കായിക മേഖലയിലെ നിര്‍മ്മാണ പ്രവൃത്തികള്‍ ഫെബ്രുവരിയോടെ പൂര്‍ത്തിയാക്കുമെന്ന് മന്ത്രി ഇ.പി.ജയരാജന്‍

സംസ്ഥാനത്ത് കായിക മേഖലയുമായി ബന്ധപ്പെട്ട മുഴുവന്‍ നിര്‍മ്മാണ പ്രവൃത്തികളും 2021 ഫെബ്രുവരിയില്‍ പൂര്‍ത്തിയാക്കുമെന്ന് കായിക വകുപ്പ് മന്ത്രി ഇ.പി.ജയരാജന്‍ പറഞ്ഞു.  വടകര നാരായണ നഗരത്ത് ആരംഭിക്കുന്ന ഇന്‍ഡോര്‍ സ്റ്റേഡിയത്തിന്റെ പ്രവൃത്തി ഉദ്ഘാടനം ഓണ്‍ലൈനില്‍ നിര്‍വഹിച്ച് സംസാരിക്കുകയായിരുന്നു മന്ത്രി.  കേരളത്തില്‍ 1000 കോടി രൂപയുടെ നിര്‍മ്മാണ പ്രവൃത്തികളാണ് കായിക വകുപ്പ്  കിഫ്ബി മുഖേനനടത്തുന്നത്.  കേരളം കായിക മേഖലയില്‍ ഒന്നാം സ്ഥാനത്തേക്ക് കുതിക്കുകയാണ്.  കായികമേഖലയിലെ അടിസ്ഥാന സൗകര്യ വികസനത്തിന് പ്രാധാന്യം നല്‍കും. വടകരയില്‍ കളരി അക്കാദമി സ്ഥാപിക്കാന്‍ കഴിഞ്ഞ ബജറ്റില്‍ തുക നീക്കിവെച്ചിട്ടുണ്ട്.  അതിനുള്ള നടപടികള്‍ വേഗത്തിലാക്കും.  പുത്തൂര്‍ വിഎച്ച്എസ്‌സി സ്‌കൂളില്‍ വോളിബാള്‍ കോര്‍ട്ടിന് 15 ലക്ഷം രൂപ അനുവദിച്ചിട്ടുണ്ട്.  440 കായിക താരങ്ങള്‍ക്കാണ് സ്‌പോര്‍ട്‌സ് ക്വാട്ടയില്‍ ജോലി നല്‍കിയത്.  ഒളിമ്പിക് ജേതാവായ മാനുവല്‍ഫെഡറിക്കിന് 42 ലക്ഷം രൂപയുടെയും സന്തോഷ് ട്രോഫി ജേതാവ് കെ.വി.രാഹുലിന് 15 ലക്ഷത്തിന്റേയും കായികതാരം ആര്യശ്രീക്ക് 10 ലക്ഷത്തിന്റേയും  വീട് വെച്ചു നല്‍കി.  പ്ലേ ഫോര്‍ ഹെല്‍ത്തിന് 25 വിദ്യാലയങ്ങള്‍ തെരഞ്ഞെടുത്തു.  കായിക രംഗത്തു നാലരവര്‍ഷം കൊണ്ട് സമാനതകളില്ലാത്ത മാറ്റങ്ങളും വികസനവുമാണ് ഉണ്ടായിട്ടുള്ളതെന്ന് മന്ത്രി പറഞ്ഞു. 
 വടകരയില്‍ നിര്‍മ്മിക്കുന്ന ഇന്‍ഡോര്‍ സ്റ്റേഡിയത്തിന്റെ പണി ഒരു വര്‍ഷം കൊണ്ട് പൂര്‍ത്തിയാക്കാനാണ് ലക്ഷ്യമിടുന്നത്.  ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിക്കാണ് നിര്‍മാണ ചുമതല.  നാരായണ നഗരത്ത് നടന്ന ചടങ്ങില്‍ സി.കെ.നാണു എംഎല്‍എ അധ്യക്ഷത വഹിക്കുകയും  ശിലാഫലകം അനാച്ഛാദനം ചെയ്യുകയും ചെയ്തു.  മുന്‍സിപ്പല്‍ ചെയര്‍മാന്‍ കെ.ശ്രീധരന്‍ സ്വാഗതം പറഞ്ഞു.  വാര്‍ഡ് കൗണ്‍സിലര്‍ എം.ബിജു പങ്കെടുത്തു