കാമുകന് വേണ്ടി സ്വര്‍ണം മോഷ്ടിച്ച് ജയിലിലായി, പിന്നീട് കാമുകനെതിരെ പീഡന പരാതി

ബേക്കല്‍ സ്വദേശിനിയായ ബിബിഎ വിദ്യാര്‍ഥിനിയെ മംഗളൂരുവില്‍ പീഡിപ്പിച്ച കേസ് ബേക്കല്‍ പൊലീസ് മംഗളൂരു പൊലീസിന് കൈമാറും. കാമുകനും മംഗളൂരു പറങ്കിപ്പേട്ട സ്വദേശി കിരണ്‍ പൂജാരി(25)ക്കെതിരേയാണ് 19 കാരി പീഡന പരാതി നല്‍കിയിരിക്കുന്നത്. മോഷണകേസില്‍ പ്രതി കൂടിയാണ് പരാതിക്കാരി. 2019 മാര്‍ച്ച് മുതല്‍ ജൂണ്‍ വരെ മംഗളൂരുവിലെ വിവിധ കേന്ദ്രങ്ങളില്‍ പീഡനത്തിനിരയാക്കിയെന്നാണ് കേസ്. പഠനാര്‍ത്ഥം മംഗളൂരുവിലെത്തിയ പെണ്‍കുട്ടിയെ പ്രണയം നടിച്ച് വശത്താക്കിയ കിരണ്‍ പൂജാരി വിവാഹ വാഗ്ദാനം നല്‍കുകയും, പിന്നീട് പ്രതിയുടെയും സുഹൃത്തിന്റെയും മംഗളൂരുവിലെ വീട്ടിലെത്തിച്ച് പീഡിപ്പിച്ചുവെന്നുമാണ് വിദ്യാര്‍ഥിനിയുടെ പരാതി.
താന്‍ ചതിക്കപ്പെട്ടുവെന്ന് തിരിച്ചറിഞ്ഞതോടെ വിദ്യാര്‍ത്ഥിനി പരാതി നല്‍കുകയായിരുന്നു. ഈ മാസം നാലിന് ജില്ലാ പോലീസ് ചീഫിനാണ് പെണ്‍കുട്ടി പരാതി നല്‍കിയത്. പിന്നീട് ബേക്കല്‍ പൊലീസിനെ ഏല്‍പിക്കുകയായിരുന്നു. പെണ്‍കുട്ടിയെ വൈദ്യ പരിശോധനക്ക് വിധേയമാക്കി പോലീസ് എഫ്‌ഐആര്‍ രജിസ്റ്റര്‍ ചെയ്തു. തന്ത്രപൂര്‍വ്വം കെണിയില്‍പ്പെടുത്തിയ പെണ്‍കുട്ടിയെ മയക്കുമരുന്ന് കേസില്‍ കണ്ണിയായ കിരണ്‍ പൂജാരി ലൈംഗികമായി ചൂഷണം ചെയ്തതാണെന്നാണ് പോലീസ് നടത്തിയ പ്രാഥമികാന്വേഷണത്തില്‍ വ്യക്തമായത്.അതേസമയം കേസ് രജിസ്റ്റര്‍ ചെയ്തത് ബേക്കല്‍ പോലീസാണെങ്കിലും, പീഡനം നടന്നത് മംഗളൂരുവിലായതിനാല്‍ കേസിന്റെ തുടരന്വേഷണം കര്‍ണ്ണാടക പോലീസിന് കൈമാറുമെന്ന് ബേക്കല്‍ എസ്‌ഐ പി അജിത്ത്കുമാര്‍ വ്യക്തമാക്കി. പ്രാഥമിക അന്വേഷണത്തില്‍ പ്രതിക്ക് മയക്കുമരുന്ന് കടത്തു സംഘവുമായി ബന്ധമുണ്ടെന്നും, കിരണ്‍ പൂജാരി മയക്കുമരുന്ന് കേസ്സില്‍ ജയിലില്‍ കിടന്ന ആളാണെന്നും പോലീസിന് സൂചന ലഭിച്ചു. കിരണ്‍ ഇപ്പോള്‍ ജയിലിലാണുള്ളതെന്നും പോലീസ് സംശയിക്കുന്നുണ്ട്.
പരാതിക്കാരിയായ പെണ്‍കുട്ടി ഈ കാമുകന് വേണ്ടി സ്വര്‍ണം മോഷ്ടിച്ച കേസില്‍ അറസ്റ്റിലായിരുന്നു. അടുക്കത്ത് ബയലിലെ ബന്ധുവീട്ടില്‍നിന്ന് സ്വര്‍ണം മോഷ്ടിച്ച കേസിലാണ് പിടിയിലായത്. സമാനമായ മൂന്നുകേസുകള്‍ പെണ്‍കുട്ടിക്കെതിരേയുണ്ടെന്നും ഒരു കേസില്‍ ജയിലില്‍ പോയിട്ടുണ്ടെന്നും പൊലീസ് പറഞ്ഞു. കേസില്‍ പ്രേരണാകുറ്റത്തിന് കിരണും അറസ്റ്റിലായിരുന്നു. ആഢംബര ജീവിതം നയിക്കാനാണ് ഇരുവരും മോഷണം നടത്തിയത്. അടുക്കത്ത് ബയലില്‍ നിന്ന് 20 പവനോളം സ്വര്‍ണമാണ് പെണ്‍കുട്ടി മോഷ്ടിച്ചത്.