ഷാനവാസ് പാദൂര്‍ ഇടതുപക്ഷത്തേക്കും എന്‍.കൃഷ്ണഭട്ട് താമരയിലേയ്ക്കും

തദ്ദേശ തെരഞ്ഞെടുപ്പിന് മുന്‍പ് കാസര്‍ഗോഡ് കോണ്‍ഗ്രസിന് ഇരട്ട പ്രഹരം

അന്തരിച്ച മുതിര്‍ന്ന കോണ്‍ഗ്രസ് നേതാവ് പാദൂര്‍ കുഞ്ഞാമു ഹാജിയുടെ മകന്‍ ഷാനവാസ് പാദൂര്‍ കോണ്‍ഗ്രസ് വിട്ട് ഇടതു സ്വാതന്ത്ര്യനായി ചെങ്കള ഡിവിഷനില്‍ നിന്ന് മത്സരിക്കും എന്ന വാര്‍ത്ത കാസര്‍ഗോട്ടെ കോണ്‍ഗ്രസുകാര്‍ ഞെട്ടലോടെയാണ് ശ്രവിച്ചത്, തികച്ചും അപ്രതീക്ഷിതമായ നീക്കമാണ് ഷാനവാസ് പാദൂറിന്റെ ഭാഗത്ത് നിന്ന് ഉണ്ടായിരിക്കുന്നത്. തന്റെ പ്രശ്നങ്ങള്‍ പാര്‍ട്ടിയില്‍ ഉന്നയിക്കാനോ പരിഹരിക്കാനോ ഷാനവാസ് തയാറായിയിരുന്നില്ല എന്നാണ് സൂചന. മുസ്ലിം ലീഗിന്റെ കുത്തക സീറ്റായ ചെങ്കള ഡിവിഷനില്‍ നിന്നാണ് ഷാനവാസ് ഇടത് സ്വാതന്ത്ര്യനായി ജില്ലാ പഞ്ചയത്തിലേക്ക് ജനവിധി തേടുന്നത്. ഷാനവാസ് പാദൂറിന്റെ വ്യക്തി ബന്ധങ്ങളും കുടുംബ ബന്ധങ്ങളും ഇവിടെ വിജയ സമവാക്യമാവുമെന്ന പ്രതീക്ഷയിലാണ് ഇടതുപക്ഷം.
ഏതാനും ദിവസങ്ങള്‍ക്ക് മുന്‍പ് ബദിയടുക്ക പഞ്ചായത്ത് പ്രസിഡണ്ടും കോണ്‍ഗ്രസ് നേതാവുമായിരുന്ന എന്‍ കൃഷ്ണ ഭട്ട് ബിജെപിയില്‍ ചേര്‍ന്നിരുന്നു. കൃഷ്ണ ഭട്ട് ഇത്തവണ കോണ്‍ഗ്രസിന്റെ കുത്തകവാര്‍ഡായ മാന്യയില്‍ നിന്ന് മത്സരിക്കുന്നുണ്ട്, നിലവില്‍ കോണ്‍ഗ്രസിന്റെ ശ്യാമ പ്രസാദാണ് ഇവിടെ നിന്നുള്ള മെമ്പര്‍.കൃഷണ ഭട്ടിന് സംഘ്പരിവാര്‍ ബാന്ധവമുണ്ടെന്ന് നേരത്തെ ആരോപണം ഉയര്‍ന്നിരുന്നുവെങ്കിലും കോണ്‍ഗസ് നേതൃത്വം അത് മുഖവിലക്കെടുത്തിരുന്നില്ല, കഴിഞ്ഞ വര്‍ഷം ബദിയടുക്കയില്‍ ആര്‍ എസ് എസ് അനുഭവമുള്ള സംഘടനയുടെ സമ്മേളനത്തില്‍ കൃഷ്ണ ഭട്ട് പങ്കെടുത്തത് ഏറെ വിവാദത്തിന് വഴി വെച്ചിരുന്നു.
തദ്ദേശ തെരഞ്ഞെടുപ്പിന് മുന്‍പ് എണ്ണം പറഞ്ഞ രണ്ട് നേതാക്കള്‍ കാസര്‍കോട് നിന്ന് കോണ്‍ഗ്രസ് വിട്ടത് പാര്‍ട്ടിക്ക് ഏറെ ക്ഷീണം ചെയ്യും, ബിജെപിയുടെയും എല്‍ഡിഎഫിന്റെയും പിന്തുണയോടെ ജനവിധി തേടുന്ന ഇരുവരെയും പരാജയപ്പെടുത്താന്‍ സാധിച്ചാല്‍ അത് ജില്ലയിലെ കോണ്‍ഗ്രസ് നേതൃത്വത്തിന് മുതല്‍കൂട്ടാവുകയും ഡിസിസി അധ്യക്ഷന്‍ എന്ന നിലയില്‍ ഹക്കീം കുന്നിലിന് പാര്‍ട്ടിയിലുള്ള അപ്രമാദിത്വം അരക്കിട്ടുറപ്പിക്കുകയും ചെയ്യും.