കെ സുരേന്ദ്രനെതിരെ വീണ്ടും ബിജെപിയില്‍ പട

ബിജെപി സംസ്ഥാന അധ്യക്ഷന്‍ കെ സുരേന്ദ്രനെതിരെ പാളയത്തില്‍ പട അവസാനിക്കുന്നില്ല, സുരേന്ദ്രന്‍ ബിജെപി അധ്യക്ഷനായാല്‍ തന്നെ ഉപാധ്യക്ഷനായി തുടരാന്‍ അനുവദിക്കുമെന്ന് വാക്കുനല്‍കിയ ശേഷം വഞ്ചിച്ചുവെന്ന് മുന്‍ ഉപാധ്യക്ഷന്‍ പി എം വേലായുധന്‍ ആരോപിച്ചു. റിപ്പോര്‍ട്ടര്‍ ടിവിയുടെ ക്‌ളോസ് എന്‍കൗണ്ടര്‍ പരിപാടിയിലാണ് അദ്ദേഹം ഇങ്ങനെ ആരോപിച്ചത്, തന്നെയും ശ്രീശനെയും ഉപാധ്യക്ഷ സ്ഥാനത്ത് തുടരാന്‍ അനുവദിക്കുമെന്നാണ് സുരേന്ദ്രന്‍ വാക്കുനല്‍കിയത്, എന്നാല്‍ ആ വാക്ക് പാലിക്കാത്ത വഞ്ചകനാണ് സുരേന്ദ്രന്‍, അദ്ദേഹം പറഞ്ഞു. കേന്ദ്ര നേതൃത്വം അധ്യക്ഷന്‍ സ്ഥാനത്തേക്ക് രണ്ടുപേരെയാണ് നിര്‍ദേശിച്ചത്, സുരേന്ദ്രന്‍ സഹായിക്കണം എന്നാവശ്യപ്പെട്ടത് കൊണ്ട് അദ്ദേഹത്തിന് വേണ്ടി പ്രവര്‍ത്തിച്ചു, എന്നാല്‍ കാര്യം കഴിഞ്ഞപ്പോള്‍ സുരേന്ദ്രന്‍ തഴഞ്ഞു, താന്‍ ദളിത് വിഭാഗത്തില്‍ പെട്ട ആളായത് കൊണ്ടാണോ തഴഞ്ഞതെന്ന് മനസിലാവുന്നില്ല, വേലായുധന്‍ ആരോപിച്ചു.
സുരേന്ദ്രന്‍ തന്നെ ഒതുക്കാന്‍ ശ്രമിക്കുന്നു എന്നാരോപിച്ച് ബിജെപിയുടെ തീപ്പൊരി നേതാവ് ശോഭാ സുരേന്ദ്രന്‍ നേരത്തെ രംഗത്ത് വന്നിരുന്നു, സുരേന്ദ്രനെതിരെ ശോഭ പ്രത്യേകം ഗ്രൂപ്പുണ്ടാക്കുകയും ചെയ്തു. ശോഭാ സുരേന്ദ്രന്‍ ബിജെപി വിട്ടേക്കും എന്ന് പ്രചരിക്കുന്നുണ്ട്.