ഡ്രീം ഇലവനിലൂടെ കോടിപതിയായി കണ്ണൂരുകാരന്‍ റാസിഖ്; മെഗാ കോണ്ടസ്റ്റ് വിജയിക്കുന്ന ആദ്യ മലയാളി

സ്‌പോര്‍ട്‌സ് ഫാന്റസി ഗൈമിങ് ആപ്പായ ഡ്രീം ഇലവനിലൂടെ കോടിപതിയായി കണ്ണൂര്‍ സ്വദേശി റാസിഖ്. ഒരു കോടി രൂപയുടെ മെഗാ കോണ്ടസ്റ്റ് വിജയിക്കുന്ന ആദ്യ മലയാളിയാണ് റാസിഖ്. കണ്ണൂര്‍ പാനൂര്‍ സ്വദേശിയായ റാസിഖ് 54 ലക്ഷത്തോളം ആളുകളെ പിന്തള്ളിയാണ് കോണ്ടസ്റ്റില്‍ ഒന്നാം സ്ഥാനത്ത് എത്തിയത്.പാനൂര്‍ പൊലീസ് ക്വാട്ടേഴ്‌സിന് സമീപമാണ് മീത്തലെ പറമ്പത്തെ റാസിഖ് എന്ന റാസിഖ് കെഎം താമസിക്കുന്നത്. കണ്ണൂര്‍ എ.കെ.ജി ആശുപത്രിയില്‍ കാന്റീന്‍ നടത്തുന്ന യുവാവ് 790 പോയിന്റുകള്‍ നേടിയാണ് ഒന്നാമതെത്തിയത്.
ഐപിഎല്‍ ഈ സീസണിന്റെ മുഖ്യ സ്‌പോണ്‍സര്‍മാരാണ് ഡ്രീം ഇലവന്‍. 222 കോടി രൂപക്കാണ് കരാര്‍. അണ്‍അക്കാദമി, ടാറ്റ എന്നിവരെയൊക്കെ പിന്തള്ളിയാണ് ഡ്രീം ഇലവന്‍ ഒരു വര്‍ഷത്തെ ഐപിഎല്‍ മുഖ്യ സ്‌പോണ്‍സര്‍ഷിപ്പ് അവകാശം സ്വന്തമാക്കിയത്. ചൈനയുമായി തുടരുന്ന രാഷ്ട്രീയ പ്രശ്‌നങ്ങള്‍ക്കിടയിലും ചൈനീസ് കമ്പനിയായ വിവോയുമായി സ്‌പോണ്‍സര്‍ഷിപ്പ് തുടരുമെന്നറിയിച്ച ബിസിസിഐക്കെതിരെ പ്രതിഷേധം ഉയര്‍ന്നിരുന്നു. ഇതിന്റെ പശ്ചാത്തലത്തിലാണ് വിവോയെ മുഖ്യ സ്‌പോണ്‍സര്‍ സ്ഥാനത്തു നിന്ന് നീക്കി പുതിയ ബിഡ് ക്ഷണിക്കുകയായിരുന്നു. അണ്‍അക്കാദമി 210 കോടി രൂപയും ടാറ്റ സണ്‍സ് 180 കോടി രൂപയുമാണ് ഐപിഎല്‍ സ്‌പോണ്‍സര്‍ഷിപ്പിനായി മുന്നോട്ടുവച്ചത്. മലയാളി സംരംഭകന്‍ ബൈജു രവീന്ദ്രന്റെ ബൈജൂസ് ആപ്പ് 125 കോടി രൂപയും മുന്നോട്ടുവച്ചിരുന്നു. എന്നാല്‍, ഇന്ത്യന്‍ ദേശീയ ടീം മുഖ്യ സ്‌പോണ്‍സര്‍ കൂടിയായ ബൈജുസ് ഉള്‍പ്പെടെയുള്ളവരുടെ പ്രപ്പോസല്‍ 222 കോടി രൂപയുമായി ഡ്രീം ഇലവന്‍ മറികടക്കുകയായിരുന്നു. മുന്‍ സ്‌പോണ്‍സര്‍മാരായിരുന്ന വിവോ 420 കോടി രൂപയാണ് പ്രതിവര്‍ഷം നല്‍കിയിരുന്നത്.