യൂത്ത് ലീഗ് നേതാവ് യൂസഫ് പടനിലം കുന്ദമംഗലത്ത് വിമത സ്ഥാനാര്‍ഥി

യൂത്ത് ലീഗ് ദേശീയ നിര്‍വ്വാഹക സമിതി അംഗവും സംസ്ഥാന കമ്മറ്റി അംഗവുമായ യൂസഫ് പടനിലം ബ്ലോക്ക് പഞ്ചായത്ത് കുന്ദമംഗലം ഡിവിഷനില്‍ ലീഗ് വിമത സ്ഥാനാര്‍ഥിയായി നാമനിര്‍ദ്ദേശ പത്രിക സമര്‍പ്പിച്ചു.സ്ഥാനാര്‍ഥി നിര്‍ണ്ണയത്തില്‍ യുവജനങ്ങള്‍ക്ക് അര്‍ഹമായ പ്രാധിനിത്യം നല്‍കാത്തതിലും മൂന്ന് തവണ മല്‍സരിച്ച് ജയിച്ചവര്‍ മല്‍സരിക്കേണ്ടതില്ലെന്ന പാര്‍ട്ടി സംസ്ഥാന കമ്മറ്റിയുടെ നിര്‍ദ്ദേശം അവഗണിച്ചതിലും പ്രതിഷേധിച്ചാണ് മത്സരിക്കുന്നതെന്ന് യൂസഫ് പടനിലം പറഞ്ഞു. ലീഗുകാരന്‍ തന്നെയായി തന്നെയാണ് മല്‍സരിക്കുന്നതെന്നും അദ്ദേഹം പറഞ്ഞു.
തദ്ദേശ തെരഞ്ഞെടുപ്പില്‍ മുപ്പത് ശതമാനം സീറ്റുകള്‍ യുവാക്കള്‍ക്കും മുപ്പത് ശതമാനം സീറ്റുകള്‍ പുതുമുഖങ്ങള്‍ക്കും നല്‍കണമെന്ന സംസ്ഥാന കമ്മറ്റി നല്‍കിയ പരിഗണന നിര്‍ദ്ദേശങ്ങള്‍ കുന്ദമംഗലത്തെ ലീഗ് നേതൃത്വം തള്ളിയതായി യൂസഫ് പടനിലം ആരോപിച്ചു. കുന്ദമംഗലത്തെ ലീഗ് നേതൃത്വം പ്രൈവറ്റ് ലിമിറ്റഡ് കമ്പനിയായി മാറിയിരിക്കുകയാണന്നും യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ്, യു.സി രാമന്‍, എം.എ റസാഖ് മാസ്റ്റര്‍ എന്നിവര്‍ ഈ കമ്പനിയുടെ വക്താക്കളാണെന്നും അദ്ദേഹം ആരോപിച്ചു.എല്‍.ഡി.എഫ് പിന്തുണച്ചാല്‍ പിന്തുണ സ്വീകരിക്കുമെന്നും യൂസുഫ് പറഞ്ഞു. അതേ സമയം കുന്ദമംഗലം ഡിവിഷനില്‍ എല്‍ഡിഎഫ് സ്ഥാനാര്‍ഥി നാമനിര്‍ദ്ദേശ പത്രിക സമര്‍പ്പിച്ചിട്ടുണ്ടെങ്കിലും ഇത് പിന്‍വലിച്ച് യൂസഫിന് പിന്തുണ കൊടുക്കാനാണ് സാധ്യത. ബ്ലോക്ക് പഞ്ചായത്ത് പൈങ്ങോട്ടുപുറം ഡിവിഷനിലും ലീഗിന് വിമത സ്ഥാനാര്‍ഥിയുണ്ട്. മുസ്ലിം ലീഗ് പഞ്ചായത്ത് കമ്മറ്റി സെക്രട്ടറിയായിരുന്ന മൊയ്തീന്‍കോയ ഇവിടെ നാമനിര്‍ദ്ദേശ പത്രിക സമര്‍പ്പിച്ചിട്ടുണ്ട്. ഇവിടേയും എല്‍ഡിഎഫ് സ്ഥാനാര്‍ഥി പത്രിക സമര്‍പ്പിച്ചിട്ടുണ്ടെങ്കിലും പത്രിക പിന്‍വലിച്ച് ഇദ്ദേഹത്തെ പിന്തുണക്കാന്‍ സാധ്യതയുണ്ട്.