമെടുക്കാന്‍ മുഖ്യമന്ത്രി യോഗം വിളിച്ചു.
ഓണ്‍ലൈനിലൂടെ നടക്കുന്ന യോഗത്തില്‍ എക്‌സൈസ് മന്ത്രി, എക്‌സൈസ് കമ്മിഷണര്‍, ബവ്‌കോ എംഡി തുടങ്ങിയവര്‍ പങ്കെടുക്കും. ബാറുകള്‍ തുറക്കാനുള്ള ശുപാര്‍ശയടങ്ങിയ ഫയല്‍ ആഴ്ചകള്‍ക്കു മുന്‍പ് എക്‌സൈസ് കമ്മിഷണര്‍ മന്ത്രി വഴി മുഖ്യമന്ത്രിക്കു സമര്‍പ്പിച്ചെങ്കിലും തീരുമാനമെടുത്തിരുന്നില്ല.

കോവിഡ് വ്യാപിക്കുന്ന സാഹചര്യവും 144 പ്രഖ്യാപിച്ചതും കണക്കിലെടുത്താണ് മുഖ്യമന്ത്രിയുടെ തീരുമാനം വൈകിയത്. എന്നാല്‍, കോവിഡ് വ്യാപനം രൂക്ഷമായ സാഹചര്യത്തിലും മറ്റു സംസ്ഥാനങ്ങളില്‍ ബാറുകള്‍ തുറന്ന പശ്ചാത്തലത്തിലാണ് എക്‌സൈസ് വകുപ്പ് ശുപാര്‍ശ നല്‍കിയത്. ബാര്‍ ഉടമകളുടെ നിവേദനത്തിന്റെ അടിസ്ഥാനത്തിലായിരുന്നു ശുപാര്‍ശ.

ബാറുകള്‍ തുറക്കാന്‍ തീരുമാനിച്ചാല്‍ കൗണ്ടര്‍ വഴിയുള്ള വില്‍പന അവസാനിപ്പിക്കും. ക്ലബ്ബുകളിലും ഇരുന്ന് മദ്യം കഴിക്കാന്‍ അനുമതി നല്‍കി കൗണ്ടര്‍ വില്‍പന നിര്‍ത്തലാക്കും. ബാറുകളില്‍ കൗണ്ടര്‍ ആരംഭിച്ചതോടെ വലിയ നഷ്ടമാണ് ബവ്‌കോയ്ക്ക് ഉണ്ടാകുന്നത്. ഇത് മറികടക്കുകയും പുതിയ തീരുമാനത്തിന് കാണമാവും.
പക്ഷെ ഒക്‌ടോബര്‍ 31 ശേഷം പ്രാബല്ല്യത്തില്‍ വരുന്ന രീതിലയിലാവും തീരുമാനം . ഡിസംബറിനുള്ളില്‍ തുറന്നുകിട്ടണം എന്ന ആവശ്യമാണ് ബാര്‍ ഉടമകള്‍ക്കുള്ളത്. ക്രിസ്തുമസ് ന്യൂഇയര്‍ പാര്‍ട്ടികള്‍ എങ്കിലും നടത്തി വ്യാപാരത്തില്‍ തിരികെ എത്താനാകും നീക്കം.