കോടതിയില്‍ തിരിച്ചടി നേരിട്ട് ട്രംപ്

ജോര്‍ജിയ, മിഷിഗണ്‍ എന്നീ സംസ്ഥാനങ്ങളിലെ കോടതികളില്‍ ട്രംപ് ക്യാംപ് ഫയല്‍ ചെയ്ത കേസുകള്‍ തള്ളി. ജോര്‍ജിയയില്‍, വൈകി എത്തിയ 53 ബാലറ്റുകള്‍ കൂട്ടിക്കലര്‍ത്തിയെന്നായിരുന്നു ആരോപണം . മിഷിഗണിലും സമാനമായ ആരോപണമാണ് ഉന്നയിച്ചത്.
ഇവിടെ വോട്ടെണ്ണല്‍ തടയാനും ശ്രമിച്ചിരുന്നു. ചോദ്യം ചെയ്യപ്പെട്ട ബാലറ്റുകള്‍ അസാധുവാണെന്നതിന് തെളിവുകളൊന്നുമില്ലെന്ന് ജോര്‍ജിയയിലെ ജഡ്ജി ജെയിംസ് ബാസ് പറഞ്ഞു.
ഇതിനിടെ സ്റ്റേറ്റുകളില്‍ ഡോണള്‍ഡ് ട്രംപിന്റെ ഭൂരിപക്ഷം കുറയുകയും നെവാഡയില്‍ ജോ ബൈഡന്റെ ഭൂരിപക്ഷം വര്‍ധിക്കുകയും ചെയ്യുന്ന സാഹചര്യത്തില്‍ ബൈഡന്‍ ചരിത്ര വിജയത്തിനരികെ എന്നാണു സൂചന. യുഎസിലെ മിക്ക മാധ്യമങ്ങളും ബൈഡന് സാധ്യത സ്ഥിരീകരിക്കുന്ന റിപ്പോര്‍ട്ടുകളാണ് നല്‍കിയത്. നെവാഡയിലെ ആറു വോട്ടുകള്‍ കൂടി ലഭിച്ചാല്‍ 270 എന്ന മാന്ത്രികസംഖ്യ ബൈഡന്‍ സ്വന്തമാക്കും. 538 ഇലക്ടറല്‍ വോട്ടുകളില്‍ 270 ആണ് ഭൂരിപക്ഷത്തിനു വേണ്ടത്. ട്രംപ് പക്ഷത്തിന് 214 ഇലക്ടറല്‍ വോട്ടുകളായി. ഭൂരിപക്ഷത്തില്‍നിന്ന് 56 വോട്ട് കുറവ്. ഇപ്പോള്‍ മുന്നില്‍ നില്‍ക്കുന്ന സ്റ്റേറ്റുകളില്‍ എല്ലാം ജയിച്ചാലും ട്രംപിന് ഭൂരിപക്ഷം നേടാനാകില്ലെന്ന സ്ഥിതി.

ജോര്‍ജിയ (16), നോര്‍ത്ത് കാരലൈന (15), പെന്‍സില്‍വേനിയ (20), അലാസ്‌ക (3) എന്നിവിടങ്ങളിലാണ് ട്രംപ് മുന്നില്‍. ഇവയെല്ലാം ജയിച്ചാലും ലഭിക്കുക 268 വോട്ട്.