കെ സുരേന്ദ്രന്‍ തന്നെ രാഷ്ട്രീയമായി ഇല്ലായ്മ ചെയ്യാന്‍ ശ്രമിക്കുന്നു, കടുത്ത ആരോപണവുമായി ശോഭാ സുരേന്ദ്രന്‍

ബിജെപി സംസ്ഥാന അധ്യക്ഷന്‍ കെ സുരേന്ദ്രനെതിരെ കടുത്ത ആരോപണവുമായി ശോഭാ സുരേന്ദ്രന്‍, കെ സുരേന്ദ്രന്‍ തന്നെ രാഷ്ട്രീയമായി ഇല്ലായ്മ ചെയ്യാന്‍ ശ്രമിക്കുന്നുവെന്നും മാറിനിന്നിട്ടും ആക്രമിക്കുകയാണെന്നും ശോഭ ആരോപിച്ചു. ഇക്കാര്യം കാട്ടി ബിജെപി ദേശീയ അധ്യക്ഷന്‍ ജെപി നദ്ദക്ക് ശോഭാ സുരേന്ദ്രന്‍ പരാതി നല്‍കി, ഇതോടെ ബിജെപിയിലെ പൊട്ടിത്തെറി പരിപൂര്‍ണമായും കൈവിട്ട സ്ഥിതിയായി. തന്റെ വളര്‍ച്ച കെ സുരേന്ദ്രന് ഭീഷണിയാകും എന്ന് കണ്ടാണ് ഒതുക്കാന്‍ ശ്രമിക്കുന്നത്, മുന്‍പ് പാര്‍ട്ടിയില്‍ വഹിച്ചിരുന്ന സ്ഥാനങ്ങളില്‍ നിന്ന് തന്നെ തരംതാഴ്ത്തി എന്നിങ്ങനെയാണ് ശോഭയുടെ പരാതികള്‍, വളരെ ചെറിയ പ്രായത്തില്‍ തന്നെ ബിജെപിയുമായി ബന്ധപ്പെട്ട പ്രവര്‍ത്തനങ്ങള്‍ ആരംഭിച്ച ശോഭ താന്‍ മത്സരിച്ച മണ്ഡലങ്ങളില്‍ ബിജെപിക്ക് വന്ന നേട്ടങ്ങള്‍ ചൂണ്ടിക്കാട്ടിയും പാര്‍ട്ടിയിലെ തന്റെ പ്രവര്‍ത്തനങ്ങള്‍ കാണിച്ചുമാണ് പരാതിയുമായി കേന്ദ്ര നേതൃത്വത്തെ സമീപിച്ചത്. കെ സുരേന്ദ്രന്‍ ബിജെപി സംസ്ഥാന അധ്യക്ഷനായതില്‍ പല നേതാക്കള്‍ക്കും കടുത്ത അമര്‍ഷമുണ്ട്, സുരേന്ദ്രന്‍ ചുമതല ഏറ്റെടുത്തതിന് പിന്നാലെ ബിജെപിയില്‍ ഗ്രൂപ്പ് വഴക്ക് വീണ്ടും ആരംഭിച്ചു, നിലവിലുള്ള ഗ്രൂപ്പുകള്‍ പോരാത്തതിന് ശോഭാ സുരേന്ദ്രന്‍ പുതിയ ഗ്രൂപ്പ് രൂപീകരിക്കുകയും ചെയ്തു, ശോഭയെ അനുകൂലിക്കുന്ന നിരവധി പേര്‍ ഇക്കഴിഞ്ഞ ദിവസം പാലക്കാട് ജില്ലാ കമ്മിറ്റിയില്‍ നിന്ന് രാജി വെക്കുകയുണ്ടായി.