കൈവിടരുത് സഹായം തേടി ആര്‍ എസ് എസ് ആസ്ഥാനത്ത്

പാര്‍ട്ടിയിലെ ഗ്രൂപ്പ് പോരില്‍ തങ്ങളെ കൈവിടരുതെന്ന അഭ്ര്‍ത്ഥനയുമായി കെ സുരേന്ദ്രനും , വി മുരളീധരനും കൊച്ചിയില്‍ ആര്‍ എസ് എസ് നേതാക്കളെ കണ്ടു.

ബിജെപി സംസ്ഥാന നേതൃത്വത്തിനെതിരെ മുതിര്‍ന്ന നേതാക്കള്‍ പരസ്യമായി രംഗത്തുവന്ന സാഹചര്യത്തിലാണ് സംസ്ഥാന പ്രസിഡന്റ് കെ സുരേന്ദ്രനും കേന്ദ്രമന്ത്രി വി മുരളീധരനും കൊച്ചിയില്‍ ആര്‍എസ്എസ് ആസ്ഥാനത്തെത്തി ചര്‍ച്ച നടത്തിയത്. സഹായംതേടി എത്തിയ വി മുരളീധരനോട്, അദ്ദേഹത്തിന്റെ പല നിലപാടിലും ആര്‍എസ്എസ് നേതൃത്വം കടുത്ത അസംതൃപ്തി പ്രകടിപ്പിച്ചതായാണ് സൂചന.

വി മുരളീധരനും കെ സുരേന്ദ്രനും നയിക്കുന്ന ഔദ്യോഗിക പക്ഷത്തിനെതിരെ ശോഭ സുരേന്ദ്രനും കെ പി ശ്രീശനും പി എം വേലായുധനും പരസ്യമായി പ്രതികരിച്ചതോടെ ബിജെപിയിലെ ഗ്രൂപ്പുപോര് പൊട്ടിത്തെറിയിലേക്കു നീങ്ങിയിരിക്കുകയാണ്. കൂടാതെ 24 നേതാക്കള്‍ കേന്ദ്ര നേതൃത്വത്തിനു പരാതി നല്‍കുകയും ചെയ്തു.

കേന്ദ്ര നേതൃത്വത്തിന്റെ നിര്‍ുേശം അനുസരിച്ച് ബിജെപി സംസ്ഥാന പ്രസിഡന്റ് കെ സുരേന്ദ്രനെതിരെ പരസ്യമായി പ്രതികരിച്ച ദേശീയ കൗണ്‍സില്‍ അംഗം പി എം വേലായുധനെ അനുനയിപ്പിക്കാന്‍ കേന്ദ്രമന്ത്രി വി മുരളീധരന്‍ നേരിട്ടെത്തി. ശനിയാഴ്ച പകല്‍ 12ന് എറണാകുളം ഗസ്റ്റ് ഹൗസിലായിരുന്നു ഇരുവരുടെയും കൂടിക്കാഴ്ച. കേന്ദ്രമന്ത്രി പരാതികേട്ടതല്ലാതെ മറുപടിയൊന്നും പറഞ്ഞില്ല.

'കാണണമെന്ന് ആവശ്യപ്പെട്ടതനുസരിച്ച് എറണാകുളത്തെത്തി മുരളീധരനെ കണ്ടു. പരാതികള്‍ വിശദമായി പറഞ്ഞു. മറുപടിയൊന്നും അദ്ദേഹം പറഞ്ഞില്ലന്നാണ് --കൂടിക്കാഴ്ചയ്ക്കുശേഷം പി എം വേലായുധന്‍ മാധ്യമങ്ങളോട് പറഞ്ഞത്.