എങ്ങനെ വോട്ടു ചോദിക്കും വീട്ടില്‍ കയറ്റുമോ

തിരഞ്ഞെടുപ്പ് പ്രഖ്യാപനം കഴിഞ്ഞ് സ്ഥാനാര്‍ത്ഥികളെ പ്രഖ്യാപിച്ച് ചിലമേഖലയില്‍ ചുവരെഴുത്തു കഴിഞ്ഞെങ്കിലും താഴേത്തട്ടിലെ പ്രവര്‍ത്തകരെ അലട്ടുന്ന പ്രധാന പ്രശ്‌നം എങ്ങനെ തിരഞ്ഞെടുപ്പ് പ്രവര്‍ത്തനം തുടങ്ങും എന്നുള്ളതാണ്.

മുന്നണികളെ ആശങ്കപ്പെടുത്തുന്നത് പോളിങ് ശതമാനമാകും. കോവിഡ് ഭീതിയില്‍ ആളുകള്‍ ബുത്തുകളിലേക്ക് എത്താന്‍ മടിച്ചാല്‍ നിര്‍ണായകമെന്ന് കരുതുന്ന പല വാര്‍ഡുകളും നഷ്ടപ്പെടുമെന്ന ഭീതിയിലാണ് മുന്നണികള്‍. 2015ല്‍ പഞ്ചായത്തുകളിലും മുന്‍സിപ്പാലിറ്റിയിലും 70 ശതമാനത്തിന് മുകളിലായിരുന്നു പോളിങ് ശതമാനം. കോര്‍പ്പറേഷനിലാകട്ടെ അത് 63.09 ശതമാനവും.

അതേസമയം കഴിഞ്ഞ തവണത്തേക്കാള്‍ വോട്ടര്‍മാരുടെ എണ്ണത്തിലും വര്‍ധനവുണ്ട്. പുതിയ വോട്ടര്‍മാരെ ബൂത്തുകളിലെത്തിക്കാന്‍ സാധിച്ചാലും പ്രായമായവര്‍ നിലവിലെ സാഹചര്യത്തില്‍ വോട്ട് ചെയ്യാനെത്തുന്നത് ഒഴിവാക്കിയേക്കാമെന്നതാണ് പ്രധാന പ്രതിസന്ധി.

കഴിഞ്ഞതവണ കപ്പിനും ചുണ്ടിനുമിടയില്‍ നഷ്ടമായ വാര്‍ഡുകളാണ് പലയിടങ്ങളിലും ഭരണം നഷ്ടപ്പെടാന്‍ ഇടയാക്കിയതെന്ന വിലയിരുത്തലുണ്ട് എല്ലാ കക്ഷികള്‍ക്കും.

ഇത്തവണ അത്തരം സാഹചര്യങ്ങള്‍ പരമാവധി ഒഴിവാക്കാനുള്ള ശ്രമങ്ങള്‍ നടത്തുമ്പോഴും പോളിങ് ശതമാനം ഇടിഞ്ഞാല്‍ പ്രതീക്ഷകളെല്ലാം അസ്ഥാനത്താകും. വിജയം സുനിശ്ചിതമാണെന്ന് കണ്ണുമടച്ച് പറയുന്നുണ്ടെങ്കിലും ആശങ്ക എല്ലാവരിലും പ്രകടമാണ് .

സോഷ്യല്‍ മീഡയില്‍ പ്രചരണം എന്ന് എല്ലാ മുന്നണികളും പറയുന്നുണ്ടെങ്കിലും കേരളത്തിലെ സോഷ്യ മീഡിയ ഉപയോഗത്തില്‍ മുതിര്‍ന്നവര്‍ പിന്നിലാണ്. അതിനാല്‍ അത് അവരില്‍ വലിയ വലിയ സ്വാധീനം ചെലുത്തിയേക്കില്ല. അതിനാല്‍ പുതിയ സംവിധാനങ്ങള്‍ എല്ലാവരും പരിശോധിക്കുന്നുണ്ട്.