ബുറെവി കേരളത്തില്‍ പ്രവേശിച്ചേക്കുമെന്ന് സൂചന

ബംഗാള്‍ ഉള്‍ക്കടലില്‍ നിന്നും അറബിക്കടലിലേക്ക് നീങ്ങുന്ന ബുറെവി ചുഴലിക്കാറ്റ് കേരളത്തില്‍ പ്രവേശിക്കാനും സാധ്യത. ബുധനാഴ്ച രാവിലെ എട്ട് മണിയോടെ കേന്ദ്ര കാലാവസ്ഥ നിരീക്ഷണകേന്ദ്രം നല്‍കിയ അറിയിപ്പ് പ്രകാരം ചുഴലിക്കാറ്റ് കര തൊടില്ല. എന്നാല്‍ പത്ത് മണിയോടെ സ്വകാര്യ കാലാവസ്ഥാ ഏജന്‍സികള്‍ പുറത്തു വിട്ട പുതിയ വിവരങ്ങള്‍ പ്രകാരം ചുഴലിക്കാറ്റിന്റെ സഞ്ചാര പഥത്തില്‍ കേരളവും ഉള്‍പ്പെടുന്നുണ്ട്.തിരുവനന്തപുരം ജില്ലയിലെ നെയ്യാറ്റിന്‍കര വഴി ചുഴലിക്കാറ്റ് കടന്ന് പോയേക്കും എന്നാണ് കേന്ദ്ര കാലാവസ്ഥാ വകുപ്പ് ഒടുവില്‍ പുറത്തു വിട്ട വിവരം. അതേസമയം നൂറ് കിലോമീറ്ററിന് താഴെയാണ് ചുഴലിക്കാറ്റിന് വേഗത എന്നതിനാല്‍ അമിത ആശങ്ക വേണ്ടെന്നും ജനങ്ങള്‍ ജാഗ്രത പാലിച്ചാല്‍ മതിയെന്നും ചൂണ്ടിക്കാട്ടപ്പെടുന്നു.
അതേസമയം ഇന്ന് രാത്രിയോടെ ശ്രീലങ്കയില്‍ കര തൊടുന്ന ചുഴലിക്കാറ്റ് ലങ്കയിലൂടെ സഞ്ചരിച്ച ശേഷം നാളെ രാത്രിയോടെ തമിഴ്‌നാട് തീരത്ത് പ്രവേശിക്കും എന്നാണ് പ്രവചനം. ചുഴലിക്കാറ്റ് കരയില്‍ പ്രവേശിക്കുന്നത് ഒരു തരത്തില്‍ ഗുണകരമാണെന്നും കരയിലൂടെ കൂടുതല്‍ നീങ്ങും തോറും കാറ്റിന്റെ കരുത്ത് കുറയുമെന്നും കുസാറ്റ് അസി.പ്രൊഫസറും കാലാവസ്ഥാ നിരീക്ഷകനുമായ ഡോ.അഭിലാഷ് പറഞ്ഞു. ശക്തമായ കാറ്റില്‍ മരങ്ങളും പരസ്യബോര്‍ഡുകളും ഉറപ്പില്ലാത്ത കെട്ടിട മേല്‍ക്കൂരകളും തകര്‍ന്നു വീഴാന്‍ സാധ്യതയുണ്ടെന്ന് അഭിലാഷ് പറയുന്നു. എന്നാല്‍ ഓഖി ചുഴലിക്കാറ്റില്‍ ഉണ്ടായ പോലെ അതിശക്തമായ നാശനഷ്ടങ്ങള്‍ ബുറെവിയില്‍ ഉണ്ടാവാന്‍ സാധ്യതയില്ലെന്നും നാളെ രാവിലെ മുതല്‍ മറ്റന്നാള്‍ വൈകിട്ട് കേരളത്തില്‍ പ്രത്യേകിച്ച് തെക്കന്‍ ജില്ലകളില്‍ അതീവ ജാഗ്രത വേണമെന്നും അഭിലാഷ് പറയുന്നു.
ചുഴലിക്കാറ്റിന്റെ സഞ്ചാരപാതയില്‍ ഇനിയും മാറ്റം വരാം. കേരളത്തിന് പുറത്തേക്കോ ചിലപ്പോള്‍ കൂടുതല്‍ അകത്തേക്കോ കാറ്റ് വന്നേക്കാം ശ്രീലങ്കയില്‍ പ്രവേശിച്ച് കാറ്റ് വീണ്ടും കടലില്‍ എത്തിയാല്‍ മാത്രമേ സഞ്ചാരദിശയുടെ കാര്യത്തില്‍ വ്യക്തമായ ചിത്രം ലഭിക്കൂ - അഭിലാഷ് പറയുന്നു.