അമേരിക്കയില്‍ ഇരു പാര്‍ട്ടിക്കാരും തെരുവില്‍ നേര്‍ക്കുനേര്‍

ട്രംപിന്റെ നീക്കം സ്ഥിതി വഷളമാക്കും,
നേരിടുമെന്ന് ബൈഡന്റെ പ്രഖ്യാപനം; ഉറ്റുനോക്കി ലോകം

അമേരിക്കന്‍ പ്രസിഡന്റ് തെരഞ്ഞെടുപ്പിലെ അനിശ്ചിതത്വം തുടരവേ ഡെമോക്രാറ്റിക് അനുകൂലികളും റിപ്പബ്ലിക്ക് അനുകൂലികളും തെരുവിലിറങ്ങി പ്രതിഷേധിക്കുന്നു. ഓരോ വോട്ടും കര്‍ശനമായി എണ്ണണമെന്നാണ് ഡെമോക്രാറ്റിക് അനുകൂലികളുടെ ആവശ്യം. എന്നാല്‍ വോട്ടെണ്ണല്‍ നിര്‍ത്തി വെയ്ക്കണമെന്നാണ് റിപ്പബ്ലിക്ക് അനുകൂലികള്‍ ആവശ്യപ്പെടുന്നത്. ന്യൂയോര്‍ക്ക്, പോര്‍ട്ട്‌ലാന്റ്, വാഷിംങ്ടണിലെ വൈറ്റ് ഹൌസിന് സമീപം എന്നിവിടങ്ങളില്‍ നിന്ന് നിരവധി പ്രതിഷേധക്കാരെ പൊലീസ് അറസ്റ്റ് ചെയ്തു.
മിഷിഗണില്‍ ജോ ബൈഡന്റെ വിജയ പ്രഖ്യാപനം വന്നപ്പോള്‍ ട്രംപിന്റെ അനുകൂലികള്‍ വോട്ടെണ്ണല്‍ കേന്ദ്രത്തിനു മുന്നില്‍ നിന്ന് ' വോട്ടെണ്ണല്‍ നിര്‍ത്തൂ'' എന്ന ആഹ്വാനങ്ങള്‍ മുഴക്കി. വോട്ടെണ്ണല്‍ നിരീക്ഷിക്കുവാന്‍ അനുവാദമുണ്ടായിരുന്നില്ല എന്നായിരുന്നു റിപ്പബ്ലിക്കന്‍ അനുകൂലികളുടെ പ്രധാന പരാതി. മുഷ്ടിചുരുട്ടിയെത്തിയ പ്രതിഷേധക്കാരെ പോലീസ് കേന്ദ്രത്തില്‍ പ്രവേശിക്കുന്നത് തടയുന്നതായുള്ള വീഡിയോകള്‍ ഇതിനോടകം തന്നെ സോഷ്യല്‍ മീഡിയയില്‍ വ്യാപകമായി കഴിഞ്ഞു.
മിഷിഗണ്‍ സംസ്ഥാനത്തെ ഡെട്രോയിറ്റ് നഗരത്തിലെ വോട്ടെണ്ണല്‍ കേന്ദ്രത്തിനു മുന്നില്‍ നടന്ന പ്രതിഷേധം കൂടുതല്‍ പിരിമുറുക്കമുള്ളതായിരുവെന്നു എഎഫ്പി ഫോട്ടോഗ്രാഫര്‍ പറഞ്ഞു. പോര്‍ട്ട് ലാന്റിലെ ഒരു റാലിയില്‍ തോക്കുമായി ഒരാള്‍ പങ്കെടുക്കുന്നതിന്റെ ചിത്രങ്ങള്‍ അസോസിയേറ്റ് പ്രസ്സ് പുറത്തു വിട്ടിരുന്നു.