തമിഴ്‌നാട്ടിലെ നാലാംഭാര്യയെ കൊന്ന് കേരളത്തിലെത്തിയത് ആദ്യഭാര്യയെ കൊല്ലാന്‍

തമിഴ്‌നാട്ടിലുള്ള നാലാംഭാര്യയെ കൊലപ്പെടുത്തിയശേഷം കേരളത്തിലെത്തി ഒഴിവില്‍ കഴിഞ്ഞിരുന്ന പ്രതി പൊലീസ് പിടിയില്‍. തൂത്തുക്കുടി സ്വദേശിയായ കറുപ്പുസ്വാമി (41) ആണ് വണ്ടിപ്പെരിയാര്‍ പൊലീസിന്റെ പിടിയിലായത്. പൊലീസ് പിടിക്കാന്‍ ശ്രമിക്കവെ ആത്മഹത്യ ചെയ്യാനും ഇയാള്‍ ശ്രമം നടത്തി. പൊലീസ് പിടിക്കാന്‍ ശ്രമിക്കുന്നതിനിടെ കറുപ്പുസ്വാമി കൈവശമിരുന്ന കുപ്പിച്ചില്ലുകള്‍ പൊട്ടിച്ച് വിഴുങ്ങി ആത്മഹത്യയ്ക്ക് ശ്രമിക്കുകയായിരുന്നു. എന്നാല്‍ പൊലീസ് ഉദ്യോഗസ്ഥരുടെ അവസരോചിതമായ ഇടപെടലിനാല്‍ ആത്മഹത്യാശ്രമം പരാജയപ്പെട്ടു.
കഴിഞ്ഞ സെപ്റ്റംബറിലാണ് നാലാം ഭാര്യയായ ഷണ്‍മുഖിയെ കൊലപ്പെടുത്തിയശേഷം ഇയാള്‍ കേരളത്തിലേക്ക് കടന്നത്. വണ്ടിപ്പെരിയാര്‍ ആറ്റോരത്തെ ഒന്നാം ഭാര്യയുടെ ബന്ധുവിനൊപ്പമാണ് ഇയാള്‍ താമസിച്ചിരുന്നത്. പ്രതിയുടെ കൃത്യമായ വിവരം ലഭിച്ചതോടെ വണ്ടിപ്പെരിയാര്‍ പൊലീസ് തൂത്തുക്കുടി പൊലീസിന് വിവരം കൈമാറിയശേഷം പ്രതിയെ പിടികൂടുകയായിരുന്നു.
നാല് ഭാര്യമാരില്‍ രണ്ടുപേരെ ഇയാള്‍ നേരത്തെ കൊലപ്പെടുത്തിയതായും ഒന്നാം ഭാര്യയെ കൊലപ്പെടുത്താനാണ് കേരളത്തില്‍ എത്തിയതെന്നുമാണ് പൊലീസില്‍നിന്നു ലഭിക്കുന്ന വിവരം. വണ്ടിപ്പെരിയാര്‍ സി.ഐ. ടി.ഡി. സുനില്‍കുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.