പലിശ നിരക്കില്‍ മാറ്റമില്ല; ജിഡിപി 9.5% ചുരുങ്ങും: ആര്‍ബിഐ

അടിസ്ഥാന പലിശ നിരക്ക് നാലു ശതമാനമായി തുടരാന്‍ റിസര്‍വ് ബാങ്ക് ധനനയ സമിതി യോഗത്തിന്റെ തീരുമാനം. തുടര്‍ച്ചയായി രണ്ടാമതു യോഗത്തിലാണ് പലിശ നിരക്കില്‍ സ്റ്റാറ്റസ്‌കോ നിലനിര്‍ത്തുന്നത്. എന്നാല്‍, കൊവിഡ് സാഹചര്യത്തില്‍ സാമ്പത്തിക വ്യവസ്ഥയിലുണ്ടായ തകര്‍ച്ച മറികടക്കാന്‍ ആവശ്യമായി വന്നാല്‍ ഭാവിയില്‍ പലിശ കുറയ്ക്കുമെന്ന് കേന്ദ്ര ബാങ്ക് വ്യക്തമാക്കിയിട്ടുണ്ട്. കേന്ദ്ര ബാങ്ക് വാണിജ്യ ബാങ്കുകള്‍ക്കു നല്‍കുന്ന വായ്പകള്‍ക്കുള്ള പലിശയായ റിപ്പോ നാലു ശതമാനമായി തുടരുമെന്ന് ധനനയ സമിതി യോഗത്തിനു ശേഷം ആര്‍ബിഐ ഗവര്‍ണര്‍ ശക്തികാന്ത ദാസ് പറഞ്ഞു. മൂന്നു പുതിയ സ്വതന്ത്രാംഗങ്ങള്‍ ചുമതലയേറ്റ ശേഷം നടന്ന ആദ്യ ധനനയ സമിതി യോഗമായിരുന്നു ഇത്.
ബാങ്കുകളില്‍ നിന്നു നിക്ഷേപമായി റിസര്‍വ് ബാങ്ക് സ്വീകരിക്കുന്ന പണത്തിനുള്ള പലിശ (റിവേഴ്‌സ് റിപ്പോ) നിരക്കിലും മാറ്റമില്ല. അതു 3.35 ശതമാനമായി തുടരും. ഈ സാമ്പത്തിക വര്‍ഷം രാജ്യത്തെ സാമ്പത്തിക വ്യവസ്ഥ 9.5 ശതമാനം ചുരുങ്ങുമെന്നാണ് ആര്‍ബിഐ വിലയിരുത്തിയത്. ആദ്യ പാദത്തില്‍ മൊത്തം ആഭ്യന്തര ഉത്പാദനം (ജിഡിപി) 23.9 ശതമാനം ചുരുങ്ങിയിരുന്നു. കൊവിഡിനെതിരായ പോരാട്ടത്തിന്റെ നിര്‍ണായക ഘട്ടത്തിലാണു രാജ്യമെന്ന് ശക്തികാന്ത ദാസ് യോഗത്തിനു ശേഷം പറഞ്ഞു.