സര്‍ക്കാര്‍ തീരുമാനങ്ങള്‍ ജനാഭിപ്രായത്തിന് അനുസരിച്ച്

സംശയങ്ങളും ആശങ്കകളും കണക്കിലെടുത്താണു പൊലീസ് നിയമ ഭേദഗതി ഓര്‍ഡിനന്‍സ് പിന്‍വലിച്ചതെന്നു മുഖ്യമന്ത്രി പിണറായി വിജയന്‍. പിന്‍വലിക്കല്‍ ഓര്‍ഡിനന്‍സ് പുറത്തിറക്കും. പൊതു അഭിപ്രായം ശേഖരിച്ച് നിയമസഭയില്‍ ചര്‍ച്ച ചെയ്ത് തുടര്‍ന്നുള്ള കാര്യങ്ങള്‍ തീരുമാനിക്കും. ഓര്‍ഡിനന്‍സിലൂടെ നിയമം നടപ്പിലാക്കാന്‍ ഉദ്ദേശിക്കുന്നില്ലെന്നും മുഖ്യമന്ത്രി പറഞ്ഞു.

സമൂഹമാധ്യമങ്ങളിലൂടെ അപകീര്‍ത്തികരവും വിദ്വേഷകരവുമായ ഉള്ളടക്കവും വ്യാജവാര്‍ത്തകളും പ്രചരിപ്പിക്കുന്നത് തടയുന്നതിനാണ് പൊലീസ് ആക്ടില്‍ ഭേദഗതി വരുത്തിയിരുന്നത്. സ്ത്രീത്വത്തെ അപമാനിക്കുന്ന പ്രചാരണം വലിയ തോതില്‍ വര്‍ധിക്കുകയും സമൂഹത്തില്‍ വലിയ പ്രതിഷേധം ഉയരുകയും ചെയ്ത സാഹചര്യത്തിലായിരുന്നു നിയമ ഭേദഗതി. എന്നാല്‍ സമൂഹത്തിലെ വിവിധ വിഭാഗങ്ങളില്‍ നിന്ന് ഈ നിയമഭേദഗതിയെ കുറിച്ച് ആശങ്ക ഉയര്‍ന്നു. ഇതു കണക്കിലെടുത്താണ് ഓര്‍ഡിനന്‍സ് പിന്‍വലിക്കുന്നതെന്ന് മുഖ്യമന്ത്രി പറഞ്ഞു.

നിയമഭേദഗതി പൊലീസിന് അമിതാധികാരം നല്‍കുമെന്നും അതു ദുരുപയോഗം ചെയ്യാന്‍ സാധ്യതയുണ്ടെന്നുമുള്ള അഭിപ്രായം സര്‍ക്കാര്‍ മുഖവിലക്കെടുത്തു. സമൂഹത്തില്‍ നിന്ന് ഉയരുന്ന അഭിപ്രായങ്ങള്‍ക്ക് വിലകല്‍പ്പിക്കുന്ന രീതി ഇക്കാര്യത്തിലും സ്വീകരിക്കാന്‍ സര്‍ക്കാര്‍ തയ്യാറാവുകയാണ്. സംശയങ്ങളും ആശങ്കകളും ബാക്കിനില്‍ക്കുന്ന സാഹചര്യത്തില്‍ നിയമഭേദഗതി പിന്‍വലിക്കുന്നതാണ് ഉചിതമെന്ന അഭിപ്രായമാണ് സര്‍ക്കാരിനുള്ളത്. ഇതനുസരിച്ചാണ് പിന്‍വലിക്കാനുള്ള തീരുമാനമെടുത്തത്.

നിയമത്തിന്റെ അപര്യാപ്തത ഉള്ളതിനാല്‍ ആളുകള്‍ നിയമം കയ്യിലെടുക്കുന്ന സാഹചര്യം ഒഴിവാക്കണം എന്ന് അഭിപ്രായമുയര്‍ന്നപ്പോഴാണ് സര്‍ക്കാര്‍ ഓര്‍ഡിനന്‍സ് കൊണ്ടുവന്നത്. വ്യക്തികള്‍ക്കെതിരെ സമൂഹമാധ്യമങ്ങളിലെ ആക്ഷേപം വര്‍ധിച്ചു. അത്തരം സംഭവങ്ങള്‍ തടയണമെന്ന ആവശ്യം പ്രതിപക്ഷത്തുനിന്നടക്കം ഉയര്‍ന്നു.

സമൂഹ മാധ്യമങ്ങളിലെ ആക്ഷേപംമൂലം കുടുംബ ജീവിതങ്ങള്‍ താറുമാറായ സംഭവം ഉണ്ടായി. സ്ത്രീകളുടെ ഫോട്ടോ എഡിറ്റു ചെയ്ത് മോശമായി പ്രചരിപ്പിച്ചു. ഇതെല്ലാം പരിഗണിച്ചാണ് സദുദ്ദേശ്യത്തോടെ നിയമം കൊണ്ടുവന്നത്. അതു ദുരുപയോഗപ്പെടുത്താന്‍ സാധ്യതയുണ്ടെന്ന് പലരും ചൂണ്ടിക്കാട്ടിയതിലാണ് ഓര്‍ഡിനന്‍സ് പിന്‍വലിക്കാന്‍ തീരുമാനിച്ചത്.

ഏതെങ്കിലും മാധ്യമത്തിന്റെ പ്രവര്‍ത്തനത്തെ തടസ്സപ്പെടുത്തുന്നത് സര്‍ക്കാര്‍ നിലപാടല്ല. മാധ്യമങ്ങളോട് ശത്രുതാപരമായ സമീപനം സര്‍ക്കാരിനില്ല. വികല മനസുകള്‍ സ്ത്രീകള്‍ക്കെതിരെ പ്രവര്‍ത്തിക്കുന്നുണ്ട്. അത്തരം ആളുകള്‍ പിന്‍വാങ്ങണം, സമൂഹം ജാഗ്രത പാലിക്കണം. ഇടതുപക്ഷ നിലപാട് താന്‍ സ്വീകരിക്കുന്നുണ്ടോ എന്നു പരിശോധിക്കാന്‍ പാര്‍ട്ടിയുണ്ട്.

താന്‍ പാര്‍ട്ടിയില്‍നിന്നു പോകാന്‍ ആഗ്രഹിച്ചവരുണ്ട്. എന്നാല്‍ ഇപ്പോഴും പാര്‍ട്ടിയില്‍ തുടരുന്നു. എല്‍ഡിഎഫ് നിലപാടുകള്‍ക്ക് അനുസരിച്ചാണ് സര്‍ക്കാര്‍ പ്രവര്‍ത്തിക്കുന്നത്. ഓര്‍ഡിനന്‍സ് പിന്‍വലിച്ചത് പൊതുസമൂഹം അംഗീകരിച്ചു. ചിലര്‍ക്ക് അംഗീകരിക്കാന്‍ വിഷമമുണ്ടാകുമെന്നും മുഖ്യമന്ത്രി പറഞ്ഞു.