ബിജെപിയില്‍ പോര് രൂക്ഷം, മുരളീധരന്‍ പങ്കെടുത്ത യോഗം ശോഭ സുരേന്ദ്രന്‍ ബഹിഷ്‌കരിച്ചു

ബിജെപിയില്‍ നേതാക്കള്‍ക്കിടയില്‍ പോര് രൂക്ഷം. കേന്ദ്ര മന്ത്രി വി മുരളീധരനെതിരെ മുതിര്‍ന്ന നേതാക്കള്‍ പരസ്യമായി രംഗത്തുവന്നു. തദ്ദേശ, നിയമസഭാ തിരഞ്ഞെടുപ്പുകളുടെ ഒരുക്കത്തിന്റെ ഭാഗമായി മേഖലാ യോഗങ്ങള്‍ നടത്തിവരികയാണ് ബിജെപി. ഇതിന്റെ ഭാഗമായി മുരളീധരന്‍ പങ്കെടുത്ത സുപ്രധാന യോഗം ശോഭ സുരേന്ദ്രന്‍ ഉള്‍പ്പെടെയുള്ളവര്‍ ബഹിഷ്‌കരിച്ചു.അതേസമയം, ശോഭാ സുരേന്ദ്രന്‍ വിളിച്ച ഗ്രൂപ്പ് യോഗത്തില്‍ മിക്ക സംസ്ഥാന-ജില്ലാ നേതാക്കളും പങ്കെടുക്കുകയും ചെയ്തു.കോട്ടയത്തും തൃശൂരിലും ഇത്തരം പ്രതിഷേധം പ്രകടമായി.തൃശൂരിലെ മേഖലാ യോഗത്തില്‍ നിന്ന് സംസ്ഥാന വൈസ് പ്രസിഡന്റ് ശോഭ സുരേന്ദ്രന്‍, മുന്‍ സംസ്ഥാന അധ്യക്ഷന്‍ സികെ പത്മനാഭന്‍ എന്നിവര്‍ വിട്ടുനിന്നു.
സംസ്ഥാന അധ്യക്ഷ പദവിയിലേക്ക് കെ സുരേന്ദ്രനെ തിരഞ്ഞെടുത്തത് മുതല്‍ ബിജെപിയില്‍ പോര് രൂക്ഷമാണ്. വി മുരളീധരന്റെ ഇടപെടല്‍ മൂലമാണ് സുരേന്ദ്രന്‍ അധ്യക്ഷനായത് എന്നാണ് ആരോപണം. സംസ്ഥാന അധ്യക്ഷ പദവിയിലെത്തുമെന്ന് കരുതിയ ശോഭാ സുരേന്ദ്രന് വൈസ് പ്രസിഡന്റ് പദവിയാണ് ലഭിച്ചത്.ഇതോടെ അവര്‍ പ്രധാന പരിപാടികളില്‍ നിന്ന് വിട്ടുനില്‍ക്കുകയാണ് ശോഭാ സുരേന്ദ്രന്‍. ആര്‍ എസ് എസിന്റെ പല ആവിശ്യങ്ങളും പരിഗണിക്കപ്പെടുന്നില്ല എന്നതാണ് വിമര്‍ശനം. മിസോറാം ഗവര്‍ണറായിരുന്ന മുതിര്‍ന്ന ബിജെപി നേതാവ് കുമ്മനം രാജശേഖരനെ വീണ്ടും സംസ്ഥാന അധ്യക്ഷനാക്കണം എന്ന ആവശ്യവും പരിഗണിക്കപ്പെട്ടിട്ടില്ല.
പുനഃസംഘടനയില്‍ സംസ്ഥാനത്ത് നിന്നുള്ള പ്രധാനികളെ പരിഗണിക്കണമെന്ന് ആര്‍എസ്എസ് ആവശ്യപ്പെട്ടിരുന്നു. ശോഭാ സുരേന്ദ്രനെ ദേശീയ വനിതാ കമ്മീഷന്‍ അധ്യക്ഷയാക്കുമെന്നും വാര്‍ത്തകള്‍ വന്നിരുന്നു. രണ്ടും സംഭവിച്ചില്ല. ഇവയെല്ലാം നേതാക്കള്‍ക്കിടയില്‍ ചേരിതിരിവിന് ഇടയാക്കിയിട്ടുണ്ട്.