വി.മുരളീധരന് കേന്ദ്രമന്ത്രി സ്ഥാനം നഷ്ടമായേക്കും, പ്രോട്ടോകോള്‍ ലംഘന വിഷയം ചര്‍ച്ച ചെയ്യാന്‍ ബി.ജെ.പി കേന്ദ്ര നേതൃത്വം

കേന്ദ്ര വിദേശകാര്യ സഹമന്ത്രി വി. മുരളീധരന്‍ നടത്തിയ പ്രോട്ടോക്കോള്‍ ലംഘനം ബിജെപി ദേശീയ നേതൃത്വത്തിലും ചര്‍ച്ചയാകുന്നു. പ്രധാനമന്ത്രിയുടെ ഓഫീസില്‍ വരെ പരാതി എത്തിയതോടെ ഇത് ആയുധമാക്കി മുരളീധരനെതിരെയുള്ള നീക്കം ശക്തമാക്കുകയാണ് ഒരു വിഭാഗം. കേന്ദ്രമന്ത്രിസഭാപുനഃസംഘടനാ ചര്‍ച്ചകള്‍ കൂടി സജീവമാകുന്ന സമയത്താണ് പ്രോട്ടോക്കോള്‍ വിവാദം വി മുരളീധരനെതിരെ ഉയരുന്നത്. യുഎഇയിലെ മന്ത്രിതലയോഗത്തില്‍ പ്രോട്ടോക്കോള്‍ ലംഘിച്ച് മഹിളാ മോര്‍ച്ച നേതാവ് സ്മിത മേനോന്‍ പങ്കെടുത്ത സംഭവത്തില്‍ പ്രധാനമന്ത്രിയുടെ ഓഫീസില്‍ പരാതി എത്തിയതോടെ സംഭവം ഗുരുതരമെന്നാണ് പാര്‍ട്ടി കേന്ദ്ര നേതൃത്വത്തിലെ ചില നേതാക്കളുടെ അഭിപ്രായം. ദേശീയ നേതാക്കള്‍ക്കിടയില്‍ ഇത് ഗൗരവചര്‍ച്ചയായി മാറിയിട്ടുണ്ട്. മന്ത്രിമാരുടെ പ്രവര്‍ത്തനങ്ങള്‍ സര്‍ക്കാരിന്റെ പ്രതിച്ഛായയെ ബാധിക്കരുതെന്ന കര്‍ശനനിര്‍ദ്ദേശം പ്രധാനമന്ത്രി നരേന്ദ്ര മോദി നല്‍കിയിരുന്നു. ജനങ്ങള്‍ക്കിടയില്‍ അവമതിപ്പുണ്ടാക്കരുതെന്ന പ്രധാനമന്ത്രിയുടെ ആ നിര്‍ദ്ദേശം മുരളീധരന്‍ ലംഘിച്ചെന്നാണ് വിമര്‍ശനം. പ്രധാനമന്ത്രിയുടെ ഓഫീസില്‍ കിട്ടിയ പരാതി വിദേശകാര്യമന്ത്രാലയത്തിന് അയച്ചിരുന്നു. അതേസമയം പ്രധാനമന്ത്രിയുടെ ഓഫീസ് ഇക്കാര്യത്തില്‍ വിശദീകരണം തേടി എന്ന റിപ്പോര്‍ട്ടുകള്‍ വിദേശകാര്യ മന്ത്രാലയം സ്ഥിരീകരിക്കുന്നില്ല.
''അത്തരത്തില്‍ എന്തെങ്കിലും ഒരു ആശയവിനിമയത്തെ കുറിച്ച് അറിയില്ല'', എന്നാണ് വിദേശകാര്യവക്താവ് അനുരാഗ് ശ്രീവാസ്തവ വ്യക്തമാക്കിയത്.എ.പി. അബ്ദുള്ളക്കുട്ടി പാര്‍ട്ടി ഉപാദ്ധ്യക്ഷ സ്ഥാനത്ത് എത്തിയതിന് പിന്നില്‍ മുരളീധരന്റെ ഇടപെടലാണെന്ന ആരോപണങ്ങള്‍ക്കിടെയാണ് പ്രോട്ടോക്കോള്‍ വിവാദവും ഉയര്‍ന്നിരിക്കുന്നത്. പാര്‍ട്ടി പുനഃസംഘടനയില്‍ ബി എല്‍ സന്തോഷ്, ധര്‍മ്മേന്ദ്രപ്രധാന്‍ ഉള്‍പ്പെട്ട വിഭാഗം മുരളീധരപക്ഷത്തിന് വേണ്ടി കേന്ദ്ര നേതൃത്വത്തെ തെറ്റിദ്ധരിപ്പിച്ചുവെന്ന ആരോപണവും ഉണ്ട്.