‘ഇനി ലാത്തിയടിയേല്‍ക്കാനും ജലപീരങ്കിക്ക് നടുവിലും ഞങ്ങള്‍ ഉണ്ടാവില്ല’:കെ എസ് യു

കൊല്ലത്തെ സീറ്റ് നിര്‍ണയത്തില്‍ പ്രതിഷേധവുമായി

തദ്ദേശ തെരഞ്ഞെടുപ്പിന് ഇനി ആഴ്ച്ചകള്‍ മാത്രം ബാക്കി നില്‍ക്കെ സീറ്റിനായി കൊല്ലം ഡിസിസിയില്‍ കെഎസ് യുവിന്റെ കുത്തിയിരിപ്പ് സമരം. തദ്ദേശ തെരഞ്ഞെടുപ്പ് അടുത്തിട്ടും കൊല്ലത്തെ സീറ്റ് നിര്‍ണയം എങ്ങുമെത്തിയിട്ടില്ല. കെഎസ് യുവിനെ പാടെ അവഗണിച്ചെന്നു ആരോപിച്ചു ജില്ലാ പ്രസിഡന്റ് വിഷ്ണു വിജയന്റെ നേതൃത്വത്തിലാണ് ഡിസിസി പ്രസിഡന്റിന്റെ ഓഫീസിന് മുന്നില്‍ കുത്തിയിരുപ്പ് സമരം ആരംഭിച്ചത്.
ജില്ലാ പഞ്ചായത്തിലും കോര്‍പ്പറേഷനിലുമടക്കം നാല് സീറ്റുകളാണ് കെഎസ് യു ആവശ്യപ്പെട്ടത്. എന്നാല്‍ ഒരു സീറ്റ് പോലും നല്‍കിയില്ലെന്ന് നേതാക്കള്‍ പറയുന്നു. കെഎസ് യു ഇടഞ്ഞ് നില്‍ക്കുന്ന സാഹചര്യത്തില്‍ സീറ്റ് പ്രഖ്യാപനവും വൈകുകയാണ്. രാവിലെയോടെയാണ് നേതാക്കള്‍ പ്രതിഷേധ സമരം ആരംഭിച്ചത്.
പിന്നീട് ഡിസിസി പ്രസിഡന്റ് നേതാക്കളുമായി ചര്‍ച്ച നടത്തിയെങ്കിലും നാല് സീറ്റ് എന്ന ആവശ്യത്തില്‍ നിന്ന് കെഎസ് യു പിന്നോട്ട് പോയിട്ടില്ല. കെഎസ് യു നേതാക്കള്‍ പ്രതിഷേധവുമായി ഡിസിസിയില്‍ തുടരുകയാണ്.