ആറ് വയസുകാരി ക്രൂരമായി പീഡിപ്പിച്ചക്കേസില്‍ ഒരാള്‍ കസ്റ്റഡിയില്‍

കോഴിക്കോട് ഉണ്ണികുളം പഞ്ചായത്തിലെ വള്ളിയോത്ത് ആറ് വയസുകാരിക്കു ക്രൂരമായ പീഡനം. കുട്ടിയെ രക്തം വാര്‍ന്ന നിലയില്‍ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.സംഭവുമായി ബന്ധപ്പെട്ട് പ്രദേശത്ത് താമസിക്കുന്ന ഇതര സംസ്ഥാന തൊഴിലാളിയെ പൊലീസ് കസ്റ്റഡിയിലെടുത്തു. ക്വാറി തൊഴിലാളികളായ നേപ്പാളി സ്വദേശികളായ ദമ്പതികളുടെ മകളാണ് പീഡനത്തിനിരയായത്.മാതാപിതാക്കള്‍ വീട്ടില്‍ ഇല്ലാത്ത സമയത്താണ് പീഡനം നടന്നത്. പകല്‍ സമയത്താണ് പീഡനം നടന്നതെന്ന് കരുതുന്നു. രാത്രിയില്‍ പിതാവ് വീട്ടിലെത്തിയപ്പോള്‍ രക്തം വാര്‍ന്ന നിലയില്‍ കുട്ടിയെ കാണുകയായിരുന്നു. പീഡനത്തിനിരയായ കുട്ടിക്കുപുറമേ മൂന്നരയും ഒന്നരയും വയസുള്ള കുട്ടികളും വീട്ടിലുണ്ടായിരുന്നു. ഈ പ്രദേശത്ത് നേപ്പാള്‍ സ്വദേശികളായ കുറേ പേര്‍ ക്വാറിയില്‍ ജോലി ചെയ്യുന്നുണ്ട്. ഉണ്ണികുളം പതിനഞ്ചാം വാര്‍ഡില്‍ വള്ളിയോത്തെ മാളുര്‍മ്മല്‍ ക്വാറിയിലാണ് ഇവര്‍ പണിയെടുക്കുന്നത്. തൊഴിലാളി കുടുംബങ്ങളെല്ലാം അടുത്തടുത്താണ് താമസം.അടച്ചുറപ്പില്ലാത്ത വീടുകളില്‍ സുരക്ഷിതമല്ലാതെയാണ് ജീവിതം.വടകര റൂറല്‍ എസ്പി ശ്രീനിവാസ്, താമരശ്ശേരി ഡിവൈഎസ്പി പൃഥിരാജ് എന്നിവരുടെ നേതൃത്വത്തില്‍ പൊലീസ് സംഘം സ്ഥലത്തെത്തി അന്വേഷണം ആരംഭിച്ചു. ബാലുശേരി പൊലീസിനാണ് അന്വേഷണ ചുമതല.