ശിവശങ്കറിന്റെ ജാമ്യം നീട്ടി , വിധി 28 ന്

സ്വര്‍ണക്കടത്ത് കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെ അടുത്ത ബുധനാഴ്ച വരെ അറസ്റ്റ് ചെയ്യുന്നതില്‍നിന്ന് തടഞ്ഞ് ഹൈക്കോടതി. ശിവശങ്കറിന്റെ മുന്‍കൂര്‍ ജാമ്യാപേക്ഷ അനുവദിക്കരുതെന്ന് ആവശ്യപ്പെട്ടുള്ള കസ്റ്റംസിന്റെയും എന്‍ഫോഴ്‌സ്‌മെന്റ് ഡയറക്ടറേറ്റിന്റെയും (ഇഡി) വാദം കേട്ട ശേഷം 28ന് വിധി പറയാന്‍ മാറ്റി വച്ചാണ് കോടതി നിര്‍ദേശം.

കള്ളപ്പണം വെളുപ്പിക്കുന്നതിനുള്ള ഒരു തരത്തിലുള്ള സഹായവും തന്റെ കക്ഷിയുടെ ഭാഗത്തു നിന്ന് ഉണ്ടായിട്ടില്ലെന്ന് ശിവശങ്കറിനു വേണ്ടി അഭിഭാഷകന്‍ വാദിച്ചു. ഇക്കാര്യം ഇഡിയുടെ സ്റ്റേറ്റ്‌മെന്റിലും വ്യക്തമാണ്. പങ്കില്ലാത്ത കാര്യങ്ങള്‍ ക്രിമിനല്‍ ഇടപെടലുകളായി കൊട്ടിഘോഷിക്കുകയാണ്. പരിചയം ഉള്ള ഒരാളെ ചാര്‍ട്ടേഡ് അക്കൗണ്ടന്റിന് പരിചയപ്പെടുത്തുക മാത്രമാണ് ഉണ്ടായത്. ഇതിനിടെ 100 മണിക്കൂറിലേറെ വിവിധ ഏജന്‍സികള്‍ ചോദ്യം ചെയ്തു കഴിഞ്ഞു.

നിരവധി മണിക്കൂറുകള്‍ യാത്ര ചെയ്താണ് ചോദ്യം ചെയ്യലിന് ഹാജരാകുന്നത്. ഇത് ശാരീരികമായും മാനസികമായും തളര്‍ത്തി. ചെറിയ കാര്യങ്ങളുടെ പേരിലാണ് താന്‍ സഹകരിച്ചില്ല എന്നു പറയുന്നത്. 2018ലെ വാട്‌സാപ് മെസേജുകളെക്കുറിച്ച് ചോദിച്ചാല്‍ ഇപ്പോള്‍ എങ്ങനെയാണ് മറുപടി നല്‍കുക?
താന്‍ എല്ലാവരുടെയും മുന്‍പില്‍ വെറുക്കപ്പെട്ടവനായെന്നു ം.ശിവശങ്കര്‍ പറഞ്ഞു . ഹോട്ടലുകളില്‍ മുറിപോലും കിട്ടുന്നില്ല.

ആരോപണങ്ങള്‍ ഔദ്യോഗിക, സ്വകാര്യ ജീവിതങ്ങളെ ബാധിച്ചു. തനിക്ക് പങ്കില്ലാത്ത കാര്യങ്ങളിലാണ് ആരോപണങ്ങള്‍. പരിചയം ഉള്ളയാളെ ചാര്‍ട്ടേഡ് അക്കൗണ്ടന്റിനു പരിചയപ്പെടുത്തുക മാത്രമാണ് ചെയ്തത്.

താന്‍ അന്വേഷണത്തോടു സഹകരിക്കുന്നില്ലെന്ന വാദം ശരിയല്ല. ഇതുവരെ 100 മണിക്കൂറിലധികം ചോദ്യം ചെയ്തു. കേസ് ഏതെന്ന് വ്യക്തമാക്കാതെയാണ് ചോദ്യം ചെയ്യലിനുള്ള കസ്റ്റംസിന്റെ നോട്ടിസെന്നും ശിവശങ്കര്‍ വ്യക്തമാക്കി.

ഹൈക്കോടതിയില്‍ നിന്നുള്ള വിധി കേസിനും ശിവശങ്കറിനും നിര്‍ണായകമാകും.