ചൊവ്വാഴ്ച ചുവന്ന ചൊവ്വയെ കാണാം

ചൊവ്വാഴ്ച ചൊവ്വാ ഗ്രഹത്തെ അത്യധികം ശോഭയില്‍ കാണാന്‍ അപൂര്‍വ്വ അവസരം. ചൊവ്വ ഭൂമിയുമായി നേര്‍ക്കു നേര്‍ വരുന്നതിനാലാണിത്. ഇനി ഇത്തരം ഒരു അവസരം 2035ല്‍ മാത്രമേ ലഭ്യമാകൂ. ഭൂമി മധ്യത്തിലും സൂര്യനും മറ്റേതെങ്കിലും ഒരു ഗ്രഹം എതിര്‍ ദിശയിലും നേര്‍രേഖയില്‍ വരുന്ന പ്രതിഭാസമാണ് ഓപ്പോസിഷന്‍. ഓപ്പോസിഷന്‍ സംഭവിക്കുന്ന ഗ്രഹം സൂര്യാസ്തമയത്തോടെ കിഴക്കുദിക്കും. പാതിരാത്രിയോടെ ഉച്ചിയിലെത്തും. പിറ്റേന്ന് പുലര്‍ച്ചെ സൂര്യോദയസമയത്ത് പടിഞ്ഞാറ് അസ്തമിക്കുകയും ചെയ്യും. അതിനാല്‍ രാത്രി മുഴുവന്‍ അതിനെ കാണാനൊക്കും. ഓപ്പോസിഷനില്‍ വരുന്നതിനാല്‍ 13 ന് രാത്രി മുഴുവന്‍ അത്യധിക ശോഭയില്‍ ചൊവ്വയെ നഗ്നനേത്രങ്ങള്‍ കൊണ്ട് കാണാനാകുമെന്ന് വാനനിരീക്ഷകര്‍ പറയുന്നു. സൂര്യാസ്തമയത്തോടെ കിഴക്ക് ഉദിക്കുമെങ്കിലും ചക്രവാള ശോഭ മായുകയും ചൊവ്വ അല്‍പം ഉയരുകയും ചെയ്താലേ നഗ്നനേത്രങ്ങള്‍ കൊണ്ട് ദൃശ്യമാകൂ. ഒരു മണിക്കൂറില്‍ ഏകദേശം 15 ഡിഗ്രി വീതം ഉയരുന്ന ചൊവ്വ, രാത്രി 12.00 മണിയോടെ ഉച്ചിയിലെത്തും. ഈ ദിവസം രാത്രി സമയത്ത് ചൊവ്വയോളം തിളക്കമുള്ള ഒരു വസ്തു ആകാശത്തുണ്ടാവില്ല എന്നതും ചൊവ്വയുടെ ചുവന്ന നിറവും വേഗത്തില്‍ തിരിച്ചറിയാന്‍ സഹായിക്കും.ഗോളാകൃതിയുള്ള ഗ്രഹങ്ങളുടെ ഒരു പകുതിയില്‍ എല്ലായ്പ്പോഴും സൂര്യപ്രകാശം വീഴും. സൂര്യപ്രകാശം വീഴുന്ന ഭാഗം എല്ലായ്പ്പോഴും പൂര്‍ണമായും ഭൂമിക്ക് അഭിമുഖമാവണമെന്നില്ല. എന്നാല്‍ ഓപ്പോസിഷന്‍ ദിനങ്ങളില്‍ ഗ്രങ്ങളുടെ സൂര്യപ്രകാശം ഏല്‍ക്കുന്ന ഭാഗം പൂര്‍ണമായും ഭൂമിക്കഭിമുഖമായി വരുന്നു. അതു കൊണ്ടാണ് അവയെ അന്ന് അത്യധിക ശോഭയില്‍ കാണുന്നത്. ഓപ്പോസിഷനോടടുത്തുള്ള ദിവസങ്ങളിലും സാമാന്യം നല്ല ശോഭയിലാണ് ഗ്രഹങ്ങളെ കാണുക. അതിനാല്‍ ഒക്ടോബര്‍ രണ്ട്, മൂന്ന് വാരങ്ങള്‍ മുഴുവന്‍ ചൊവ്വയെ നല്ല തിളക്കത്തില്‍ തന്നെ കാണാം.
1.88 വര്‍ഷം കൊണ്ടാണ് ചൊവ്വ സൂര്യനെ ചുറ്റുന്നത്. അതിനാല്‍ ചൊവ്വയുടെ ഓപ്പാസിഷന്‍ ഒരു അത്യപൂര്‍വ പ്രതിഭാസമല്ല. എന്നാല്‍ ചൊവ്വ സൂര്യനെ ചുറ്റുന്ന തലവും ഭൂമി സൂര്യനെ ചുറ്റുന്ന തലവും തമ്മിലുള്ള ചരിവു കാരണം കൃത്യമായ ഓപ്പാസിഷന്‍ വിരളമായേ വരൂ. അതിനാല്‍ ഇത്രയും തിളക്കമേറിയ ചൊവ്വയെ ഇനി 2035 ലേ കാണാനൊക്കൂ. ഇപ്പോള്‍ സന്ധ്യാനേരത്ത് വ്യാഴം, ശനി എന്നീ ഗ്രഹങ്ങളെയും നഗ്നനേത്രങ്ങള്‍ കൊണ്ട് കാണാനൊക്കും. രാത്രി 8.00 മണിക്ക് തലക്ക് മുകളില്‍ നിന്നും ഏകദേശം 30 ഡിഗ്രി തെക്കായി അത്യധികം ശോഭയുള്ള രണ്ട് പ്രകാശ ബിന്ദുക്കള്‍ കാണാം. ഇവയില്‍ പടിഞ്ഞാറുള്ളത് വ്യാഴവും കിഴക്കുള്ളത് ശനിയുമാണ്.