നഷ്ടമായത് ഉറച്ച മനുഷ്യസ്‌നേഹിയെ- എം.വി.ശ്രേയാംസ് കുമാര്‍

വിശ്വാസവഴിയില്‍ അടിയുറച്ച് പോകുമ്പോഴും സമൂഹം നേരിടുന്ന ഒട്ടേറെ വിഷയങ്ങളില്‍ പരിഹാരം കാണാന്‍ ശ്രമിച്ച മനുഷ്യസ്‌നേഹിയായിരുന്നു കാലംചെയ്ത ഡോ. ജോസഫ് മാര്‍ത്തോമ്മ മെത്രാപ്പോലീത്തയെന്ന് ലോക് താന്ത്രിക് ജനതാദള്‍(എല്‍.ജെ.ഡി.) സംസ്ഥാന അധ്യക്ഷന്‍ എം.വി. ശ്രേയാംസ് കുമാര്‍ എം.പി.ദുരിതമനുഭവിക്കുന്ന മനുഷ്യര്‍ക്ക് സഹായമെത്തിക്കാന്‍ മാര്‍ത്തോമ്മ സഭയുടെ അധ്യക്ഷസ്ഥാനത്തായിരിക്കുമ്പോഴും അതിനു മുമ്പും അദ്ദേഹം മുന്‍പന്തിയിലുണ്ടായിരുന്നു. വിവിധ സംസ്ഥാനങ്ങളില്‍ ഭൂകമ്പങ്ങളില്‍ ദുരിതമനുഭവിച്ചവര്‍ക്ക് ആശ്വാസവുമായി അദ്ദേഹമെത്തി. പശ്ചിമബംഗാളിലും ഒഡിഷയിലും വെളളപ്പൊക്ക കെടുതികളില്‍ അലഞ്ഞവര്‍ക്ക് ദുരിതാശ്വാസവുമായി സഭ നീങ്ങിയത് ഡോ.ജോസഫ് മെത്രാപ്പോലീത്തയുടെ നേതൃത്വത്തിലായിരുന്നു. സുനാമി ദുരന്തം നേരിട്ടവര്‍ക്കും അദ്ദേഹം നേരിട്ടെത്തി കൈത്താങ്ങായി. പ്രളയത്തിലെ ഇരകള്‍ക്ക് 100 വീടുകളെന്ന ആശയം അദ്ദേഹമാണ് നടപ്പാക്കിയത്.
ട്രാന്‍സ്‌ജെന്‍ഡറുകളുടെ അവകാശങ്ങള്‍ക്ക് മെത്രാപ്പോലീത്ത സംസാരിച്ചത് പിന്നീട് ഭരണകൂടങ്ങള്‍ക്കും പ്രചോദനമായി. ഈ വിഭാഗത്തിനായി സഭ പ്രത്യേക പദ്ധതികള്‍ ആവിഷ്‌കരിച്ചത് ഏറെ ചര്‍ച്ചചെയ്യപ്പെട്ടിരുന്നു. മുംബൈയിലെ ചുവന്നതെരുവിലെ ആശ്രയമില്ലാത്ത കുഞ്ഞുങ്ങള്‍ക്കു വേണ്ടി നവജീവന്‍ പ്രസ്ഥാനത്തിനു തുടക്കമിട്ടതും രാജ്യം ശ്രദ്ധിച്ച നീക്കമായിരുന്നു. സഭയുടെ നേതൃത്വത്തില്‍ നടക്കുന്ന നൂറ്റാണ്ട് പിന്നിട്ട മാരാമണ്‍ കണ്‍വെന്‍ഷനില്‍ രാത്രിയോഗങ്ങള്‍ക്ക് സ്ത്രീകള്‍ക്കുണ്ടായിരുന്ന വിലക്ക് നീക്കിയത് ഡോ. ജോസഫ് മെത്രാപ്പോലീത്തയാണ്. ഇതിനായി അദ്ദേഹം കണ്‍വെന്‍ഷന്റെ സമയക്രമം പരിഷ്‌കരിച്ചുവെന്നും ശ്രേയാംസ് കുമാര്‍ അനുസ്മരിച്ചു.