കാര്‍ഷിക നിയമം നടപ്പിലാക്കാന്‍ കേന്ദ്രം സമ്മര്‍ദ്ദം ചെലുത്തുന്നുവെന്ന് മന്ത്രി സുനില്‍ കുമാര്‍

പുതിയ കാര്‍ഷിക നിയമം നടപ്പിലാക്കാന്‍ കേന്ദ്രം സമ്മര്‍ദ്ദം ചെലുത്തുന്നുവെന്ന് കൃഷി വകുപ്പ് മന്ത്രി വി എസ് സുനില്‍ കുമാര്‍ പറഞ്ഞു, എന്നാല്‍ കേരളം ഈ നിയമം നടപ്പിലാക്കില്ലെന്ന് അദ്ദേഹം തീര്‍ത്ത് പറഞ്ഞു. സംസ്ഥാനങ്ങളുടെ താല്പര്യം പരിഗണിക്കാതെ ഇത്തരം നിയമങ്ങള്‍ പാസാക്കിയെടുക്കുന്നത് ഫെഡറല്‍ സ്വഭാവത്തിന്റെ ലംഘനമാണെന്ന് അദ്ദേഹം കൂട്ടിച്ചേര്‍ത്തു. ഈ കരിനിയമങ്ങള്‍ ഒരു കാരണവശാലും കേരളത്തില്‍ നടപ്പാക്കാന്‍ നമ്മള്‍ തയ്യാറല്ല എന്ന കാര്യം നേരത്തെ തന്നെ അര്‍ത്ഥ ശങ്കയ്ക്കിടയില്ലാത്തവിധം വ്യക്തമാക്കിയിട്ടുണ്ട്, അദ്ദേഹം വ്യക്തമാക്കി.
എന്നാല്‍ കേന്ദ്ര സര്‍ക്കാരില്‍ നിന്ന് സംസ്ഥാനങ്ങള്‍ക്ക് ഉപാധികളില്ലാതെ ലഭിക്കേണ്ട അര്‍ഹമായ ധനസഹായങ്ങള്‍ ലഭിക്കണമെങ്കില്‍ ഈ കരിനിയമങ്ങള്‍ നടപ്പാക്കിയേ തീരൂ എന്നാണ് കേന്ദ്ര സര്‍ക്കാര്‍ പറയുന്നത്. മാത്രവുമല്ല, കേന്ദ്ര സര്‍ക്കാരിന്റെ അധികാരം ഉപയോഗിച്ച് നിരന്തരമായി സംസ്ഥാന സര്‍ക്കാര്‍ ഉദ്യോഗസ്ഥരെ ഈ നിയമങ്ങള്‍ നടപ്പിലാക്കണമെന്നു സമ്മര്‍ദ്ദം ചെലുത്തിക്കൊണ്ടിരിക്കുകയാണെന്നും അദ്ദേഹം കൂട്ടിച്ചേര്‍ത്തു.കാര്‍ഷിക നിയമത്തിനെതിരെ കര്‍ഷകര്‍ നയിക്കുന്ന സമരം കൊടുമ്പിരി കൊള്ളുകയാണ്.